Read sango Josué 18 Bible Online

Josué 18 - sango bible

Josué 18

¹Na peko ti so azo ti Israel amu sese ni awe, ala kue abongbi tere ti ala na Silo. Kâ, ala kpo na nduzu da ti bongo so Nzapa na azo ti lo ayeke wara tere daa.

²Me na popo ti azo ti Israel, amara mbarambara ade ti wara ti ala ambage ti sese ni pepe titene aga ti ala.

³Josué atene na ala, atene: “Ala yeke ku ngbii asi lawa si ala yeke gue ti mu sese so *KOTA GBIA, Nzapa ti akotara ti ala, amu na ala so?

⁴Ala soro azo ota na ya ti mara oko oko; fade mbi yeke tokua azo ni titene ala gue, abaa sese so ayeke ga ti amara ti ala. Na pekoni, ala yeke kiri ti fa na mbi gi aye so ala baa kâ si ala su na mbeti so.

⁵Fade ala yeke kangbi ya ti sese ni mbarambara. Azo ti mara ti Juda ayeke duti na sese ti ala na mbage ti Mbongo, ala ti Joseph ayeke duti na sese ti ala, na mbage ti Banga.

⁶Tongaso, ala su na mbeti tënë ti asese mbarambara so, ala ga ge afa ni na mbi. Na dawa ti Nzapa, KOTA GBIA ti e, mbi yeke bi mbeni ye ti baa lege so mbi yeke kangbi sese ni na amara ti ala oko oko.

⁷Me ti azo ti mara ti Lévi, ala yeke wara sese pepe ti ga ti ala. Biani, ti ala ye so ala wara ayeke kua ti yango *sandaga na KOTA GBIA. Ti azo ti mara ti Gad, ti Ruben na ti ndambo ti mara ti Manase, ala wara ti ala sese ni titene aga ti ala na mbage ti To, na mbage ti ngu ti Jourdain awe. Moïse, zo ti kua ti KOTA GBIA laa amu ni na ala.”

⁸Akoli so a soro ala ti gue ti baa sese ni so aleke tere ti gue. Kozo titene ala gue, Josué amu yanga na ala, atene: “Ala gue, atambula na sese ni, ala su na mbeti aye so ala baa kâ. Na pekoni, ala kiri na tere ti mbi. Ge na Silo, mbi yeke bi mbeni ye na dawa ti KOTA GBIA ti baa lege so mbi yeke kangbi sese ni na amara oko oko.”

⁹Akoli so ague, ahon na ya ti sese ni kue si ala su na mbeti aye so ala baa kâ, alingbi na sese mbarambara so ala kangbi ni so; ala su nga iri ti agbata ni. Na pekoni, ala kiri na tere ti Josué na ya ti bâbâ so ayeke na Silo.

¹⁰Na Silo, Josué abi mbeni ye na dawa ti KOTA GBIA ti baa lege so lo yeke kangbi sese ni na azo ti Israel. Lo kangbi sese ni na ala alingbi na amara ti ala oko oko kue.

¹¹Kozo sese so a bi mbeni ye si afa ni, a mu na azo ti mara ti Benjamin alingbi na akete mara ti ala. Sese so a mu na ala ayeke na popo ti sese ti azo ti mara ti Juda na ti azo ti mara ti Joseph.

¹²Na mbage ti Banga, katikati ti sese ti ala alondo na ngu ti Jourdain, ague na mbage ti nduzu, na Banga ti Jéricho, akiri ahon na sese so ahoto ayeke daa na mbage ti Do si ague, asi na benyama, na Bet-Aven.

¹³Katikati ni alondo na ndo so asi na Luz, na Mbongo ti Luz ni, so a iri ni nga Betel. Na pekoni, katikati ni azu ague na Atrot-Adar, na ndö ti hoto so ayeke na Mbongo ti Bet-Horon-ti-gbeni.

¹⁴Na Do ti hoto ni, katikati ni angoro ti gue na mbage ti Mbongo si asi na Kiriat-Baal, so a iri ni nga Kiriat-Yearim, so ayeke gbata ti azo ti Juda. So katikati ni na mbage ti Do laa.

¹⁵Katikati ni na mbage ti Mbongo alondo na Kiriat-Yearim, ague na mbage ti Do si asi na ndo so ali ti ngu ti Neftoa ayeke daa.

¹⁶Katikati ni alondo na ndo so, azu na tere ti hoto so ayeke baa le na popo-hoto ti Hinom, na Banga ti popo-hoto ti azo ti mara ti Refa. Katikati ni ahon na popo-hoto ti Hinom ni, na tere ti hoto ti azo ti mara ti Yebus si azu ague ngbii asi na En-Rogel.

¹⁷Angoro na mbage ti Banga si ague na mbage ti En-Shemesh nga na Gelilot, so ayeke baa le na lege so ayeke gue na nduzu, na Adumim. Na pekoni, azu ague na ndo so têne ti Bohan ayeke daa; Bohan ayeke molenge ti Ruben.

¹⁸Na pekoni, katikati ni ahon na Banga ti hoto so abaa le na popo-hoto ti Jourdain si azu ti gue na mbage ti popo-hoto ni.

¹⁹Katikati ni akiri ahon na mbage ti Banga ti Bet-Hogla si asi na yanga ti kota ngu ti Gba-ti-ingo, na ndo so ngu ti Jourdain ayeke tuku na ya ti kota ngu ti Gba-ti-ingo ni. So katikati ni na mbage ti Mbongo laa.

²⁰Ngu ti Jourdain laa ayeke katikati ti sese ni na mbage ti To. Akatikati ti sese so a mu na azo ti mara ti Benjamin titene aga ti ala alingbi na akete mara ti ala laa.

²¹Agbata ti azo ti mara ti Benjamin na lege ti akete mara ti ala ayeke so: Jéricho, Bet-Hogla, Emek-Kesis,

²²Bet-Araba, Semaraim, Betel,

²³Avim, Para, Ofra,

²⁴Kefar-Amona, Ofni na Geba, so ti tene agbata baleoko na use na akete kodro so ayeke na tere ni.

²⁵Ambeni gbata ni ayeke so: Gabaon, Rama, Beerot,

²⁶Mispe, Kefira, Mosa,

²⁷Rekem, Irpeel, Tarala,

²⁸Sela, Elef, gbata ti azo ti Yebus, so ti tene Jérusalem, Gibea na Kiriat-Yearim, so ti tene agbata baleoko na osio na akete kodro so ayeke na tere ni. So ayeke sese so aga ye ti azo ti Benjamin alingbi na akete mara ti ala laa.