Read sango 1 Timothée 3 Bible Online

1 Timothée 3 - sango bible

1 Timothée 3

¹Tënë so ayeke taa-tënë: tongana zo aye ti ga zo ti li ti *Eglize, andaa nzoni kua laa lo ye ni so.

²Alingbi zo ti li ti Eglize ayeke zo so tënë ayeke na li ti lo pepe, lo yeke gi na wali oko, lo yeke sara ye ahon ndoni pepe, me na legeni, lo yeke tene tënë na legeni, lo yeke sara ye na lege ti nengo tere, lo yeke yamba azo nzoni na da ti lo, lo hinga lege ti fango ye na azo;

³lo yeke ngbaa ti samba pepe, lo yeke zo ti tiri pepe, me lo yeke zo ti nzoni be, lo yeke sara ngangu na amba ti lo pepe; nzara ti nginza ahon ndö ti lo pepe;

⁴lo yeke nzoni makonzi ti sewa ti lo wani, lo yeke sara titene amolenge ti lo ama yanga ti lo, na nengo tere.

⁵Zo so ahinga ti duti makonzi ti sewa ti lo wani pepe, fade lo yeke hinga ti bata Eglize ti Nzapa tongana nyen?

⁶Alingbi zo ti li ti Eglize ayeke zo so ama na be fini fini pepe; tongaso pepe, fade baba ayeke hon ndö ti lo si Nzapa ayeke fâ ngbanga na li ti lo tongana ti so lo fâ na li ti Zabolo.

⁷Alingbi lo duti zo so azo so ama na be pepe atene nga nzoni tënë ti lo. Tongaso, fade azo ayeke tene sioni tënë na tere ti lo pepe si lo ti na ya ti gbanda ti Zabolo pepe.

⁸Alingbi *adiakre nga aduti azo so ayeke ne tere ti ala; tënë ti yanga ti ala ayeke use use pepe, ala yeke angbaa ti samba pepe, ala gi ti wara ye na lege ti sioni pepe.

⁹Ala bata tënë ti mabe so a sigigi na nda ni awe, ala bata tënë ni na vurungo be.

¹⁰Alingbi a tara ala kozoni. Na pekoni, tongana mbeni tënë ayeke na li ti ala pepe, a zia ala na yanga ti kua ti diakre ni.

¹¹Alingbi awali ni nga ayeke azo so ane tere ti ala, ala yeke tene sioni tënë na iri ti zo pepe, ala yeke sara ye ahon ndoni pepe, me na legeni; azo alingbi ti zia be na ndö ti ala na ya ti aye kue.

¹²Alingbi diakre ayeke gi na wali oko, lo yeke nzoni makonzi ti amolenge ti lo na ti asewa ti lo wani.

¹³Adiakre so ayeke sara kua ti ala na legeni, ala yeke wara nzoni ndo. Ala yeke tene tënë na mbeto pepe, ngbanga ti so ala ma na be si ala ga oko na Jésus Christ awe.

¹⁴Na ndembe so mbi yeke su mbeti so ti tokua na mo, mbi yeke na nzara ti gue ti baa mo hio.

¹⁵Me tongana mbi si hio pepe, mbi ye mo hinga lege ti duti na popo ti azo ti Nzapa, so ti tene na popo ti azo ti *Eglize ti Nzapa, lo so lo yeke na fini. Eglize ni ayeke ya taa-tënë na nduzu si ayeke gbu ni ngangu.

¹⁶Biani, tënë ti mabe so a sigigi na nda ni awe ayeke kota tënë mingi, tënë ni ayeke so: Christ amu tere ti zo si lo fa tere ti lo na azo, Yingo-Vuru afa atene, lo yeke zo ti mbirimbiri, *a-ange abaa lo. A fa tënë ti lo na azo ti amara nde, azo ti dunia ama na be na lo si lo gue na yayu na ya ti gonda.