Read sango Efeze 4 Bible Online

Efeze 4 - sango bible

Efeze 4

¹Tongaso, mbi so mbi yeke na da ti kanga ndali ti kua ti *Kota Gbia, mbi hunda na ala mingi titene sarango ye ti ala alingbi na iringo so lani Nzapa airi ala.

²Ala baa tere ti ala tongana akota zo pepe, ala sara ye na amba ti ala na ngangu pepe, ala kanga be ti ala. Na lege ti ndoye, ala kanga be ti ala na amba ti ala.

³Yingo-Vuru asara si ala ga oko; ala gi lege ngangu ti ngba na beoko na lege ti dutingo na siriri na popo ti ala.

⁴E kue, e yeke gi tere oko si Yingo ayeke nga gi oko; legeoko nga, gi ye oko laa Nzapa airi ala titene ala zia be ti ala ti ku ni.

⁵Kota Gbia ayeke gi oko, mabe ayeke gi oko, bateme ayeke gi oko.

⁶Nzapa ayeke gi oko, lo yeke Babâ ti azo kue, lo yeke gbia na ndö ti azo kue, lo yeke sara kua na lege ti azo kue, lo yeke duti na ya ti azo kue.

⁷Me e kue, e wara amatabisi; Jésus Christ laa akangbi amatabisi ni na zo oko oko kue alingbi na nzoni be ti lo.

⁸Mbeti ti Nzapa atene: “So lo ga ti gue yongoro kâ na nduzu, lo mu azo so lo gbu ala na ngbaa, lo gue na ala; lo mu aye senge senge na azo.”

⁹“Lo gue na nduzu”; nda ti tënë so aye ti tene nyen? Nda ni atene: lo zu kozoni na sese, so ti tene lo li na gbe ti sese yongoro kâ.

¹⁰Lo so lo zu na sese, gi lo laa lo ma yongoro na peko ti anduzu kâ titene lo mu ya ti dunia kue.

¹¹Lo laa lo mu amatabisi na azo; lo mu lege na ambeni ti ga *awatokua, wala awayanga-Nzapa, wala azo ti fango Nzoni Tënë, wala azo ti batango azo ti *Eglize wala awafango-ye.

¹²Lo sara tongaso titene azo ti Nzapa aga azo so alingbi ti sara kua si Eglize so ayeke tere ti Christ amai,

¹³ngbii e kue, e ga oko na lege ti mabe nga na lege ti hingango Molenge ti Nzapa. Tongaso, fade e yeke ga akangba na lege ti mabe si fini ti e kue ayeke ga tongana ti Christ.

¹⁴Fade e yeke kiri ti duti tongana akete molenge pepe so *mapo ti atënë nde nde ayingi ala, so pupu ti azo ti mvene nga na fango ye ti ala na lege ti mayere ahon na ala kirikiri tongana ngo na le ti ngu.

¹⁵Me tongana e yeke tene taa-tënë na lege ti ndoye, fade e yeke kono na ya ti aye kue ngbii e ga tongana Christ so ayeke li ti Eglize.

¹⁶Na lege ti lo laa ambage ti tere nde nde abongbi si aga tere oko tongana ti so akamba ti tere atengbi si aga tere oko. Tongana ambage ti tere ni oko oko kue asara kua ti ala nzoni, tere ni kue ayeke kono si ayeke leke tere ti lo na lege ti ndoye.

¹⁷Tongaso, na iri ti *Kota Gbia, mbi yeke tene tënë so biani na ala: ala kiri asara ye tongana ti azo ti amara nde pepe, ngbanga ti so atënë ti be ti azo ti amara nde ayeke buba ye.

¹⁸Hingango ndo ti ala ayeke na ya ti vukongo ndo; fini so Nzapa ayeke mu na zo, ala wara ni pepe, ngbanga ti so be ti ala akpengba si ala hinga ndo pepe.

¹⁹Ala hinga popo ti sioni na nzoni pepe, nilaa ala mu tere ti ala ti sara gi aye ti ndumba si ala yeke hon gi hongo na peko ti *asioni ye, kamene asara ala oko pepe.

²⁰Ti ala, ye so a fa na ala na ndö ti Christ laa pepe!

²¹Mbi hinga biani so ala ma atënë kue na ndö ti lo si ndali ti so ala yeke azo ti lo, a fa na ala taa-tënë so ayeke na Jésus.

²²Tongaso, alingbi ala zia ngbene lege ti dutingo ti ala. Ando, anzara ti be ti ala ayeke handa ala si ayeke buba ala. Alingbi ala zia ngbene dutingo ti ala ti zo tongana ti so zo ayeke zi gbagba bongo na tere ti lo.

²³Alingbi ala zia lege titene be ti ala na yingo ti ala aga fini ni.

²⁴Tongana ti so zo ayeke yu fini bongo, ala ga afini zo so a sara ala tongana ti so be ti Nzapa aye; lo ye titene taa-tënë asara si ala ga mbirimbiri, ala ga nde si ala ga nzoni kue.

²⁵Ndani laa, ala zia lege ti tenengo mvene! Zo oko oko atene taa-tënë na mba ti lo, ngbanga ti so e oko oko kue, e yeke gi na ya ti tere oko.

²⁶Tongana ala sara ngonzo, ala sara hange si ala sara siokpari pepe; ala bata ngonzo na be ti ala ngbii asi na lakui pepe.

²⁷Ala zia ndo na Zabolo ti hon ndö ti ala pepe.

²⁸Zo so lani ayeke zo ti nzi, lo kiri lo nzi pepe; me ayeke nzoni lo mu tere ti lo ti sara kua na maboko ti lo wani na legeni si lo wara ye ti mu maboko na azo ti mawa.

²⁹Alingbi sioni tënë oko asigigi na yanga ti ala pepe. Me tongana lege ayeke daa, ala tene gi nzoni tënë so alingbi ti mu lege na amba ti ala ti kpengba si asara nzoni na azo so ayeke ma ala.

³⁰Ala mu vundu na Yingo-Vuru pepe. Yingo-Vuru ayeke tongana nzoroko so Nzapa azia na tere ti ala ti fa so ala yeke ti lo. Na lege ti Yingo-Vuru, Nzapa akiri afa so mbeni lâ, fade lo yeke zi ala na ya ti siokpari biani biani.

³¹Batango zo na be, songo be, ngonzo, dekongo na li ti zo, zongango zo, sarango sioni na zo, alingbi aye tongaso ayeke na popo ti ala mbeni pepe.

³²Ala sara nzoni na popo ti ala, ala baa mawa ti amba ti ala; ala zi tënë na li ti amba ti ala na popo ti ala tongana ti so Nzapa azi tënë na li ti ala, ngbanga ti gango so ala ga oko na Christ.