Read sango Josué 23 Bible Online

Josué 23 - sango bible

Josué 23

¹Na peko ti so *KOTA GBIA azi azo ti Israel na maboko ti awato ti ala so angoro ala, lo mu na ala siriri aninga awe. Josué aga mbakoro si ngu ti lo ahon mingi awe.

²Lo iri azo ti Israel kue, *akangba ti ala, amakonzi ti ala, awafango-ngbanga ti ala na awafango-ndia ti ala si lo tene na ala: “Mbi ga mbakoro si ngu ti mbi ahon mingi awe.

³Ala wani, ala baa ye so kue KOTA GBIA, Nzapa ti ala asara na amara so kue ndali ti ala. KOTA GBIA, Nzapa ti ala laa atiri bira ndali ti ala.

⁴Ala baa, na lege ti mbeni ye so mbi bi, mbi kangbi sese na popo ti amara ti ala; sese ni ayeke lani ti amara so mbi fâ ala, ti londo na ngu ti Jourdain, na mbage ti To ngbii asi na kota ngu-ingo ti Mediterane, na mbage ti Do.

⁵Fade KOTA GBIA Nzapa ti ala wani ayeke tumba azo ni, lo yeke sara titene azo ni akpe na dawa ti ala si ala azo ti lo, ala yeke mu sese ni tongana ti so KOTA GBIA Nzapa ti ala amu zendo ni na ala.

⁶Me gi ye oko, ala mu be ti ala kue ti sara ye alingbi na tënë so kue a su na ya ti mbeti ti *Ndia ti Moïse. Ala zia lege ni ti gue mbage na mbage pepe.

⁷Amara so angba na popo ti ala so, ala sara beoko na ala pepe, ala sambela anzapa ti azo ni pepe, ala deba na iri ti anzapa ni pepe, ala kuku na gbe ti anzapa ni pepe, ala voro ala pepe.

⁸Ala ngba gi na tere ti KOTA GBIA, Nzapa ti ala tongana ti so ala sara ngbii asi laso so.

⁹KOTA GBIA atumba na dawa ti ala amara so ayeke kota si ayeke ngangu mingi; zo oko agbu le ni na ala, azo ti Israel pepe, ngbii asi laso.

¹⁰Zo oko na popo ti ala alingbi ti tumba peko ti azo saki oko, ngbanga ti so KOTA GBIA, Nzapa ti ala laa ayeke tiri bira ndali ti ala, tongana ti so lo mu zendo ni na ala.

¹¹Ala sara hange: ala ye KOTA GBIA, Nzapa ti ala.

¹²Tongana ala zia lege ti KOTA GBIA si ala ngba na tere ti amara so ayeke na popo ti ala, tongana ala mu amolenge ti ala ti wali ti ga awali ti ala, tongana ala gue na ndo ti amara ni si amara ni aga na ndo ti ala,

¹³ayeke nzoni ala hinga biani atene, fade KOTA GBIA, Nzapa ti ala ayeke ngba ti tumba azo ti mara so na dawa ti ala pepe. Amara ni ayeke ga tongana gbanda wala kuku ti gbungo ala, wala tongana zaza so a yeke pika na ndö ti peko ti ala, wala tongana ki na le ti ala. Na ndani, ala yeke hunzi kue na ndö ti nzoni sese so KOTA GBIA, Nzapa ti ala amu na ala.

¹⁴Ti mbi, mbi ga nduru ti zia sese so awe. Me ti ala, ayeke nzoni ala hinga na be ti ala kue, na yingo ti ala kue atene, azendo so kue KOTA GBIA, Nzapa ti ala amu na ala angba senge pepe; lo sara ye kue alingbi na ni.

¹⁵Biani, legeoko tongana ti so KOTA GBIA, Nzapa ti ala asara ye alingbi na azendo so lo mu na ala, fade lo yeke sara si aye ti sioni so kue lo tene tënë ni ayeke si na ala. Fade lo yeke sara si ala hunzi kue na ndö ti nzoni sese so lo mu na ala.

¹⁶Tongana ala bata tënë ti mbuki so KOTA GBIA, Nzapa ti ala amu yanga na ala ti sara so pepe, tongana ala kuku na gbe ti ambeni nzapa nde ti voro ala, fade ngonzo ti KOTA GBIA ayeke londo na tere ti ala tongana wâ si lo yeke sara titene ala hunzi gi hio na ndö ti nzoni sese so lo mu na ala.”