Read sango 2 Pierre 2 Bible Online

2 Pierre 2 - sango bible

2 Pierre 2

¹Ando, awayanga-Nzapa ti mvene ayeke na popo ti azo ti Israel. Legeoko nga, fade ambeni wafango-ye ti mvene ayeke duti na popo ti ala, a-ita. Na lege ti mayere, azo ni so ayeke ga na ambeni fango ye ti mvene so ayeke gue na zo na kuâ. Azo ni so ayeke gue ngbii ti ke tënë ti Gbia so asoo ala; sarango ye ti ala ayeke bi ala gi hio tongaso na ya ti kpale so ayeke mingo ala.

²Fade azo mingi ayeke mu peko ti awafango-ye ti mvene so ti sara aye ti potopoto so ala yeke sara. Ndali ti azo tongaso, azo ayeke zonga lege ti taa-tënë.

³Ndali ti nzara ti nginza, azo so ayeke handa ala ti te ala na lege ti atënë ti mvene. Me ti azo ni, aninga mingi so ngbanga ti ala alondo awe, ngbanga so aga nduru ti ti na ndö ti ala: kpale so ayeke mingo ala ade yongoro pepe.

⁴Biani, *a-ange so asara siokpari ando so, Nzapa azia ala senge tongaso pepe, me lo bi ala na ya ti kota wâ, lo kanga ala na zingiri na ya ti vukongo ndo ti bata ala, ti ku na lango ti fango ngbanga.

⁵Nzapa azia nga ando dunia ti kozoni senge tongaso pepe. Ndali ti sioni sarango ye ti azo ti dunia ni, lo sara si kota ngu apika, asuku amu ndo kue; lo bata gi Noe, zo ti fango lege ti mbirimbiri na azo, lo na ambeni zo mbarambara.

⁶Nzapa afâ nga ngbanga na li ti azo ti agbata ti Sodome na Gomore si lo gbi agbata ni so. Lo sara tongaso ti fa tapande na azo ti sioni atene, fade mara ti ye so ayeke si na ala.

⁷Nzapa azi Lot, zo ti mbirimbiri; be ti Lot aso lani mingi na sarango ye ti potopoto ti asioni zo ti ngoi ti lo.

⁸Biani, koli ti mbirimbiri so asara kodro na popo ti azo ni. Lakue lo yeke ma ala si lo yeke baa aye so ala yeke sara. Lakue lakue, aye ti sioni so azo ni ayeke sara, tënë ni ayeke te ya ti be ti zo ti mbirimbiri so;

⁹so ti tene, *Kota Gbia alingbi ti zi azo so amu tere ti ala kue na lo na ya ti ye ti tarango be si lo yeke bata azo ti kirikiri ti fâ ngbanga na li ti ala na lango ti fango ngbanga.

¹⁰Lo yeke fâ ande ngbanga kozoni na li ti azo so ayeke sara aye ti potopoto na lege ti nzara ti aye ti kirikiri so ayeke na be ti ala si ala baa komandema ti Nzapa tongana buba ye na le ti ala. Awafango-ye ti mvene so abaa tere ti ala tongana azo so alingbi awe; baba ahon ndö ti ala, ayingo ti yayu so ayeke na gonda, azo ni akpe mbeto ti ala pepe si ala yeke zonga ala.

¹¹Ataa a-ange so ngangu ti ala ahon ti awafango-ye ti mvene so, laoko ala bi tënë ti zongango ndo na li ti ayingo ti yayu ni na le ti Kota Gbia pepe.

¹²Me sarango ye ti azo so ayeke tongana ti anyama so ahinga ndo pepe; anyama so a du ala gi titene azo agbu ala si afâ ala. Azo ni ayeke zonga ye so ala hinga nda ni pepe; fade ala yeke kui tongana anyama so.

¹³Futa so ala yeke wara ande na peko ti sarango ye ti kirikiri ti ala ni laa. Ye so anzere na be ti azo ni ayeke sarango ye ti kamene na kota lâ. Tongana ala duti na ndo oko na ala, a-ita, ti te ti nyon, so ayeke mbeni ye ti kamene si ayeke sara titene iri ti ala abuba. Azo ni ayeke wara ngia na lege ti handango ala, a-ita.

¹⁴Le ti ala ayeke za na nzara ti gingo awali; nzara ti sarango siokpari ayeke hunzi na be ti ala oko pepe. Ala yeke handa azo so be ti ala ade ti kpengba pepe; nzara ti warango ye ti ala ahon ti azo kue. Ala yeke azo so a deba ala awe!

¹⁵Ala do lege ti mbirimbiri azia awe, ala girisa lege si ala mu peko ti Balaam, molenge ti Bosor. Balaam ayeda ti wara nginza titene lo sara ye ti sioni.

¹⁶Me a gboto mê ti lo ndali ti ngangu li ti lo: mbeni lele, nyama so ayeke tene ka tënë pepe, amu go ti zo ti tene tënë, ti kanga lege na wayanga-Nzapa so li ti lo ayeke daa pepe so.

¹⁷Awafango-ye ti mvene so ayeke tongana ali ti ngu so ahole, ala yeke tongana ambinda so kota pupu ayeke hon na ni. Nzapa aleke ndo so avuko pitipiti ti ku na ala.

¹⁸Ala yeke diko gba ti tënë, me ayeke gi asenge senge tënë, ala yeke handa azo so asigigi gi fafadeso na popo ti azo so agirisa lege awe. Awafango-ye ti mvene ayeke mu asioni nzara ti sarango ye ti kamene so ayeke na be ti ala ti gbu azo ni na ya ti gbanda ti ala.

¹⁹Ala yeke mu zendo na azo atene, fade ala yeke zi azo ni na gbe ti ngbaa. Andaa ala wani ayeke angbaa ti aye so ayeke gboto ala ti gue na ala na kuâ, ngbanga ti so zo ayeke ngbaa ti ye so nzara ni ahon ndö ti lo.

²⁰Azo so azi tere ti ala awe na ya ti aye ti potopoto ti dunia na lege so ala hinga Jésus Christ, Kota Gbia ti e na Wasongo e, tongana ala kiri ayoro tere ti ala na ya ti aye ti potopoto ni titene ahon ndö ti ala si akanga ala, fade dutingo ti ala ayeke ga sioni mingi ahon ti kozoni.

²¹Ti azo ni so, ayeke fade nzoni titene ala hinga lege ti mbirimbiri pepe. Sioni ni ayeke so, ala hinga lege ni awe si na pekoni, ala do lege ti atënë ti ndia ti Nzapa so a fa na ala kozoni so azia.

²²Ye so asi na ala alingbi na toli so ayeke taa-tënë; toli ni atene: “Mbo akiri na tere ti kobe so lo de na sese awe” si “nguru so a sukula lo fafadeso, akiri ati na ya ti potopoto.”