Read sango Josué 14 Bible Online

Josué 14 - sango bible

Josué 14

¹Baa asese so a kangbi na azo ti Israel titene aga ti ala na sese ti Kanaan laa. Wayango-sandaga Elazar, na Josué, molenge ti Nune na amakonzi ti asewa ti amara ti Israel laa akangbi ni na ala.

²A bi mbeni ye ti baa lege so a yeke kangbi sese ni na amara gumbaya na ndambo so ade ti wara sese pepe. Ala sara ni tongana ti so *KOTA GBIA amu yanga na Moïse.

³Moïse amu lani sese na amara use na ndambo na mbage ti ngu ti Jourdain kâ awe titene aga ti ala. Me na azo ti mara ti Lévi, lo mu sese na ala pepe.

⁴Biani, amolenge ti Joseph akangbi popo ti ala na amara use: mara ti Manase na mara ti Efraim. A mu mbeni mbage ti sese ni oko na azo ti mara ti Lévi pepe, a mu na ala gi akodro titene ala duti daa, na ando ti tengo pere so ayeke na tere ni ndali ti anyama ti ala na akungba ti ala.

⁵Gi tongaso laa azo ti Israel akangbi asese ni tongana ti so KOTA GBIA amu yanga na Moïse.

⁶Mbeni lâ, azo ti mara ti Juda aga awara Josué na Gilgal. Kaleb, molenge ti Yefune, zo ti kete mara ti Kenaz atene na lo, atene: “Mo hinga tënë so KOTA GBIA atene na Moïse, zo ti kua ti Nzapa, na ndö ti mbi na mo, kâ na Kades-Barnea.

⁷Mbi yeke lani na ngu baleosio si Moïse, zo ti kua ti KOTA GBIA, atokua mbi na Kades-Barnea titene mbi gue, mbi *bembe ndo na ya ti kodro ni. Tongana mbi kiri, mbi fa na lo peko ti ye so kue mbi baa kâ na taa legeni.

⁸A-ita ti mbi so mbi na ala e gue, asara si be ti azo kue awoko. Me ti mbi, mbi mu peko ti KOTA GBIA, Nzapa ti mbi, na be ti mbi kue.

⁹Na lango ni so, Moïse adeba yanga ti lo, atene: ‘Sese so gere ti mo ado ni so ayeke ga ande ti mo na amolenge ti mo biani biani, ngbanga ti so mo mu peko ti KOTA GBIA, Nzapa ti mbi na be ti mo kue.’

¹⁰Fadeso, a sara ngu baleosio na oku awe so KOTA GBIA atene tënë so na Moïse. Lo tene tënë ni na ndembe so azo ti Israel ayeke tambula na benyama. Ti londo na ndembe ni so ngbii asi laso, KOTA GBIA abata mbi na fini alingbi na zendo ti lo; fadeso mbi yeke na ngu balemiombe na oku.

¹¹Ngangu so mbi yeke na ni laso ayeke tongana ti so mbi yeke na ni ando, na ndembe so Moïse atokua mbi ti bembe ndo so. Ngangu so mbi yeke na ni ando angba fadeso, tongaso mbi lingbi ti gue ti tiri bira wala ti sara mbeni kua nde senge.

¹²Tongaso, mu na mbi sese ti ahoto so KOTA GBIA amu na mbi zendo ni na ngoi ni so. Na ngoi ni so, mo ma nga atene, azo ti mara ti Anak ayeke lango na ya ti akota gbata so angangu gbagba ayeke na tere ni. Tongana KOTA GBIA ayeke na mbi, fade mbi yeke mu sese ni tongana ti so lo mu zendo ni.”

¹³Josué asara tufa na ndö ti Kaleb, molenge ti Yefune si lo mu na lo gbata ti Hebron titene aga ti lo.

¹⁴Ndani laa, Kaleb, molenge ti Yefune, zo ti kete mara ti Kenaz awara gbata ti Hebron si angba ti lo ngbii asi laso. Lo wara ni, ngbanga ti so lo mu lani peko ti KOTA GBIA, Nzapa ti Israel na be ti lo kue.

¹⁵Iri ti Hebron ayeke ando Kiriat-Arba. Arba ayeke ando mbeni koli so ayeke kota zo mingi na popo ti azo ti mara ti Anak. Na pekoni, sese ni aduti na siriri, bira ayeke daa pepe.