Read sango 1 Timothée 4 Bible Online

1 Timothée 4 - sango bible

1 Timothée 4

¹Yingo-Vuru atene biani atene, na lango ti ndani, fade ambeni zo ayeke zia lege ti mabe, ala yeke ma gi tënë ti ayingo so ayeke handa azo si ala yeke ma atënë so alondo na asioni yingo.

²Ala yeke girisa lege ndali ti azo ti tenengo mvene so tënë ti yanga ti ala ayeke nde na sarango ye ti ala, be ti ala ayeke na nzoroko ti sioni ye so a su ni na wen so a yoro na ya ti wâ si abe.

³Azo ni so ayeke gbanzi azo ti mu wali wala koli, ala yeke gbanzi azo ti te ambeni kobe. Andaa Nzapa asara kobe titene azo ti lo so ahinga taa-tënë nzoni ate ni na mungo na lo singila.

⁴Ye so kue Nzapa asara ayeke nzoni, mbeni ye oko ti kengo ni ayeke daa pepe, me alingbi zo amu singila na Nzapa ndali ti ye ni.

⁵Biani, tënë ti Nzapa na sambela ayeke sara si ye kue aga nzoni na le ti Nzapa.

⁶Tongana mo fa atënë so kue na a-ita, azo ti Christ, fade mo yeke ga nzoni zo ti kua ti Jésus Christ. So afa atene, mo yeke kpengba na lege ti atënë ti mabe nga na lege ti nzoni fango ye so mo yeda ti mu peko ni.

⁷Mo ke ambai ti mvene so azo ayeke tene kirikiri si alingbi na tënë ti mabe pepe so. Me mo gbu tënë ti Nzapa ngangu.

⁸Tarango tere na lege ti angia ti wanguru ayeke sara nzoni na zo gi kete; me gbungo tënë ti Nzapa ngangu ayeke sara nzoni na zo na ya ti aye kue. Biani, ndali ti zo so, zendo ti duti na fini laso nga na ngoi so ayeke ga gbanda ayeke daa.

⁹Tënë so ayeke taa-tënë, ayeke nzoni azo kue ayeda na ni na be ti ala kue.

¹⁰Biani, pasi so e yeke baa wala bira so e yeke tiri ayeke ndali ti so e zia be ti e ti ku Nzapa so ayeke na fini. Lo yeke Wasongo azo kue, mbirimbiri azo so ama na be.

¹¹Ye so mo lingbi ti mu yanga na azo daa si mo fa ni na ala laa.

¹²Mo zia mbeni zo abaa mo tongana molenge pepe; me mo ga tapande ti azo so ama na be na lege ti tenengo tënë ti mo, sarango ye ti mo, ndoye ti mo, mabe ti mo na vurungo be ti mo.

¹³Ti ku na gango ti mbi, ayeke nzoni mo zia be ti mo na dikongo Mbeti ti Nzapa, na mungo wango na azo nga na fango ye na azo.

¹⁴Matabisi so Nzapa amu na mo, mo sara mbana na ni pepe. Mo wara matabisi ni lani na peko ti tënë ti yanga ti Nzapa na ngoi so bongbi ti *akangba azia maboko ti ala na ndö ti mo.

¹⁵Ye so mo lingbi ti zia be ti mo kue daa ti sara ni laa. Mu tere ti mo kue na kua ni si azo kue abaa so, kua ti mo ayeke gue na nduzu.

¹⁶Mo baa lege ti dutingo ti mo wani nzoni, mo baa nga lege ti fango ye ti mo nzoni; mo ngba daa lakue. Biani, tongana mo sara tongaso, fade mo yeke soo tere ti mo wani na kuâ si mo yeke soo nga azo so kue ayeke ma mo.