Read sango Josué 7 Bible Online

Josué 7 - sango bible

Josué 7

¹Azo ti Israel asara mbeni ye so ayeke sioni mingi ndali ti aye so *KOTA GBIA ake na ala ti mu ni. Mbeni zo ti mara ti Juda so iri ti lo Akan amu ambeni ye so KOTA GBIA ake na ala titene ala mu ni; nilaa ngonzo ti KOTA GBIA alondo tongana wâ na tere ti azo ti Israel. Akan ayeke molenge ti Karmi; Karmi ayeke molenge ti Zabdi si Zabdi ayeke molenge ti Zera.

²So ala yeke na Jéricho, Josué atokua ambeni koli na gbata ti Ai so ayeke nduru na gbata ti Bet-Aven, na mbage ti To ti Betel. Lo tene na ala: “Ala gue *abembe ndo na gbata ni.” Akoli ni ague, abembe ndo ni.

³Ala kiri atene na Josué: “Ayeke nzoni mo tokua aturugu kue na Ai pepe. Aturugu nduru na saki use wala saki ota alingbi awe. Zia aturugu kue ague senge senge pepe, ngbanga ti so azo ti Ai ni ayeke mingi pepe.”

⁴Azo nduru na saki ota ague ti tiri bira na Ai, me ala kpe na dawa ti azo ti Ai ni.

⁵Azo ti Ai afâ azo nduru na baleota na omene na popo ti azo ti Israel. Ti londo na yanga ti gbagba ti gbata ni, ala tumba tanga ti azo ni ngbii asi na Shebarim. Ala fâ ala na ndembe so ala zu hoto. Ngangu ti azo ti Israel ahunzi si ala woko kue.

⁶Josué na *akangba ti Israel asuru bongo na tere ti ala. Ti londo na ndaperere ngbii asi na lakui, ala ti akpo li ti ala na sese na dawa ti sanduku ti mbuki ti KOTA GBIA; ala tuku fuku ti sese na li ti ala.

⁷Na pekoni, Josué atene: “Ae Kota Gbia NZAPA! Mo sara si azo so afâ ngu ti Jourdain ngbanga ti nyen? Mo sara tongaso titene mo zia e na maboko ti azo ti mara ti Amori titene ala hunzi e biani biani? Tongana e ngba fade ti sara kodro na mbage ti ngu ti Jourdain kâ, ka ayeke nzoni mingi!

⁸Mbi gbu gere ti mo, Kota Gbia! Ti fadeso, mbi yeke tene nyen, so azo ti Israel akpe na le ti awato ti ala awe so?

⁹Fade azo ti Kanaan na azo ti kodro ni kue ayeke ma tënë ni; ala yeke bongbi ti ga na ndö ti e si ala yeke hunzi e kue. Nyen laa mo yeke sara ande ti fa atene, mo yeke kota?”

¹⁰KOTA GBIA atene na Josué: “Londo! Ngbanga ti nyen si mo ti, mo kpo li ti mo na sese?

¹¹Azo ti Israel asara siokpari awe. Biani, ala buba lege ti mbuki ti mbi na ala awe. Biani, ye so mbi ke na ala ti mu, ala mu ni; ala nzi ni si ala honde ni na ya ti akungba ti ala.

¹²Ndani laa, fade azo ti Israel alingbi ti gbu le ni na awato ti ala pepe, ala yeke kpe na le ti awato ti ala ni. Biani, azo ti Israel ayeke ga azo so a zia ala titene a fâ ala kue ti hunzi ala. Aye so mbi ke na ala ti mu, tongana ala buba ni pepe, fade mbi yeke ngba na popo ti ala pepe.

¹³Londo, mo leke azo ni titene ala zia tere ti ala nde ndali ti Nzapa. Fade mo tene na ala: ‘Ala zia tere ti ala nde ndali ti Nzapa ti ku na lango ti kekereke. Biani, tënë so KOTA GBIA, Nzapa ti Israel atene ayeke so: Aye so mbi ke na ala ti mu so ayeke na popo ti ala. Ala lingbi ti gbu le ni na awato ti ala pepe, ngbii ala zi aye ni na popo ti ala si.

