Read sango Josué 21 Bible Online

Josué 21 - sango bible

Josué 21

¹Amakonzi ti asewa ti mara ti Lévi aga awara wayango-sandaga Elazar, lo na Josué, molenge ti Nune nga na amakonzi ti asewa ti amara ti Israel

²na Silo, na sese ti Kanaan. Ala tene na azo ni, atene: “*KOTA GBIA amu yanga na lege ti Moïse titene ala mu na e agbata titene e duti daa; ala mu nga ando ti tengo pere so ayeke nduru na e ndali ti anyama ti e.”

³Tongaso azo ti Israel asoro ambeni gbata na sese ti ala nga na ando ti tengo pere ndali ti anyama ti ala. Ala mu ni na azo ti mara ti Lévi alingbi na yanga so KOTA GBIA amu.

⁴A bi mbeni ye ti baa lege so alingbi ti kangbi agbata ni na ala. Ye ni afa azo ti kete mara ti Kehat so ayeke na popo ti azo ti mara ti Lévi. Na popo ti azo ti mara ti Lévi ni, *ahale ti wayango-sandaga Aaron awara ti ala agbata baleoko na ota na lege ti bingo ye ni. Agbata ni ayeke na sese ti Juda, ti Siméon na ti Benjamin.

⁵Tanga ti azo ti Kehat ni awara ti ala agbata baleoko na sese ti Efraim, ti Dan na ti ndambo ti mara ti Manase so ayeke na Do ti ngu ti Jourdain.

⁶Akete mara ti Gershon awara ti ala agbata baleoko na ota na sese ti Isakar, ti Aser, ti Neftali na ti ndambo ti mara ti Manase so ayeke na Bashan.

⁷Azo ti kete mara ti hale ti Merari awara agbata baleoko na use na sese ti Ruben, ti Gad na ti Zabulon.

⁸Na lege ti bingo ye ni, azo ti Israel amu na ahale ti Lévi agbata so nga na ando ti tengo pere ndali ti anyama ti ala, alingbi na yanga so KOTA GBIA amu na lege ti Moïse.

⁹A bi ye ni si afa ahale ti Aaron kozoni. Iri ti agbata so a mu na ahale ti Aaron so ayeke azo ti kete mara ti Kehat, molenge ti Lévi na sese ti Juda na ti Siméon ayeke so:

¹¹a mu na ala Kiriat-Arba, so a iri ni nga Hebron, na sese ti Juda, ndo so ahoto ayeke daa. Arba ayeke kotara ti azo ti mara ti Anak. A mu na ala gbata ni na ando ti tengo pere so ayeke nduru na ala ndali ti anyama ti ala.

¹²Me ayaka na akete kodro so ayeke na tere ti gbata ni, a mu ni na Kaleb, molenge ti Yefune titene aga ti lo.

¹³A mu na ahale ti wayango-sandaga Aaron gbata ti Hebron, gbata so azo so afâ zo na mbana pepe ayeke kpe daa ti bata tere ti ala. A mu na ala gbata ni nga na ando ti tengo pere ndali ti anyama ti ala. A mu nga na ala Libna,

¹⁴Yatir, Eshtemoa,

¹⁵Holon, Debir,

¹⁶Ashan, Yuta na Bet-Shemesh, so ti tene agbata gumbaya na ando ti tengo pere ndali ti anyama ti ala; agbata ni kue ayeke na sese ti Juda na ti Siméon.

¹⁷Na sese ti azo ti mara ti Benjamin, a mu na ala Gabaon, Geba,

¹⁸Anatot na Alemet, so ti tene agbata osio na ando ti tengo pere ndali ti anyama ti ala.

¹⁹Agbata ti awayango-sandaga so ayeke amolenge ti Aaron, wungo ni ayeke baleoko na ota nga na ando ti tengo pere ndali ti anyama ti ala.

²⁰Na lege ti bingo ye ni, azo ti akete mara ti Lévi, so ayeke tanga ti ahale ti Kehat awara ti ala agbata na sese ti azo ti mara ti Efraim:

²¹Sishem, gbata so azo so afâ zo na mbana pepe ayeke kpe daa ti bata tere ti ala; Sishem ni ayeke na sese ti Efraim, ndo so ahoto ayeke daa, Gezer,

²²Kibsaim na Bet-Horon, so ti tene agbata osio na ando ti tengo pere ndali ti anyama ti ala.

