Read sango 1 Pierre 4 Bible Online

1 Pierre 4 - sango bible

1 Pierre 4

¹Christ abaa pasi na ya ti tere ti lo ti zo. Tongaso, ala nga, ala hinga biani na be ti ala atene, zo so abaa pasi na ya ti tere ti lo ti zo, lo kangbi na siokpari awe. Alingbi tënë so aduti na be ti ala tongana mbeni ye ti bira.

²Tongaso, ngoi so angba na ala ti duti na fini na sese so, ala sara ye na lege ti nzara ti be ti ala pepe, me na lege so be ti Nzapa aye.

³Ando, ala mu ngoi mingi ti sarango na aye tongana ti azo so ahinga Nzapa pepe. Ala yeke sara aye ti ndumba, ala yeke sara nzara ti aye ti amba ti ala, ala yeke angbaa ti samba, ala yeke sara matanga ti te, ti nyon butuma, ala yeke voro anzapa nde, ye so akpa titene zo asara ni pepe.

⁴Fadeso, li ti azo ni akpe, ngbanga ti so ala, a-ita, ala yeke sara mbeni pepe asioni sarango ye ti kirikiri so ala na azo ni abongbi ando si ayeke sara ni. Tongaso, azo ni ayeke zonga ala.

⁵Me fade azo ni ayeke luti na le ti Nzapa ti fa peko ti aye so ala sara, Nzapa so ayeke nduru ti fâ ngbanga ti azo so ade na fini na ala so akui awe.

⁶Ndani laa a fa nga ando Nzoni Tënë na azo so akui awe. A fâ ngbanga ti ala alingbi na ye so ala sara tongana ti azo kue. Fadeso, na lege ti Yingo, ala lingbi ti duti na fini tongana ti Nzapa.

⁷Ye kue aga nduru ti hunzi awe. Tongaso, alingbi ala sara ye na ndara, le ti ala akpengba, tongaso si ala lingbi ti sambela.

⁸Kozoni kue, ala ye tere na popo ti ala na be ti ala kue, ngbanga ti so ndoye ayeke zi asiokpari mingi.

⁹Ala yamba amba ti ala nzoni na ndo ti ala, me na dikongo tënë na gbe ti go ti ala pepe.

¹⁰Nzapa amu amatabisi nde nde na zo oko oko. Tongaso, ayeke nzoni zo oko oko amu matabisi ni ti sara na nzoni na amba ti lo. Fade ala yeke ga anzoni ndombe ti aye nde nde ti Nzapa so lo mu na ala na lege ti nzoni be ti lo.

¹¹Tongana mbeni zo ayeke fa tënë, alingbi lo fa gi tënë ti Nzapa. Tongana mbeni zo ayeke sara kua ndali ti amba ti lo, alingbi lo sara ni na ngangu so Nzapa amu na lo, tongaso si na ya ti aye kue, azo agonda Nzapa na lege ti Jésus Christ. Gonda na ngangu ayeke ti Nzapa, kpu na kpu! Amen.

¹²A-ita ti mbi so mbi ye ala mingi, li ti ala akpe pepe na wâ ti pasi so ala yeke na ya ni so! Ala baa ni tongana mbeni fini ye pepe.

¹³Me ala duti na ngia tongana ala yeke baa pasi tongana ti so Christ abaa ando so. Tongaso, na ngoi so azo ayeke baa ande gonda ti lo, ala nga, be ti ala ayeke si singo na ngia.

¹⁴Ti ala nzoni, tongana azo ayeke zonga ala ndali ti iri ti Christ!Ti ala nzoni, ngbanga ti so Yingo ti gonda, so ti tene Yingo ti Nzapa, ayeke duti na ndö ti ala!

¹⁵Alingbi mbeni zo oko na popo ti ala abaa pasi pepe ndali ti tënë ti fango zo, wala tënë ti nzi, wala tënë ti sarango sioni ye, wala tënë ti yorongo yanga na ya ti tënë ti mbeni zo.

¹⁶Me tongana zo ni abaa pasi ndali ti so lo yeke zo ti Christ, alingbi kamene asara lo pepe; me alingbi lo mu singila na Nzapa ndali ti iri ti Christ so ayeke na ndö ti lo.

¹⁷Biani, ngoi so e yeke daa ayeke ngoi so Nzapa ayeke to nda ti fango ngbanga ti azo ti da ti lo. So Nzapa ayeke to nda ti fango ngbanga ti e kozoni so, fade ti azo so ake ti ma na be na Nzoni Tënë ti Nzapa ayeke duti tongana nyen?

¹⁸Mbeti ti Nzapa atene: “Tongana ayeke ngangu na zo ti mbirimbiri ti soo kuâ, fade ti zo ti sioni na zo ti sarango siokpari ayeke duti tongana nyen?”

¹⁹Tongaso, azo so ayeke baa pasi tongana ti so Nzapa aye, alingbi ala ngba lakue ti sara nzoni ye, ala mu tere ti ala kue na Nzapa, lo so lo sara ye kue si lo yeke sara ye alingbi na peko ti tënë ti yanga ti lo.