Read sango 1 Pierre 5 Bible Online

1 Pierre 5 - sango bible

1 Pierre 5

¹Fadeso mbi yeke mu wango na *akangba ti *Eglize so ayeke na popo ti ala. Mbi nga, mbi yeke kangba tongana ala. Mbi baa na le ti mbi pasi so Christ abaa ando; legeoko na ala, fade mbi yeke li na ya ti gonda so ayeke si.

²Ala bata bongbi ti azo ti Nzapa so lo zia na maboko ti ala. Ala sara ni na nzoni be, tongana ti so be ti Nzapa aye; mbeni zo agbu ala na ngangu ti sara ni pepe. Ala sara kua ni ndali ti nzara ti nginza pepe, me ala mu tere ti ala kue na kua ni.

³Azo ti Nzapa so lo zia ala na maboko ti ala ti bata ala so, ala sara komandema ti ngangu na ndö ti ala pepe, me ala duti tapande ndali ti ala.

⁴Tongana Makonzi ti azo ti batango azo ti Nzapa asi, fade ala yeke wara nzoni ye ti peko ni so ayeke na gonda si pendere ni ayeke hon oko pepe.

⁵Amaseka, ala nga, ala ma yanga ti akangba. Ala kue, na lege ti dutingo ti ala na popo ti amba ti ala, ala sara tere ti ala kete, ngbanga ti so Mbeti ti Nzapa atene: “Nzapa ake azo ti baba, me lo yeke sara nzoni be na azo so asara tere ti ala kete.”

⁶Ala sara tere ti ala kete na gbe ti Nzapa so ayeke na ngangu, tongaso si fade lo yeke zia ala na kota ndo tongana ngoi ni alingbi.

⁷Aye so kue ala yeke gi be ti ala daa, ala zia ni kue na maboko ti Nzapa, ngbanga ti so lo laa lo yeke bata ala.

⁸Le ti ala akpengba, ala lango pepe! Zabolo, wato ti ala, ayeke ngoro na tere ti ala tongana bamara so ayeke toto si ayeke gi mbeni zo ti te.

⁹Ala do sese na lo, ala luti ngangu na lege ti mabe. Ala hinga atene, a-ita ti ala so ayeke na ndö ti dunia kue ayeke baa gi amara ti pasi so.

¹⁰Pasi so ala yeke baa so ayeke ndali ti kete ngoi. Me Nzapa so ayeke sara nzoni be mingi na azo, lo iri ala titene ala li na ya ti gonda ti lo so ayeke ngba lakue lakue, ngbanga ti so ala ga oko na Christ awe. Tongaso, lo yeke sara titene ala ga nzoni kue, ala kpengba, ala wara ngangu si mbeni ye ayingi ala pepe.

¹¹Komandema ayeke ti lo kpu na kpu! Amen.

¹²Silas so mbi baa lo tongana ita so mbi lingbi ti zia be ti mbi na ndö ti lo, lo laa lo mu na mbi maboko ti su nduru mbeti so ti tokua ni na ala. Mbi tokua mbeti so na ala ti mu wango na ala, ti fa nga na ala ye so ayeke taa-tënë: taa nzoni be ti Nzapa laa ala ngba daa so.

¹³*Eglize ti gbata ti Babilone so Nzapa asoro ni tongana ti ala, a-ita, abara ala. Molenge ti mbi Marc abara nga ala.

¹⁴Ala bara tere na popo ti ala na sungo ngbangba na lege ti ndoye ti azo ti Christ. Ala duti na siriri, ala so kue aga oko na Christ!