²³Na sese ti azo ti mara ti Dan, a mu na ala agbata osio na ando ti tengo pere ndali ti anyama ti ala; agbata ni ayeke so: Elteke, Gibeton,

²⁴Ayalon na Gat-Rimon.

²⁵Na sese ti ndambo ti mara ti Manase, a mu na ala Taanak na Ibleam nga na ando ti tengo pere ndali ti anyama ti ala, so ti tene agbata use.

²⁶Wungo ti agbata so kue a mu na tanga ti akete mara ti hale ti Kehat ayeke baleoko nga na ando ti tengo pere ndali ti anyama ti ala.

²⁷A mu na ambeni zo ti kete mara ti Lévi, so ayeke asewa ti Gershon agbata use nga na ando ti tengo pere ndali ti anyama ti ala; agbata ni na ando ni ayeke na sese ti ndambo ti mara ti Manase, na To ti ngu ti Jourdain. Agbata ni ayeke so: Golan, gbata so azo afâ zo na mbana pepe ayeke kpe daa ti bata tere ti ala, na sese ti Bashan, nga na gbata ti Beshetera.

²⁸Na sese ti azo ti mara ti Isakar, a mu na ala agbata osio na ando ti tengo pere ndali ti anyama ti ala. Agbata ni ayeke so: Kishion, Dabrat,

²⁹Yarmut na En-Ganim.

³⁰Na sese ti azo ti mara ti Aser, a mu na ala agbata osio na ando ti tengo pere ndali ti anyama ti ala. Agbata ni ayeke so: Mishal, Abdon,

³¹Helkat na Rehob.

³²Na sese ti azo ti mara ti Neftali, a mu na ala agbata ota na ando ti tengo pere ndali ti anyama ti ala. Agbata ni ayeke so: Kedesh, gbata so azo so afâ zo na mbana pepe ayeke kpe daa ti bata tere ti ala, na sese ti Galile, nga na gbata ti Hamot-Dor na Kartan.

³³Wungo ti agbata ti azo ti mara ti Gershon na akete mara ti ala kue ayeke baleoko na ota nga na ando ti tengo pere ndali ti anyama ti ala.

³⁴Ti tanga ti azo ti mara ti Lévi, so ala yeke ahale ti Merari, a mu na ala agbata osio na ando ti tengo pere ndali ti anyama ti ala na sese ti Zabulon. Agbata ni ayeke so: Yokneam, Karta,

³⁵Dimna na Nahalal.

³⁶Na sese ti azo ti mara ti Ruben, so ayeke na To ti ngu ti Jourdain si abaa le na Jéricho, a mu na ala agbata osio na ando ti tengo pere ndali ti anyama ti ala. Agbata ni ayeke so: Beser, gbata so azo so afâ zo na mbana pepe ayeke kpe daa ti bata tere ti ala si ayeke na benyama, nga na Yahas.

³⁷A mu nga na ala Kedemot na Mefaat.

³⁸Na sese ti azo ti mara ti Gad, a mu na ala agbata osio nga na ando ti tengo pere ndali ti anyama ti ala. Agbata ni ayeke so: Ramot, gbata so azo so afâ zo na mbana pepe ayeke kpe daa ti bata tere ti ala, na sese ti Galaad; Mahanaim,

³⁹Heshebon na Yazer.

⁴⁰Agbata so a mu na azo ti kete mara ti Lévi so ayeke ahale ti Merari na lege ti bingo ye ni, wungo ti agbata ni kue ayeke baleoko na use.

⁴¹Agbata so a mu na ahale ti Lévi na sese ti azo ti Israel, wungo ni kue ayeke baleosio na miombe.

⁴²Agbata oko oko so kue, ando ti tengo pere ndali ti anyama angoro ni.

⁴³KOTA GBIA amu na azo ti Israel sese so kue lo deba yanga ti lo ti mungo na akotara ti ala. Ala mu ni aga ti ala si ala duti daa biani biani.

⁴⁴KOTA GBIA amu ala lege ti wu tere na ya ti sese ni kue, tongana ti so lo deba yanga ti lo lani na akotara ti ala. KOTA GBIA azia awato ti ala kue na maboko ti ala, mbeni oko alingbi ti gbu le ni na ala pepe.

⁴⁵Tongaso anzoni tënë so kue KOTA GBIA atene ando na azo ti Israel, ye kue asi alingbi na ni; mbeni tënë oko so peko ni angba senge ayeke daa pepe.