Read sango Kolose 4 Bible Online

Kolose 4 - sango bible

Kolose 4

¹Ala awa ti angbaa, ala sara na angbaa ti ala ye so ayeke mbirimbiri na ye so ayeke na legeni. Ayeke nzoni ala hinga atene, ala nga, ala yeke na wa ti ala na yayu.

²Ala ngba lakue ti sambela. Le ti ala akpengba na lege ti sambela ni, ala mu singila na Nzapa.

³Ala sambela nga mingi ndali ti e, tongaso si Nzapa azi na e lege ti fa tënë ti lo, ti fa tënë ti Christ so angba na hondengo ni. Biani, ndali ti tënë so laa mbi yeke na da ti kanga.

⁴Ala sambela si mbi lingbi ti fa nda ti tënë ni polele, na legeni.

⁵Ala duti na ndara na popo ti azo so ahinga Nzapa pepe; ala zia ngoi ti ala ahon senge senge pepe.

⁶Ayeke nzoni atënë ti yanga ti ala anzere nzerengo, asara nzoni na zo; ala hinga ti kiri tënë na zo na legeni.

⁷Tishike, ita ti e so mbi ye lo mingi ayeke fa na ala tënë kue na ndö ti dutingo ti mbi. Lo yeke sara kua na tere ti mbi tongana taa zo ti kua ti *Kota Gbia.

⁸Mbi tokua lo na ala gi titene lo tene tënë ti e na ala si lo mu ngangu na be ti ala.

⁹Onezime, taa ita ti e so mbi ye lo mingi, lo na Tishike laa ague; lo yeke mbeni zo ti ala. Fade a-ita use so ayeke fa na ala tënë ti aye so kue ayeke si ge.

¹⁰Aristarke so mbi na lo, e yeke na da ti kanga abara ala. Marc, sewa ti Barnabas abara nga ala. A mu lani yanga na ala ndali ti lo atene, tongana lo si na ndo ti ala, ala yamba lo nzoni.

¹¹Jésus, so mbeni iri ti lo ayeke Yustus, lo nga, lo bara ala. Gi azuife ota so e na ala e sara kua ndali ti *Kodro-gbia ti Nzapa so laa. A-ita so amu ngangu na be ti mbi mingi.

¹²Epafras so ayeke mbeni zo ti ala abara ala; lo yeke zo ti kua ti Jésus Christ, lo ngba ti tiri bira na lege ti sambela ndali ti ala. Lo yeke hunda na Nzapa titene ala luti ngangu, ala ga kangba na lege ti Yingo si ala yeke lakue nduru ti sara ye so kue be ti Nzapa aye.

¹³Biani, mbi yeke tene nzoni tënë ti lo, mbi tene: lo yeke sara kua ngangu ndali ti ala, ndali ti azo ti Laodise na ti Hierapolis.

¹⁴Luc, wanganga so e ye lo mingi, lo na Demas abara ala.

¹⁵Ala bara na e a-ita so kue ayeke na Laodise. Ala bara nga Nenfa na azo ti *Eglize so ayeke bongbi na da ti lo.

¹⁶Tongana ala diko mbeti so awe, ala tokua ni na Eglize ti Laodise titene azo ni kâ adiko nga ni. Ti ala azo ti Kolose, ala diko nga mbeti so alondo na Laodise si asi na ala so.

¹⁷Ti hunzi na tënë ti mbi, ala tene na Arshipe: “Sara hange na kua so Kota Gbia amu na mo! Mo sara ni nzoni.”

¹⁸Mbi Paul, mbi wani laa, mbi su atënë so: mbi bara ala. Ala dabe ti ala so mbi yeke na da ti kanga! Ayeke nzoni Nzapa asara nzoni be na ala!