Read sango Ahebro 6 Bible Online

Ahebro 6 - sango bible

Ahebro 6

¹Tongaso, alingbi e zia lege ti akozo tënë so e manda ando na ndö ti Christ, e hon fadeso ti manda akpengba tënë so alingbi na akangba, e kiri na ndö ti akozo kota tënë ni pepe. Akozo tënë ni ayeke so: tënë ti ziango ngbene lege ti sarango abuba ye, tënë ti mango na be na Nzapa,

²tënë na ndö ti abateme, tënë ti ziango maboko na li ti azo, tënë ti zingongo ti akuâ na tënë ti ngbanga so Nzapa ayeke fâ ande na li ti azo biani biani.

³Tongana Nzapa ayeda, ye so e yeke sara ande laa.

⁴E mu tapande ti azo so akiri na sioni lege ti sarango ye ti ala: lumiere ti Nzapa azi le ti ala awe, ala ndu nzoni ye ti yayu, ala wara Yingo-Vuru,

⁵ala hinga atene, tënë ti Nzapa anzere, ala hinga nga aye ti kpene ti ngoi so Nzapa ayeke ga ti le-gbia.

⁶Ataa so kue gbaa, ala kiri na sioni lege ti sarango ye ti ala ti kozoni. Lege titene a sara si ala kiri azia ngbene lege ti sarango ye ti ala ayeke daa oko pepe. Biani, ala kiri akanga Molenge ti Nzapa na ndö ti keke ti kroa si ala sara titene azo azonga lo.

⁷E mu tapande ti yaka: tongana ngu apika fani mingi na ndö ti sese si sese ni asara titene anzoni le ti kobe asigigi ndali ti azo so alu ye daa, andaa Nzapa asara tufa na ndö ti sese ni awe.

⁸Me tongana sese ni asara titene aki na akeke ti ki asigigi, andaa sese ni so ayeke buba sese; fade Nzapa ayeke deba ni si na pekoni, a yeke gbi ni na wâ.

⁹Ti ala, a-ita so e ye ala mingi, ataa so e tene tënë tongaso, e hinga na be ti e so, ala yeke tambula na nzoni lege so zo ayeke mu titene lo soo kuâ.

¹⁰Biani, Nzapa ayeke kirikiri pepe. Yengo so ala ye ando lo na ni nga na sarango nzoni so ala yeke sara na a-ita ti ala, azo ti Nzapa si ala ngba daa laso so, fade Nzapa ayeke girisa ni pepe.

¹¹Me e ye mingi titene ala oko oko kue angba na nzara ti sarango nzoni ye tongana ti kozoni; ala ngba daa ngbii asi na ndani, tongaso si fade ala yeke wara aye so ala zia be ti ala ti ku ni.

¹²Ala woko na lege ti sarango kua pepe, me ala sara ye tongana ti azo so ama na be, azo so akiri na peko pepe. Azo ni ayeke wara aye so Nzapa amu zendo ni na ala.

¹³Na ngoi so Nzapa amu zendo na Abraham, mbeni zo so ayeke kota ahon Nzapa titene lo deba na iri ti lo ayeke daa pepe, nilaa lo deba na iri ti lo wani,

¹⁴lo tene: “Mbi deba yanga ti mbi awe: fade mbi yeke sara tufa na ndö ti mo gbani gbani, mbi yeke sara si amolenge ti mo awu ahon ndoni.”

¹⁵Abraham akanga be ti lo aku si lo wara ye so Nzapa amu zendo ni na lo.

¹⁶Tongana azo ayeke deba yanga ti ala, ala yeke deba na iri ti mbeni zo so ayeke kota ahon ala. Dengo ba ni ayeke sara si ala luti na ndö ti mbeni ye ti mbirimbiri, tongaso si dengo kite ahunzi na popo ti ala.

¹⁷Andaa, azo so Nzapa amu zendo ti mu aye na ala, lo ye ti fa biani na ala so be ti lo angba lakue na ndö ti zendo ni. Ndani laa lo deba yanga ti lo na ndö ti zendo ni.

¹⁸Dengo ba so Nzapa ade na zendo so lo mu so ayeke ngba lakue; tënë ti mvene ayeke na ya ti aye use so oko pepe. Aye use so ayeke kpengba e mingi, e so e zia be ti e ti ku ti wara ye so Nzapa aye ti mu na e.

¹⁹Ti fini ti e ayeke nga tongaso: ye so e zia be ti e ti ku ayeke tongana nengo wen so a yeke bi na ya ti ngu, agbu mangboko si aluti mbirimbiri. Ye so e zia be ti e ti ku ayeke ye so aluti mbirimbiri, ye ni ahon na ya ti ridoo so a kanga na ya ti kota da ti Nzapa so ayeke na yayu, ague ngbii asi na ndo so ayeke nde si ayeke nzoni kue ahon atanga ni.

²⁰Jésus ali na ndo so kozo ti e nga ndali ti e. Lo ga kota wayango-sandaga kpu na kpu tongana ti Melkisedeke.