Read sango 2 Tesalonike 3 Bible Online

2 Tesalonike 3 - sango bible

2 Tesalonike 3

¹Ti hunzi na ni, a-ita, ala sambela ndali ti e si tënë ti *Kota Gbia angba ti hon na ndo kue si azo agonda tënë ni tongana ti so azo ayeke gonda ni na ndo ti ala, a-ita.

²Ala sambela nga si Nzapa azi e na maboko ti azo ti kirikiri na azo ti sioni. Biani, azo kue laa ama na be pepe.

³Me Kota Gbia ayeke sara ye alingbi na tënë ti yanga ti lo: fade lo yeke sara titene ala kpengba, lo yeke bata ala si Sioni wato asara sioni na ala pepe.

⁴Na lege ti gango so e ga oko na Kota Gbia, e zia be ti e na ndö ti ala: ye so e mu yanga na ala ti sarango ni, ala yeke sara ni si ala yeke ngba ande ti sara ni.

⁵Ayeke nzoni Kota Gbia azia na be ti ala ti ye Nzapa, lo fa na ala lege ti kanga be ti ala legeoko tongana ti Christ!

⁶A-ita, e hunda na ala na iri ti *Kota Gbia Jésus Christ ti kpe lege ti a-ita so kue ayeke azo ti sopo, so sarango ye ti ala ayeke nde na tënë so e fa na ala kozoni so.

⁷Tia ala, ala hinga lege ti sarango ye tongana ti e awe. So e duti ando na popo ti ala, e sara sopo pepe.

⁸Kobe so e te, e hunda ni na mbeni zo pepe ti mu na e senge senge. Me bi na lâ, e sara kua ngangu, na gbiki ti li ti e si e ga kungba na ndö ti mbeni zo oko na popo ti ala pepe.

⁹Biani, e lingbi fade ti hunda ye na maboko ti ala, me e hunda ni pepe; e sara kua titene e ga tapande si ala sara nga tongana e.

¹⁰Biani, so lani e yeke na ndo ti ala, e mu yanga na ala, e tene: “Tongana mbeni zo aye ti sara kua pepe, alingbi lo te nga kobe pepe.”

¹¹Andaa e yeke ma a tene, ambeni zo na popo ti ala ayeke azo ti sopo, ala yeke sara kua oko pepe, me ala yeke yoro yanga ti ala na ya ti atënë ti azo.

¹²Azo tongaso, e mu yanga na ala si e mu wango na ala na iri ti Kota Gbia Jésus Christ: ala duti kpoo, ala sara kua ti ala si ala te kobe ti peko ti kua ti ala wani.

¹³Ti ala, a-ita, be ti ala awoko na lege ti sarango nzoni ye pepe.

¹⁴Tongana mbeni zo ake ti ma tënë so e tene na ya ti mbeti so, ala su iri ti lo na mbeti, ala sara songo na lo pepe, tongaso si kamene agbu lo.

¹⁵Ye oko, ala baa lo tongana wato ti ala pepe, me ala mu wango na lo tongana ti so ala yeke sara fade na mbeni ita, zo ti Christ.

¹⁶Ayeke nzoni *Kota Gbia wani, so siriri alondo na lo, amu na ala siriri lakue na ya ti aye kue! Ayeke nzoni Kota Gbia aduti na ala kue!

¹⁷Mbi Paul, mbi wani, mbi su atënë so: mbi bara ala. Lege so mbi yeke su maboko na gbe ti ambeti ni oko oko kue laa; lege ti sungo mbeti ti mbi laa.

¹⁸Ayeke nzoni Kota Gbia ti e Jésus Christ asara nzoni be na ala kue!