Read sango Efeze 2 Bible Online

Efeze 2 - sango bible

Efeze 2

¹Ando na le ti Nzapa, ala yeke azo so akui awe ndali ti asioni ye na asiokpari so ala sara.

²Ala yeke sara ye ando tongana ti azo ti dunia so; ala yeke ma gi yanga ti makonzi ti asioni yingo so ayeke na popo ti nduzu na sese, yingo so laa ayeke sara kua na be ti azo so ake ti ma yanga ti Nzapa.

³E nga kue, e yeke ando tongana ala: e yeke sara aye na lege ti asioni nzara ti be ti e, e yeke sara ye so be ti e aye na ye so anzere na be ti e. E nga, ngonzo ti Nzapa alingbi ti ti na li ti e tongana tanga ti azo kue ndali ti so a du e zo.

⁴Me Nzapa abaa mawa ti e ahon ndoni, lo ye e mingi.

⁵Ataa so na le ti Nzapa e yeke ando azo so akui awe ngbanga ti sioni ti e, lo kiri lo mu na e fini legeoko na Christ. Ndali ti nzoni be ti Nzapa si ala soo kuâ.

⁶Na lege ti gango so e ga oko na Jésus Christ, Nzapa azingo e na kuâ legeoko na lo titene e na Christ e duti oko na yayu.

⁷Lo sara nzoni ye so na e na lege ti Jésus Christ titene na ya ti angoi so kue ayeke ga, azo alingbi ti baa so nzoni be ti lo ahon ndoni.

⁸Biani, ndali ti nzoni be ti Nzapa si ala soo kuâ, na lege ti mabe, mbeni ye so ala sara titene ala soo kuâ ndali ni ayeke daa pepe. Songo kuâ ayeke nzoni ye so lo mu na ala senge senge.

⁹Songo kuâ ni aga na lege ti akua so ala sara pepe, tongaso si mbeni zo alingbi ti pika kate ti lo daa pepe.

¹⁰Taa-tënë, Nzapa laa asara e; na gango so e ga oko na Jésus Christ, Nzapa aleke e titene e mu tere ti e kue ti sara anzoni ye so lo leke kozoni titene e sara.

¹¹Azuife ayeke azo so afâ *ganza; ganza ni ayeke ye so maboko ti zo laa asara, ala ye titene azo airi ala “aganza”. Ala so a du ala amara nde, ala yeke fâ ganza pepe si azuife ayeke iri ala “apopö.” Ayeke nzoni ala dabe ti ala na lege ti dutingo ti ala ti kozoni:

¹²ando, ala yeke yongoro na Christ, mbeni ye ti ala oko so ala lingbi ti wara na popo ti azo ti Israel ayeke daa pepe. Nzapa asara si azo so lo mu zendo na ala, lo sara *ambuki na ala; me ala azo ti amara nde, ala yeke na ya ti ambuki so pepe. Mbeni ye so ala lingbi ti zia be ti ala daa ti ku na dunia so ayeke daa pepe; ala hinga Nzapa pepe.

¹³Ando, ala so ayeke yongoro na Nzapa, fadeso, na lege ti gango so ala ga oko na Christ, ala ga nduru na Nzapa, ngbanga ti so mene ti Christ atuku ndali ti ala.

¹⁴Biani, Christ wani laa ayeke mu na e siriri, lo laa lo sara titene azuife na azo ti amara nde aga oko. Ando, kengo tere na popo ti e aga tongana mbeni gbagba so akangbi e, me na lege so lo ka tere ti lo na kuâ, gbagba ni akungbi awe.

¹⁵*Ndia ti Moïse so atene na zo, atene: “Mo sara so, mo sara so!”, Christ amingo ni awe. Lo sara tongaso ti bongbi azuife na azo ti amara nde titene ala ga mara oko, na lege ti gango so ala use kue aga oko na lo; Christ asara so ti zia siriri na popo ti ala.

¹⁶Na lege ti kuâ so Christ akui na ndö ti keke ti kroa, lo sara si songo akiri na popo ti ala na Nzapa, amara use so aga tere oko. Na lege ti keke ti kroa, lo sara si kengo tere ahunzi.

¹⁷Lo ga ti fa Nzoni Tënë ti siriri na ala, azo ti amara nde so ayeke ando na yongoro ndo nga na ala so ayeke nduru.

¹⁸Biani, ndali ti lo si e, azuife, na ala azo ti amara nde, e ga nduru na Nzapa Babâ, na lege ti oko Yingo-Vuru.

¹⁹Tongaso, ala azo ti amara nde, ala yeke awande mbeni pepe, wala azo so aga gango pepe. Me fadeso, ala na azo ti Nzapa ayeke amolenge ti kodro oko, ala yeke azo ti sewa ti Nzapa.

²⁰Ala yeke da so Nzapa asara; gere ti da ni ayeke *awatokua na awayanga-Nzapa si Jésus Christ wani ayeke ngangu têne ti gere ti da ni.

²¹Lo laa lo sara si da ni kue aluti ngangu. Na lege ti lo laa da ni alondo na nduzu, aga da so a zia ni nde ndali ti *Kota Gbia si ayeke nzoni kue.

²²Na lege ti gango so ala ga oko na lo, a mu ala na atanga ni kue ti sara na da so Yingo ti Nzapa wani ayeke duti daa.