Read sango Josué 11 Bible Online

Josué 11 - sango bible

Josué 11

¹So Yabin, gbia ti Hasor ama tënë ti asongo benda ti Josué, lo tokua azo na Yobab, gbia ti Madon, na gbia ti Shimron nga na gbia ti Akeshaf.

²Lo tokua nga na agbia so ayeke na sese ti ahoto so ayeke na Banga, na ala so ayeke na popo-hoto ti Jourdain, na mbage ti Mbongo ti kota ngu ti Genezaret, na ala so ayeke na *Kodro-ti-gbeni, na ala so ayeke na sese ti lando ti Dor na mbage ti Do.

³Lo tokua nga na azo ti Kanaan so ayeke na To nga na ala so ayeke na Do ti Jourdain, azo ti mara ti Amori, ala ti mara ti Het, ti Perizi, ti Yebus so ayeke na sese ti ahoto, azo ti mara ti Hivi so ayeke na gbe ti hoto ti Hermon, na sese ti Mispa.

⁴Agbia so kue alondo, ala na aturugu ti ala kue, ala mu lege ti gue. Ala wu mingi tongana mbutu ti yanga ti kota ngu-ingo. Ala yeke na ambarata nga na apusu ti mbarata gbani gbani.

⁵Agbia so kue awara tere si ala gue, asara bâbâ ti ala na tere ti ngu ti Merom, ti tiri bira na azo ti Israel.

⁶*KOTA GBIA atene na Josué: “Sara mbeto ti ala pepe, ngbanga ti so kekereke, gi na oko ngbonga so, mbi yeke zia azo ni kue na maboko ti azo ti Israel, nduru na kuâ. Fade mo yeke fâ akamba ti ngbongo ti ambarata ti ala si mo yeke gbi apusu ti mbarata ti ala.”

⁷Josué na aturugu ti lo ague, ati na ndö ti awato ti ala na tere ti ngu ti Merom; zo oko hinga gango ti ala pepe.

⁸KOTA GBIA azia ala na maboko ti azo ti Israel si azo ti Israel ahon ndö ti ala. Ala tumba peko ti ala na Banga ngbii asi na Sidon, kota gbata; ala tumba peko ti ala ngbii asi na Misrefot-Maim, ngbii asi na popo-hoto ti Mispe, na To. Ala fâ ala kue, ala zia zo oko angba na fini pepe.

⁹Josué asara na ala alingbi na yanga so KOTA GBIA amu na lo: lo fâ akamba ti ngbongo ti ambarata ti ala si lo gbi apusu ti mbarata ti ala.

¹⁰Na ngoi ni so, Josué akiri, lo mu gbata ti Hasor so ayeke ando kota gbata ti akodro-gbia kue ti mbage ti Banga. Lo fâ gbia ti gbata ni

¹¹na azo ti gbata ni kue, lo hunzi ala; ye so kue ayeke na fini angba pepe; lo gbi nga gbata ni.

¹²Josué amu agbata kue ti agbia so nga na agbia ni kue. Lo fâ ala kue, lo hunzi ala tongana ti so Moïse, zo ti kua ti *KOTA GBIA, amu yanga ando so.

¹³Me agbata so kue ayeke na ndö ti ahoto, azo ti Israel agbi ni pepe, gi gbata ti Hasor oko laa Josué agbi ni.

¹⁴Azo ti Israel amu akungba na anyama so kue ala gbu na peko ti bira na ya ti agbata ni. Me ala fâ azo ti agbata ni kue, ahunzi ala; ye so kue ayeke na fini, ala zia ni angba pepe.

¹⁵KOTA GBIA amu ando yanga na Moïse, zo ti kua ti lo, na ndö ti tënë so. Moïse amu nga na Josué si Josué asara ye alingbi na ni. Lo sara ye so kue KOTA GBIA amu yanga na Moïse ti sarango ni.

¹⁶Tongaso Josué amu sese ni kue. Lo mu sese ti ahoto, sese ti mbage ti Mbongo, sese ti Goshen kue, *Kodro-ti-gbeni, popo-hoto ti Jourdain, sese so ahoto ayeke daa nga na alando ti mbage ti Banga.

¹⁷Ti londo na hoto so iri ni Li-mbombo, so ayeke na mbage ti Seir, ngbii asi na Baal-Gad so ayeke na popo-hoto ti Liban, na gbe ti hoto ti Hermon, lo mu agbia ti asese ni kue si lo fâ ala.

¹⁸Josué atiri bira na agbia so na ya ti alango mingi.

¹⁹Mbeni gbata oko so aleke tënë ti siriri na popo ti lo na azo ti Israel ayeke daa pepe, gi azo ti mara ti Hivi so ayeke na gbata ti Gabaon oko awe. Tanga ti agbata ni kue, azo ti Israel amu ni na lege ti bira.

²⁰Biani, KOTA GBIA asara titene be ti azo ti kodro ni akpengba si ala ngba gi ti tiri bira na azo ti Israel. Tongaso si azo ti Israel abaa mawa ti ala pepe, ala fâ azo ni kue, ahunzi ala tongana ti so *KOTA GBIA amu yanga na Moïse.

²¹Na ngoi ni so, Josué ague ti tiri bira na azo ti mara ti Anak so ayeke na sese ti ahoto, ala so ayeke na Hebron, na Debir, na Anab, na ala ti ndö ti ahoto ti Juda na ti Israel kue. Josué afâ azo ni kue si lo buba agbata ti ala kue.

²²Mbeni zo ti mara ti Anak oko angba na sese ti Israel pepe. Me ambeni angba na ya ti agbata ti Gaza, ti Gat nga na ti Asdod.

²³Josué amu sese ni kue alingbi na tënë so KOTA GBIA atene ando na Moïse. Na pekoni, Josué amu ni na azo ti Israel titene aga ti ala si lo kangbi ni na lege ti amara ti ala. Tongaso, sese ni aduti na siriri, bira ayeke daa pepe.