Read sango 1 Jean 2 Bible Online

1 Jean 2 - sango bible

1 Jean 2

¹Amolenge ti mbi, mbi su mbeti so na ala titene ala sara siokpari pepe. Me tongana mbeni zo asara siokpari, e yeke na mbeni wagbungo-koko na tere ti Babâ: Jésus Christ, lo so lo yeke mbirimbiri.

²Jésus Christ amu tere ti lo na *sandaga ti zi asiokpari ti e; gi asiokpari ti e oko pepe, me ti azo ti dunia kue.

³Tongana e yeke sara ye alingbi na andia ti Nzapa, so afa atene, e hinga Nzapa biani.

⁴Tongana mbeni zo atene: “Mbi hinga Nzapa”, me lo sara ye alingbi na andia ti Nzapa pepe, andaa lo yeke zo ti mvene, taa-tënë ayeke na be ti lo pepe.

⁵Me zo so ayeke sara ye alingbi na tënë ti Nzapa, andaa ndoye so ayeke na be ti lo ndali ti Nzapa alingbi kue biani. Na lege so laa e lingbi ti hinga, e tene, e ga oko na Nzapa.

⁶Zo so atene ni ga oko na Nzapa, alingbi dutingo ti lo ayeke tongana ti Jésus Christ.

⁷A-ita ti mbi so mbi ye ala mingi, mbeni fini ndia laa mbi yeke su na mbeti na ala so pepe, me ayeke ngbene ndia so ala yeke na ni, ngbene ye na tongo nda ni; ngbene ndia so ayeke tënë so ala ma ni awe.

⁸Ngbene ndia so mbi su na mbeti na ala so ayeke nga fini ndia si aga taa-tënë na ya ti fini ti Christ na ti ala, ngbanga ti so vukongo ndo ayeke hon si taa lumiere aza fadeso.

⁹Zo so atene, ni yeke na ya ti lumiere si be ti lo angba ti ke ita ti lo, andaa lo ngba na ya ti vukongo ndo.

¹⁰Zo so aye ita ti lo, andaa lo ngba na ya ti lumiere; na be ti lo, mbeni ye ti sara si lo ti ayeke daa pepe.

¹¹Me zo so be ti lo ake ita ti lo, andaa lo yeke na ya ti vukongo ndo; lo yeke tambula na ya ti vukongo ndo, lo hinga ndo so lo yeke gue daa pepe, ngbanga ti so vukongo ndo ni avuko le ti lo awe.

¹²Amolenge ti mbi, mbi su mbeti so na ala, mbi tene: “Nzapa azi asiokpari na li ti ala awe ndali ti iri ti Jésus.”

¹³Ababâ, mbi su mbeti so na ala, mbi tene: “Ala hinga awe lo so ayeke ngbene ye na tongo nda ni.” Amaseka, mbi su mbeti so na ala, mbi tene: “Ala hon ndö ti Sioni wato awe.”

¹⁴Amolenge, mbi su mbeti so na ala, mbi tene: “Ala hinga Babâ awe.” Ababâ, mbi su mbeti so na ala, mbi tene: “Ala hinga awe lo so ayeke ngbene ye na tongo nda ni.” Amaseka, mbi su mbeti so na ala, mbi tene: “Ala yeke ngangu, tënë ti Nzapa aduti na be ti ala si ala hon ndö ti Sioni wato awe.”

¹⁵Ala ye dunia so pepe, wala aye ti dunia ni. Zo so aye dunia so, andaa lo ye Babâ pepe.

¹⁶Aye ti dunia ni, so ti tene asioni nzara ti be ti zo, sarango nzara ti aye so anzere na le ti zo nga na baba so azo ayeke sara ndali ti aye so ala wara, aye so kue alondo na Babâ pepe, me alondo na dunia so.

¹⁷Dunia so ayeke hon, aye so zo ayeke sara nzara ni nga ayeke hon; me zo so asara ye so be ti Nzapa aye, fade lo yeke ngba na fini kpu na kpu.

¹⁸Amolenge ti mbi, ngbonga ti ndani alingbi awe! Ala ma ando atene, Wato ti Christ ayeke ga. Andaa awato ti Christ asi singo fadeso. Tongaso e hinga, e tene, ngbonga ti ndani alingbi awe.

¹⁹Azo ni so ayeke azo ti e pepe, nilaa ala londo na popo ti e si ahon. Tongana azo ni ayeke fade azo ti e, ka ala ngba na popo ti e. Me ala zia e ahon ti fa polele na le ti azo atene, mbeni zo oko na popo ti ala ayeke zo ti e pepe.

²⁰Ti ala, a-ita, ala wara Yingo-Vuru so Christ amu na ala si ala kue ahinga taa-tënë awe.

²¹Mbi su mbeti so na ala pepe, ngbanga ti so ala hinga taa-tënë pepe, me mbi su mbeti so na ala, ngbanga ti so ala hinga taa-tënë awe. Ala hinga nga so mbeni tënë ti mvene oko ayeke londo na ya ti taa-tënë ti sigigi pepe.

²²Tongaso, zo wa laa ayeke zo ti mvene, zo wa? Zo ti mvene ayeke lo so atene, Jésus ayeke Christ pepe. Zo so ayeke wato ti Christ, lo ke Babâ na Molenge ni kue.

²³Zo so ake Molenge ni, andaa lo ke nga Babâ ni awe; zo so ayamba Molenge ni, andaa lo yeke nga na Babâ ni.

²⁴Ndani laa, a-ita, ayeke nzoni ala bata na be ti ala tënë so ala ma ngbene ye na tongo nda ni. Tongana ala bata na be ti ala tënë so ala ma ngbene ye na tongo nda ni, fade ala yeke ngba ti duti oko na Molenge ni nga na Babâ ni.

²⁵Ye so Christ amu zendo ti mu na e ayeke fini so angba lakue lakue.

²⁶Tënë so mbi ye fade ti su na mbeti na ala na ndö ti azo so ayeke gi lege ti handa ala laa.

²⁷Me ti ala, a-ita, Yingo so Christ amu na ala angba na ya ti ala. Akpa titene mbeni zo akiri afa ye fango na ala pepe, ngbanga ti so Yingo ni ayeke fa na ala ye kue: ye so lo yeke fa ayeke taa-tënë, lo yeke tene mvene pepe. Ndani laa, ayeke nzoni ala ngba ti duti oko na Christ tongana ti so Yingo afa na ala.

²⁸Tongaso, amolenge ti mbi, ala ngba ti duti oko na Christ, tongaso si na lango ti gango ti lo, be ti e ado pepe, e duti yongoro na lo pepe si kamene agbu e na lango ni so pepe.

²⁹Ala hinga atene, Christ ayeke mbirimbiri. Tongaso, alingbi ala hinga nga atene, zo so asara ye ti mbirimbiri, lo yeke molenge ti Nzapa.