Read sango Josué 10 Bible Online

Josué 10 - sango bible

Josué 10

¹Adoni-Sedek, gbia ti Jérusalem, ama a tene, Josué amu gbata ti Ai si lo buba ni kue. Lo sara na gbata ti Ai na gbia ni gi mara ti ye so lo sara na gbata ti Jéricho nga na gbia ni. Lo ma nga atene, azo ti gbata ti Gabaon na azo ti Israel aleke tënë ti siriri si ala yeke lango ndo oko.

²Na mango tënë so, kota mbeto agbu azo ti Jérusalem, ngbanga ti so Gabaon ayeke mbeni kota gbata so akono ahon gbata ti Ai. Gabaon ayeke nga mbeni kota gbata so ahon agbata so agbia ayeke na li ni; aturugu kue ti gbata ni ayeke angangu zo ti bira.

³Adoni-Sedek, gbia ti Jérusalem, atokua ndo na Hoham, gbia ti Hebron na Piram, gbia ti Yarmut, na Yafia, gbia ti Lakish nga na Debir, gbia ti Eglon. Lo tene na ala:

⁴“Ala ga, ala mu maboko na mbi titene e tiri bira na gbata ti Gabaon, ngbanga ti so azo ti gbata ni na Josué nga na azo ti Israel aleke tënë ti siriri.”

⁵Agbia oku ti Amori, so ti tene gbia ti Jérusalem, gbia ti Hebron, gbia ti Yarmut, gbia ti Lakish na gbia ti Eglon ama tere; ala na aturugu ti ala kue alondo, ala gue, angoro gbata ti Gabaon si ala tiri bira na gbata ni.

⁶Azo ti Gabaon atokua azo na Josué so ayeke na bâbâ ti Gilgal ti tene na lo, atene: “Mo zia pepe ti mu maboko na e, azo ti kua ti mo. Ga hio mo mu maboko na e, mo soo e na kuâ! Biani, agbia kue ti Amori so ayeke na sese ti ahoto ama tere ti tiri bira na e.”

⁷Tongaso Josué alondo na Gilgal, lo na aturugu ti lo kue nga na angangu zo ti bira kue.

⁸*KOTA GBIA atene na Josué: “Sara mbeto pepe! Mbi zia ala na maboko ti mo awe; zo oko na popo ti ala ti gbu le ni na mo ayeke daa pepe.”

⁹Josué alondo na Gilgal, lo tambula bi bi bi; lo ti na ndö ti azo ti mara ti Amori, zo oko ahinga gango ti lo pepe.

¹⁰KOTA GBIA asara si azo ti mara ti Amori akpe kirikiri na dawa ti azo ti Israel; azo ti Israel afâ ala gbani gbani na gbata ti Gabaon. Ala tumba peko ti ala na lege so ague na nduzu, na Bet-Horon si ala fâ ala ngbii asi na Azeka nga na Makeda.

¹¹Na ndembe so ala yeke kpe na dawa ti azo ti Israel si ala londo na Bet-Horon ti zu na gbe ni, KOTA GBIA asara si angbongboro *pembe ti bekpa alondo na nduzu kâ atuku na ndö ti ala ngbii ala si na ni na Azeka si ala kui. Ala so apembe ti bekpa afâ ala ayeke mingi ahon ala so azo ti Israel afâ ala na yongoro zeme.

¹²Tongaso, na lango so KOTA GBIA azia azo ti mara ti Amori na maboko ti azo ti Israel, Josué ahunda mbeni ye na KOTA GBIA, na le ti azo ti Israel kue, atene: “Lâ, mo luti na ndö ti Gabaon! Nze, mo luti na ndö ti popo-hoto ti Ayalon!”

¹³Lâ aluti, nze nga aluti na ndo oko ngbii azo ti Israel ahon ndö ti awato ti ala. Tongana ti so a su na ya ti “Mbeti ti zo ti mbirimbiri”, na ya ti lango oko kue, lâ aluti na le ti nduzu na ndo oko, lo kiri lo hon pepe ngbii asi na lakui.

¹⁴Mbeni lango tongana ti so ade ti duti daa pepe, ataa kozoni, ataa na pekoni. Na lango ni so, KOTA GBIA asara ye alingbi na tënë so zo ahunda na lo, ngbanga ti so KOTA GBIA wani laa atiri fade bira ndali ti azo ti Israel.

¹⁵Na pekoni, Josué na azo ti Israel kue akiri na ya ti bâbâ, na Gilgal.

¹⁶Andaa agbia oku ti Amori akpe fade si ala honde tere ti ala na ya ti du ti têne so ayeke na Makeda.

¹⁷Azo aga atene na Josué, atene: “A wara agbia oku so, ala honde tere ti ala na ya ti du ti têne so ayeke na Makeda.”

¹⁸Josué atene: “Ala pusu akota têne akanga na yanga ti du ni; ala zia azo aluti ti bata du ni.

¹⁹Me ti ala, ala luti pepe, ala tumba peko ti awato ti ala. Ala kanga lege na awato ni titene ala li na ya ti agbata ti ala pepe. Biani, *KOTA GBIA Nzapa ti ala, azia awato ni na maboko ti ala awe.”

²⁰So Josué na azo ti Israel afâ azo ti mara ti Amori gbani gbani, angba kete ala hunzi kue. Ambeni oko oko so angba akpe si ala li na ya ti agbata ti ala so a sara angangu gbagba na tere ni.

