Read sango Josué 4 Bible Online

Josué 4 - sango bible

Josué 4

¹So azo ti Israel kue afâ ngu ti Jourdain awe, *KOTA GBIA atene na Josué, atene:

²“Ala soro azo baleoko na use na popo ti amara ni; zo oko na ya ti mara oko.

³Ala mu yanga na azo ni, atene: ‘Ala gue, amu têne baleoko na use taa na be ti ngu ti Jourdain, na ndo so awayango-sandaga aluti fade daa kpoo so, ala ga na ni. Ala ga na atêne ni, ala zia na ndo so ala yeke lango daa na bi so.’ ”

⁴Tongaso Josué airi azo baleoko na use so lo soro ala na popo ti azo ti Israel, zo oko na ya ti mara oko.

⁵Lo tene na ala: “Ala hon kozo ti sanduku ti mbuki ti KOTA GBIA, Nzapa ti ala. Ala gue na ya ti ngu ti Jourdain, zo oko amu têne oko na ndö ti go ti lo alingbi na wungo ti amara ti Israel.

⁶Tongaso si atêne ni aga mbeni ye ti dango be na popo ti ala. Mbeni lâ, tongana amolenge ti ala ahunda ala, atene: ‘Ti ala, nda ti atêne so ayeke nyen?’

⁷Fade ala kiri tënë na ala, atene: ‘Ya ti ngu ti Jourdain akangbi use na ndembe so sanduku ti mbuki ti KOTA GBIA ayeke hon lani na ya ni. Na ndembe so sanduku ti mbuki ni ayeke hon na ya ti ngu ni, ya ti ngu ni akangbi use. Atêne so ayeke ga ande ye ti dango be ndali ti azo ti Israel kpu na kpu.’ ”

⁸Tongaso azo ti Israel asara ye so Josué amu yanga na ala ti sarango ni. Ala mu têne baleoko na use taa na be ti ngu ti Jourdain alingbi na wungo ti amara ti Israel tongana ti so KOTA GBIA atene tënë ni na Josué. Ala mu atêne ni ague, azia ni na ndo so ala lango daa na bi ni.

⁹Josué aleke têne baleoko na use so taa na be ti Jourdain, na ndo so awayango-sandaga so ayeke yo sanduku ti mbuki azia gere ti ala lani daa so. Atêne ni ayeke kâ ngbii asi laso.

¹⁰Awayango-sandaga so ayeke yo sanduku ti mbuki ni aluti na nduzu taa na be ti Jourdain ngbii azo ni asara ye so kue KOTA GBIA amu yanga na Josué si lo tene peko ni na ala so. Lege so Josué asara ye alingbi na yanga so Moïse amu na lo so laa. Azo ni afâ ngu ni hio.

¹¹So azo ni kue asi na mbage ti ngu ni awe, awayango-sandaga akiri amu li ti tambula ni, na sanduku ti mbuki ti KOTA GBIA.

¹²Azo ti mara ti Ruben, azo ti mara ti Gad, na ndambo ti mara ti Manase amu aye ti bira ti ala, ala hon ti ala kozo ti tanga ti azo ti Israel kue tongana ti so Moïse amu lani yanga na ala so.

¹³Azo nduru na saki baleosio so aleke tere ti ala ti tiri bira, ala hon na dawa ti KOTA GBIA si ala fâ ngu ti Jourdain ti gue na mbage ti lando ti Jéricho.

¹⁴Na lango ni so, KOTA GBIA asara si Josué aga kota na le ti azo ti Israel kue. Na lango so kue lo ngba na fini, ala ne lo tongana ti so ala ne ando Moïse.

¹⁵Na pekoni, KOTA GBIA atene na Josué:

¹⁶“Mu yanga na awayango-sandaga so ayeke yo sanduku so mbuki ni ayeke daa so titene ala sigigi na ya ti ngu ti Jourdain.”

¹⁷Josué amu yanga na awayango-sandaga, atene: “Ala sigigi na ya ti ngu ni!”

¹⁸Awayango-sandaga so ayeke yo sanduku ti mbuki ti KOTA GBIA asara ye alingbi na yanga so Moïse amu na ala. Gi so ala sigigi na ya ti ngu ti Jourdain si gere ti ala ado kuru sese awe, ngu ni akiri na plase ti lo, asuku tongana ti kozo si ayeke sua ti hon.

¹⁹Azo ti Israel afâ ngu ti Jourdain na lango baleoko ti kozo nze ti ngu ni. Ala sara bâbâ ti ala na Gilgal, na To ti Jéricho.

²⁰Têne baleoko na use so ala mu ni na ya ti ngu ti Jourdain so, Josué amu aleke ni aluti na nduzu na Gilgal.

²¹Na pekoni, lo tene na azo ti Israel, lo tene: “Mbeni lâ, tongana amolenge ti ala ahunda ala atene: ‘Nda ti atêne so ayeke nyen’,

²²fade ala fa nda ni na amolenge ti ala, atene: ‘Azo ti Israel afâ ando Jourdain, ngu andu gere ti ala pepe.

²³Biani, KOTA GBIA Nzapa ti ala asara si na hongo ti ala, ngu ti Jourdain ahole. Lo kanga ngu ni ngbii ala kue ahon na mbage ni kâ, tongana ti so lo kanga ando kota ngu-ingo ti Asosongo na hongo ti e ngbii e hon kue na mbage ni kâ so.

²⁴Lo sara tongaso titene azo ti ndö ti sese kue ahinga atene, maboko ti KOTA GBIA ayeke ngangu; tongaso si ala, azo ti Israel, ala kpe mbeto ti KOTA GBIA, Nzapa ti ala lakue.’ ”