Read sango 1 Pierre 2 Bible Online

1 Pierre 2 - sango bible

1 Pierre 2

¹Ala zia lege ti sarango amara ti asioni kue nga na sarango ye ti mayere. Tënë ti yanga ti ala ague nde na sarango ye ti ala pepe, ala zia lege ti kota be na ti dikongo asioni tënë na iri ti azo.

²Ala duti tongana akete molenge so a du ala fafadeso: alingbi nzara ti tënë ti Nzapa asara ala tongana ti so nzara ti nyongo me ayeke sara kete molenge; tënë ti Nzapa so sioni ye oko ayeke daa pepe. Tongaso, na lege ni, fade ala yeke ga kota si ala soo kuâ.

³Biani, Mbeti ti Nzapa atene: “Ala wani atara so *Kota Gbia ayeke nzoni.”

⁴Ala ga nduru na *Kota Gbia, lo so lo yeke têne so ayeke na fini; têne so azo ake ni, me Nzapa asoro ni si lo baa ni ayeke nzoni na le ti lo.

⁵Ala nga, ala yeke tongana atêne so ayeke na fini. Ala sara si Nzapa amu ala ti sara na da so ayeke ti Yingo. Tongaso, fade bongbi ti ala ayeke ga bongbi ti awayango-sandaga so ayeke nde si ayeke nzoni kue, ala yeke mu na lo asandaga so Yingo afa na ala ti mungo ni si ayeke nzere na be ti Nzapa na lege ti Jésus Christ.

⁶Biani, na ya ti Mbeti ti Nzapa, a tene: “Ala baa, mbi soro mbeni têne ti ngangu ngere si mbi zia ni na gbata ti *Sion; têne ni ayeke ngangu têne ti gere ti da. Zo so azia be ti lo na ndö ti têne ni, fade kamene ayeke gbu lo pepe.”

⁷Ti ala, a-ita so ama na be, têne ni ane na le ti ala; me ti azo so ake ti ma na be, “têne so azo ti sarango da ake ni, ni laa akiri aga ngangu têne ti gere ti da ni.”

⁸Mbeti ti Nzapa akiri atene: “Ayeke têne so azo ayeke pika gere ti ala daa, kota têne so ayeke sara titene azo ati.” Ala yeke pika gere ti ala na têne ni, ngbanga ti so ala ke ti yeda na tënë ti Nzapa. Ye so Nzapa aleke ala ando ndali ni laa.

⁹Me ti ala, ala yeke azo ti mara so Nzapa asoro ala awe, awayango-sandaga ti Gbia, azo ti mara so ayeke nde si ayeke nzoni kue, azo so Nzapa amu ala ti ga azo ti lo wani titene ala fa tënë ti akota ye so lo sara. Lo iri ala ti sigigi na ya ti vukongo ndo si ala duti na ya ti lumiere ti lo so ayeke do be ti zo.

¹⁰Ando, ala yeke azo ti Nzapa pepe, me fadeso ala ga azo ti lo awe. Ando, Nzapa abaa mawa ti ala pepe, me fadeso lo baa mawa ti ala awe.

¹¹A-ita ti mbi so mbi ye ala mingi, ala yeke tongana agene, tongana awande na ndö ti sese so. Ndani laa mbi hunda na ala titene ala ke asioni nzara ti be so ayeke sara bira na ala.

¹²Alingbi dutingo ti ala na popo ti azo ti amara nde ayeke nzoni. Tongaso, ataa so azo ni ayeke bi tënë na li ti ala atene, ala yeke azo ti sarango sioni, azo ni abaa nzoni sarango ye ti ala si ala gonda Nzapa na ndembe so lo yeke ga.

¹³Ndali ti *Kota Gbia, ala ma yanga ti azo ti komandema kue: ala ma yanga ti kota gbia, ngbanga ti so lo yeke na komandema na ndö ti tanga ti agbia kue.

¹⁴Ala ma nga yanga ti agovoronere so lo zia na li ti akodro ti fâ ngbanga na li ti azo ti sarango sioni ye, me ti gonda azo so ayeke sara nzoni ye.

¹⁵Biani, ye so Nzapa aye ayeke titene ala sara nzoni ye si ala lingbi ti kanga yanga ti abuba zo so ahinga ye pepe so.

¹⁶Ala sara ye tongana azo so asigigi na gbe ti ngbaa; me alingbi sigingo ti ala na gbe ti ngbaa ni aga mbeni ye ti kanga ndö ti sarango sioni ye pepe, me ala sara ye tongana angbaa ti Nzapa.

¹⁷Ala ne azo kue, ala ye a-ita ti ala, ala kpe mbeto ti Nzapa, ala ne kota gbia.

¹⁸Ala azo ti kua, ayeke nzoni ala ma yanga ti azo so ala yeke sara kua na gbe ti ala, ala kpe mbeto ti ala mingi. Ala ma gi yanga ti ala so ayeke anzoni zo wala azo so ayeke kpoo so pepe, me ala ma nga yanga ti ala so ayeke so na ndö ti ala mingi.

¹⁹Biani, ndali ti so ala ye ti ma yanga ti Nzapa, ayeke nzoni ala kanga be ti ala tongana azo asara pasi na ala senge senge.

²⁰Tongana ala sara mbeni ye ti sioni, azo apika ala ndali ni si ala kanga be ti ala, zo wa si alingbi ti gonda ala, zo wa? Me tongana ala kanga be na ya ti pasi so ala yeke baa na peko ti so ala sara ye ti nzoni, so ayeke nzoni ye na le ti Nzapa.

²¹Ye so Nzapa airi ala ndali ni laa, ngbanga ti so Christ nga abaa ando pasi ndali ti ala; lo sara tongaso ti fa lege na ala si ala mu tapande ti lo.

²²Christ asara siokpari pepe; tënë ti mvene asigigi na yanga ti lo laoko pepe.

²³Azo azonga lo, me lo kiri na zonga ni pepe; azo asara pasi na lo, me lo be le na ala pepe, lo zia be ti lo kue na ndö ti Nzapa so ayeke fâ ngbanga na legeni.

²⁴Christ wani ayo siokpari ti e na ya ti tere ti lo si lo kui na ni na ndö ti keke ti kroa, tongaso si e so e kangbi na siokpari na lege ti kuâ so e kui awe, e duti na fini ti sara ye ti mbirimbiri. Na lege ti aka so lo wara laa tere ti ala aga nzoni.

²⁵Ala yeke ando tongana ataba so agirisa lege, me fadeso ala kiri na tere ti Christ so ayeke zo ti fango lege na ala si lo yeke nga zo ti batango fini ti ala.