²¹Na pekoni, azo ti Israel kue akiri na siriri na tere ti Josué, na ya ti bâbâ so ayeke na Makeda. Tongaso zo oko ti kiri ti zi yanga na tere ti azo ti Israel ayeke daa pepe.

²²Na pekoni, Josué atene: “Ala zi yanga ti du ti têne ni, ala sigigi na agbia oku so na mbi.”

²³Azo ni asara ye so lo hunda si ala sigigi na agbia oku so na lo: gbia ti Jérusalem, gbia ti Hebron, gbia ti Yarmut, gbia ti Lakish na gbia ti Eglon.

²⁴Gi so a sigigi na agbia oku so si a gue na ala na Josué, lo bongbi azo ti Israel kue si lo tene na amakonzi so ayeke na li ti aturugu, ala so lo na ala ayeke tambula, lo tene: “Ala ga nduru, ala do go ti agbia so!” Amakonzi ni aga nduru si ala do go ti agbia ni.

²⁵Josué atene na ala: “Ala sara mbeto pepe, ala woko pepe! Ala gbu ngangu, ala sara ye ti koli! Fade KOTA GBIA ayeke sara gi mara ti ye so na awato ti ala so kue ala yeke tiri bira na ala.”

²⁶Na pekoni, Josué afâ agbia ni si lo kanga kuâ ti ala na nduzu na tere ti akeke oku. Ala ngba kâ ngbii asi na lakui.

²⁷Na lakui, Josué amu yanga titene a zi ala na tere ti akeke ni, a gue, a bi ala na ya ti du ti têne so agbia ni ahonde fade tere ti ala daa so. A zia akota têne na yanga ti du ni ti kanga na ni; atêne ni angba ngbii asi laso.

²⁸Gi na lango ni so, Josué amu gbata ti Makeda si lo fâ gbia ni na azo ti gbata ni kue; lo zia zo oko angba na fini pepe. Mara ti ye so lo sara na gbia ti Jéricho so, gi ni laa lo sara na gbia ti Makeda.

²⁹Josué na azo ti Israel kue alondo na Makeda, ala gue na Libna si ala tiri bira na gbata ni.

³⁰*KOTA GBIA azia gbata ni na gbia ni na maboko ti azo ti Israel; azo ti Israel afâ ala na azo so kue ayeke na gbata ni, ala zia zo oko angba na fini pepe. Mara ti ye so ala sara na gbia ti Jéricho so, gi ni laa ala sara na gbia ti Libna.

³¹Josué na azo ti Israel kue alondo na Libna, ala gue na Lakish. Ala ngoro gbata ni si ala tiri bira na gbata ni.

³²KOTA GBIA azia Lakish na maboko ti azo ti Israel, ala mu gbata ni na use lango ni. Azo ti Israel afâ azo ti gbata ni kue, zo oko angba na fini pepe, tongana ti so ala sara na Libna.

³³Horam, gbia ti Gezer, ague ti mu maboko na azo ti Lakish. Me Josué afâ lo na aturugu ti lo kue; lo zia zo oko angba na fini pepe.

³⁴Josué na azo ti Israel kue alondo na Lakish, ala gue na Eglon. Ala ngoro gbata ni si ala tiri bira na gbata ni.

³⁵Gi na lango ni so, ala mu gbata ni si ala fâ azo ti gbata ni kue tongana ti so ala sara na Lakish.

³⁶Josué na azo ti Israel kue alondo na Eglon, ala gue na Hebron si ala tiri bira na gbata ni.

³⁷Ala mu gbata ni si ala fâ gbia ni na azo ti gbata ni. Ala mu nga agbata so angoro Hebron si ala fâ azo ti agbata ni. Tongana ti so Josué asara na Eglon, lo buba gbata ni kue si lo fâ azo ti gbata ni kue, lo zia zo oko angba na fini pepe.

³⁸Na pekoni, Josué na azo ti Israel kue akiri, ala gue na Debir si ala tiri bira na gbata ni.

³⁹Ala mu gbata ni na gbia ni nga na agbata so kue angoro Debir. Ala fâ azo ti agbata ni kue, ala zia zo oko angba na fini pepe. Ye so Josué asara na agbata ti Hebron na ti Libna na agbia ti agbata ni, gi mara ni laa lo sara na gbata ti Debir nga na gbia ni.

⁴⁰Josué atiri bira si lo mu sese ni kue: sese ti ahoto, sese ti mbage ti Mbongo, ti *Kodro-ti-gbeni, sese so ayeke na tere ti ahoto. Lo fâ agbia ni, lo zia zo oko angba na fini pepe. Lo fâ aye so ayeke na fini, lo hunzi ala tongana ti so KOTA GBIA, Nzapa ti Israel amu yanga na lo.

⁴¹Josué amu asese ni, ti londo na Kades-Barnea ngbii asi na Gaza. Lo mu nga sese ti Goshen kue ngbii asi na Gabaon.

⁴²Josué amu asese ni so nga na agbia ni gi na ya ti bira oko, ngbanga ti so KOTA GBIA, Nzapa ti Israel atiri bira ni ndali ti azo ti Israel.

⁴³Na pekoni, Josué na azo ti Israel kue akiri na ya ti bâbâ, na Gilgal.