¹⁴Kekereke na ndaperere, fade ala ga na dawa ti mbi na lege ti amara ti ala. Mara so mbi yeke fa ni, azo ni ayeke ga na lege ti akete mara ti ala. Kete mara so mbi yeke fa ni, azo ni ayeke ga na lege ti asewa ti ala. Sewa so mbi yeke fa ni, akoli ni ayeke ga oko na oko.

¹⁵Tongaso, fade mbi yeke fa zo so amu aye so mbi ke na ala ti mu ni so. Fade a yeke bi lo na aye ti lo kue na ya ti wâ, ngbanga ti so lo buba lege ti mbuki ti KOTA GBIA, lo sara ye ti sioni mingi na Israel.’ ”

¹⁶Na ndaperere, so ndo angba kâ, Josué asara si azo ti Israel aga na lege ti amara ti ala. A fa mara ti Juda.

¹⁷Lo sara si azo ti mara ti Juda aga na lege ti akete mara ti ala. A fa kete mara ti Zera. Lo sara si azo ti kete mara ti Zera aga na lege ti asewa ti ala. A fa sewa ti Zabdi.

¹⁸Na pekoni, lo sara si akoli oko na oko ti sewa ti Zabdi aga. Tongaso a fa Akan, molenge ti Karmi; Karmi ayeke molenge ti Zabdi, Zabdi ayeke molenge ti Zera, zo ti mara ti Juda.

¹⁹Josué atene na Akan: “Molenge ti mbi, gonda KOTA GBIA, Nzapa ti Israel, tene taa-tënë. Fa na mbi ye so mo sara, honde ye oko na mbi pepe.”

²⁰Akan akiri tënë na Josué, atene: “Biani, mbi laa mbi sara siokpari so ake KOTA GBIA, Nzapa ti Israel. Ye so mbi sara ayeke so:

²¹Na ya ti aye so e gbu na peko ti bira ni, mbi baa mbeni kota bongo ti zo ti kodro ti Shinear, so ayeke pendere ahon ndoni, na ale ti nginza ngbangbo use, na mbeni ngbongboro lôro so nengo ni ayeke ndambo ti kilo oko. Mbi sara nzara ni si mbi mu ni. Mbi honde ni na gbe ti sese, na ya ti da ti mbi ti bongo si mbi zia wen ti nginza ni na gbe ni.”

²²Josué atokua azo si ala kpe ague na ya ti da ti Akan so a sara na bongo. Andaa lo honde aye ni na ya ti da ti bongo ni biani si lo zia wen ti nginza ni na gbe ni.

²³Ala zi aye ni na ya ti da ti bongo ni si ala ga na ni na Josué nga na azo ti Israel kue. Ala zia aye ni na sese, na dawa ti KOTA GBIA.

²⁴Josué na azo ti Israel kue amu Akan, molenge ti Zera, na wen ti nginza ni, bongo ni, ngbongboro lôro ni; amolenge ti lo ti koli na ti wali, abagara ti lo, alele ti lo, angasa ti lo, ataba ti lo, da ti lo ti bongo, na aye ti lo kue si ague na lo nga na aye ni na popo-hoto ti Akor.

²⁵Josué atene na Akan: “Mo sara si kpale ati na ndö ti e ngbanga ti nyen? Ayeke nzoni KOTA GBIA asara si kpale ni ati na ndö ti mo laso.” Tongaso azo ti Israel kue abo Akan na têne si afâ lo. Ala bo nga asewa ti lo na têne si ala gbi ala na wâ.

²⁶Na pekoni, ala leke kota gba ti têne na ndö ti lo; gba ti têne ni angba ngbii asi laso. Ndani laa azo adi iri ti ndo ni, popo-hoto ti Akor ngbii asi laso. Na peko ti aye so kue, ngonzo ti KOTA GBIA ade.