Read sango 2 Timothée 4 Bible Online

2 Timothée 4 - sango bible

2 Timothée 4

¹Na le ti Nzapa nga na le ti Jésus Christ so ayeke ga ande ti fâ ngbanga ti azo so ade na fini na azo so akui awe, ndali ti kiringo ti lo ti ga ti duti *Kota Gbia, mbi hunda na mo titene

²mo fa tënë ti Nzapa na azo, wala ndembe ni laa wala ndembe ni laa pepe, mo ngba gi daa. Mo fa sioni ti azo na le ti ala, mo suku na ala, mo mu wango na ala; be ti mo awoko na lege ni pepe, mo ngba na nzara ti fango ye na ala.

³Biani, mbeni ngoi ayeke ga so fade azo ayeke ye pepe ti ma fango ye so ayeke mbirimbiri, ala yeke sara ande gi aye ti be ti ala wani si ala yeke iri gba ti awafango-ye ti ga ti fa na ala tënë so anzere na mê ti ala.

⁴Fade ala yeke kanga mê ti ala ti ma taa-tënë si ala yeke zi mê ti ala kue ti ma gi ambai ti mvene.

⁵Ti mo, ayeke nzoni na ya ti ye kue, mo sara ye ahon ndoni pepe, me na legeni. Kanga be ti mo na ya ti pasi, sara kua ti fango Nzoni Tënë na azo, kua so Nzapa amu na mo ti sarango ni, mo sara ni kue.

⁶Ti mbi, lango titene a mu mbi na *sandaga alingbi awe; lango titene mbi zia sese so alingbi nga awe.

⁷Mbi tiri nzoni bira na legeni, mbi si na nda ti lege ni awe, mbi bata lege ti mabe.

⁸Ti fadeso, Nzapa abata na mbi nzoni ye so a yeke mu na zo so aso benda. Lo leke nzoni ye ni ndali ti azo ti mbirimbiri, fade *Kota Gbia so ayeke wafango-ngbanga ti mbirimbiri ayeke mu ni na mbi na lango ti ndani; lo yeke mu nzoni ye ni gi na mbi oko pepe, me lo yeke mu ni nga na azo so kue aye tënë ti gango ti lo.

⁹Sara kue titene mo ga hio mo wara mbi.

¹⁰Demas azia mbi, ahon awe, ngbanga ti so nzara ti aye ti gigi so agbu lo; lo gue na Tesalonike. Kresan ague na Galasii, Tite ague na Dalmasii.

¹¹Gi Luc oko laa angba na tere ti mbi. Mu Marc na tere ti mo si mo na lo aga, ngbanga ti so lo lingbi ti mu na mbi maboko na ya ti kua ti Nzapa.

¹²Mbi tokua Tishike na Efeze awe.

¹³Na gango ti mo, mo mu kota bongo ti de so lani mbi zia na ndo ti Karpus, na gbata ti Troas, mo ga na ni. Mo ga nga na abuku, mbirimbiri aporo ti nyama so a yeke su mbeti na ndö ni so.

¹⁴Alexandre, zo ti pikango ndao asara sioni na mbi mingi; fade *Kota Gbia ayeke kiri na lo peko ti aye so lo sara.

¹⁵Mo nga, mo sara hange na lo, ngbanga ti so lo ke atënë ti e na kuru go.

¹⁶Na kozo ngbanga so lani a iri mbi daa, zo oko amu na mbi maboko pepe, azo kue azia mbi ahon. Ayeke nzoni Nzapa akiri peko ni na ala pepe!

¹⁷Kota Gbia, lo wani ayeke lani na mbi, lo mu ngangu na mbi. Tongaso, mbi fa tënë ti lo kue si azo kue ti amara nde ama ni. Kota Gbia azi mbi na yanga ti bamara awe!

¹⁸Fade Kota Gbia ayeke zi mbi na ya ti ye ti sioni so kue azo aleke ti sara na mbi, fade lo yeke soo mbi na kuâ si lo yeke gue na mbi na yayu, kodro-gbia ti lo. Gonda ayeke ti lo kpu na kpu! Amen.

¹⁹Mo bara na mbi Priscille na Akilas nga na azo ti sewa ti Onezifore.

²⁰Eraste angba na Korente. Mbi zia Trofime na kobela kâ na gbata ti Mile.

²¹Sara kue titene mo si ge kozo si ngoi ti de alingbi. Ebule, Pudan, Linus, Claudia na a-ita kue abara mo.

²²Ayeke nzoni *Kota Gbia aduti na mo! Ayeke nzoni Nzapa asara nzoni be na ala!