Read sango Filipe 2 Bible Online

Filipe 2 - sango bible

Filipe 2

¹Gango so ala ga oko na Christ asara si ala kpengba. Ndoye ti lo asara si be ti ala awara ngangu, ala yeke na beoko na Yingo, ala ye tere si ala yeke sara nzoni be na azo.

²Tongaso, mbi hunda na ala titene ala sara si be ti mbi aduti na ngia ahon ndoni na lege ti dutingo ti ala: ala ma tere, ala ye tere, ala duti na beoko si tënë ti be ti ala ague gi oko.

³Ala sara ye na gbugburungo tere ti gi na kota ndo pepe, ala sara nga ye na lege ti kuru baba pepe. Me ala baa tere ti ala tongana akete zo, ala baa amba ti ala tongana azo so ayeke kota ahon ala.

⁴Ayeke nzoni zo oko oko asara ye ndali ti nzoni ti lo wani pepe, me lo sara ye ndali ti nzoni ti amba ti lo.

⁵Ayeke nzoni sarango ye na popo ti ala alingbi na ti azo so aga oko na Jésus Christ.

⁶Lo so lo yeke lakue lakue legeoko na Nzapa, na le ti lo, dutingo legeoko na Nzapa ayeke mbeni ye ti gbu na ngangu pepe.

⁷Me lo zia aye so kue lo yeke na ni, lo sara tere ti lo tongana zo ti kua, lo ga legeoko na azo kue; na bango lo, dutingo ti lo alingbi na ti zo.

⁸Lo sara tere ti lo kete, lo ga zo ti mango yanga ti Nzapa ngbii asi na kuâ, kuâ ti ndö ti keke ti kroa.

⁹Ndani laa, Nzapa amu lo na nduzu, azia lo na kota ndo, amu na lo iri so ayeke kota ahon a-iri kue.

¹⁰Tongaso, ala so ayeke na yayu, ala so ayeke na sese, ala so ayeke na gbe ti sese akuku na likunu ti ala ti gonda iri ti Jésus

¹¹si ala kue atene na yanga ti ala, atene: Jésus Christ ayeke *Kota Gbia si ala gonda Nzapa Babâ.

¹²Tongaso, a-ita ti mbi so mbi ye ala mingi, ala so ayeke ma yanga ti Nzapa lakue so, ayeke nzoni ala ma yanga ti lo gi ndali ti le ti mbi pepe. Me so mbi yeke na tere ti ala pepe, fadeso ayeke kota ye mingi titene ala ngba ti ma yanga ti lo. Ala sara kua na mbeto, na dongo tere si ala soo kuâ.

¹³Biani, Nzapa laa ayeke zia nzara ti sarango ye na be ti ala si lo yeke mu na ala lege ti sarango ni alingbi na ye so lo leke na be ti lo.

¹⁴Aye so kue ala yeke sara, ala sara ni na dikongo tënë na gbe ti go ti ala pepe wala na papa pepe.

¹⁵Tongaso, fade ala yeke duti azo so tënë ayeke na li ti ala pepe, azo so ayeke nzoni kue, amolenge ti Nzapa so ayeke sioni pepe na popo ti azo ti fadeso so ayeke sioni si ayeke sara kirikiri. Na popo ti azo ni, ala yeke duti tongana wâ so ayeke za na dunia so.

¹⁶Ala laa ayeke fa tënë so ayeke mu fini na zo. Tongaso, na lango ti kiringo ti Christ, fade tere ti mbi ayeke nzere ndali ti ala, ngbanga ti so akua ti mbi na pasi ti mbi, peko ni ayeke senge pepe!

¹⁷Mabe ti ala asara si ala yeke mu *sandaga na Nzapa. Mbi hinga pepe, tongana a fâ mbi si mene ti mbi atuku, fade ayeke ga tongana sandaga na ndö ti so ala yeke mu. Tongana ye ni ayeke tongaso, be ti mbi ayeke nzere si mbi na ala kue, e yeke na ngia.

¹⁸Ala nga, be ti ala anzere si ala duti na ngia legeoko na mbi!

¹⁹Mbi zia be ti mbi na ndö ti *Kota Gbia Jésus titene lo mu na mbi lege ti tokua Timothée na ala na ya ti alango so ayeke ga. Tongaso, na lege ti asango ti ala so mbi yeke ma na yanga ti lo, be ti mbi awara ngangu.

²⁰Gi lo oko laa tënë ti be ti lo ayeke tongana ti ti mbi si tënë ti ala agbu be ti lo mingi.

²¹Atanga ti azo ni kue ayeke gi gi nzoni ti ala wani; ala yeke gi nzoni ti Jésus Christ pepe.

²²Ala wani ahinga anzoni ye so Timothée asara awe: lo sara kua ndali ti Nzoni Tënë na tere ti mbi, tongana ti so molenge ayeke sara kua na tere ti babâ ti lo.

²³Tongana mbi baa nda ti tënë ti mbi nzoni awe, lo laa mbi ye ti tokua lo na ala.

²⁴Na lege ti gango so e ga oko na Kota Gbia, mbi hinga biani na be ti mbi so fade mbi nga, mbi yeke si na ala kâ na ya ti alango so ayeke ga.

²⁵Me mbi baa so, ayeke nzoni titene mbi kiri mbi tokua na ala ita ti e Epafrodite, lo so lo yeke mba ti mbi zo ti kua; e na lo, e yeke tiri bira ndali ti Nzapa. Ala laa atokua lo titene lo mu maboko na mbi, ngbanga ti so aye atia mbi lani.

²⁶Lo yeke na nzara mingi ti kiri ti baa ala kue, me be ti lo aduti nzoni pepe, ngbanga ti so ala ma tënë ti kobela ti lo.

²⁷Taa-tënë, tere ti lo aso lani ngangu, angba kete ka lo kui; me Nzapa abaa mawa ti lo. Nzapa abaa gi mawa ti lo oko pepe, me lo baa nga mawa ti mbi si mbi kiri mbi wara vundu pepe, na peko ti tere, na peko ti tere.

²⁸Ndani laa, mbi tokua lo hio na ala si na bango lo, ala kiri awara ngia, tongaso si be ti mbi ade kete.

²⁹Na lege ti gango so ala ga oko na *Kota Gbia, ayeke nzoni ala yamba lo na ngia mingi. Ala ne amara ti azo tongaso,

³⁰ngbanga ti so angba kete lo kui ndali ti kua ti Christ. Lo ka tere ti lo titene lo ga lo sara na mbi ye so ala wani alingbi fade ti sara ndali ti mbi.