Read sango 1 Tesalonike 4 Bible Online

1 Tesalonike 4 - sango bible

1 Tesalonike 4

¹Ti hunzi na ni, a-ita, e fa na ala lani lege ti dutingo so ala lingbi ti duti na ni si anzere na be ti Nzapa. Biani, ala duti tongaso awe. Me fadeso, e yeke hunda na ala si e voro ala na iri ti *Kota Gbia Jésus titene lege ti dutingo ti ala akiri aga nzoni ahon ti kozoni.

²Biani, ye so e fa na ala na peko ti yanga ti Kota Gbia Jésus, ala hinga ni awe.

³Ye so be ti Nzapa aye, ayeke titene ala ga azo so ayeke nde si ayeke nzoni kue, ala zia lege ti gingo wali wala gingo koli kirikiri.

⁴Ayeke nzoni zo oko oko ahinga ti mu wali na lege so ayeke nzoni kue nga na lege ti nengo tere.

⁵Ala sara ye na lege ti asioni nzara ti be ti ala pepe, tongana ti azo ti amara nde so ahinga Nzapa pepe.

⁶Na ya ti tënë so, ayeke nzoni zo oko asara mbeni ye ti songo be wala ye ti kirikiri na mba ti lo pepe. E tene tënë so na ala awe, e gboto mê ti ala na ndö ni awe: azo so asara mara ti asioni ye tongaso, fade Kota Gbia ayeke zia peko ni angba senge pepe.

⁷Biani, Nzapa airi e ti duti na ya ti ye ti potopoto pepe, me lo iri e ti ga azo so ayeke nde si ayeke nzoni kue.

⁸Ndani laa, zo so ake ti sara ye alingbi na atënë so, zo laa lo ke lo pepe, me lo ke Nzapa so ayeke mu Yingo-Vuru ti lo na ala.

⁹Tënë ti yengo tere na popo ti ala tongana a-ita, so ayeke ye titene mbeni zo akiri asu mbeti na ala na ndö ni pepe, ngbanga ti so Nzapa afa na ala lege ti yengo tere awe.

¹⁰Ye so ala yeke sara laa: ala ye a-ita ti ala, azo ti Christ ti sese ti Masedoane kue; me e yeke hunda na ala mingi, a-ita, titene ala kiri asara ahon so.

¹¹Ala gi lege ngangu ti duti na siriri, zo oko oko abaa lege ti akua ti lo wani, ala gi kobe ti yanga ti ala na lege ti kua ti maboko ti ala, alingbi na yanga so e mu na ala.

¹²Tongaso, na lege ti dutingo ti ala, fade azo so ama na be pepe ayeke ne ala; na ndö ni, ala yeke ku ti wara ye gi na maboko ti ambeni zo pepe.

¹³A-ita, e ye si ala hinga taa-tënë na ndö ti azo so akui awe, tongaso si vundu asara ala pepe tongana ti tanga ti azo so azia be ti ala ti ku mbeni ye pepe so.

¹⁴E ma na be so Jésus akui si azingo na kuâ awe. Legeoko nga, e ma na be so, azo so ama na be na Jésus si ala kui, fade Nzapa ayeke zingo ala na kuâ si lo yeke bongbi ala na Jésus na ndo oko.

¹⁵Baa, e yeke tene na ala mbeni tënë so *Kota Gbia atene na e: e so e yeke ngba ande na fini ngbii asi na lango ti gango ti Kota Gbia, fade e yeke hon kozo ti azo so akui awe so pepe.

¹⁶Fade Nzapa ayeke mu yanga na kota go, azo ayeke ma go ti makonzi ti *a-ange nga na tatalita ti Nzapa. Tongaso, Kota Gbia wani ayeke londo na yayu ti zu. Azo so ama na be na Christ si akui so, ala laa ayeke zingo na kuâ kozo.

¹⁷Na pekoni, e so e yeke ngba ande na fini, fade a yeke mu e na ala kue ti gue na e na ya ti ambinda titene e tengbi na Kota Gbia na nduzu kâ. Tongaso, e yeke duti na tere ti Kota Gbia lakue lakue.

¹⁸Tongaso, ala mu ngangu na be ti ala na popo ti ala na lege ti atënë so.