Read sango 1 Jean 3 Bible Online

1 Jean 3 - sango bible

1 Jean 3

¹Ala baa yengo so Babâ aye na e! Lo ye e ahon ndoni, ndani laa, a yeke iri e amolenge ti Nzapa. Biani, e yeke amolenge ti lo! Me azo ti dunia so ahinga e pepe, ngbanga ti so ala hinga Nzapa pepe.

²A-ita ti mbi so mbi ye ala mingi, fadeso e yeke amolenge ti Nzapa, me dutingo ti e ti gbanda angba na hondengo ni. Me e hinga, e tene, tongana Christ asi ande, e yeke ga tongana lo, ngbanga ti so e yeke baa taa lo wani.

³Zo so kue azia be ti lo ti ku ye so na maboko ti Christ, lo yeke sara titene lo ga *nzoni tongana ti so Christ ayeke *nzoni.

⁴Zo so kue ayeke sara siokpari, lo ke ndia ti Nzapa awe, ngbanga ti so sarango siokpari ayeke kengo ndia.

⁵A-ita, ala hinga atene, Jésus aga ti zi asiokpari ti azo; siokpari ayeke na lo oko pepe.

⁶Tongaso, zo so kue aduti oko na lo, zo ni azia lege ti sarango siokpari awe; zo so kue angba ti sara siokpari, lo de ti baa Christ wala ti hinga lo pepe.

⁷Amolenge ti mbi, ala zia mbeni zo ahanda ala pepe! Zo so ayeke sara ye ti mbirimbiri, lo yeke zo ti mbirimbiri, tongana ti so Jésus ayeke mbirimbiri.

⁸Zo so ayeke sara siokpari, lo yeke zo ti Zabolo, ngbanga ti so Zabolo ayeke sara siokpari, ngbene ye na tongo nda ni. Molenge ti Nzapa aga mbirimbiri ti buba aye so Zabolo ayeke sara.

⁹Zo so kue Nzapa adu lo, lo zia lege ti sarango siokpari awe, ngbanga ti so fini so alondo na Nzapa angba na ya ti lo. Lo lingbi ti ngba ti sara siokpari pepe, ngbanga ti so Nzapa si adu lo.

¹⁰Ye so ayeke fa atene, zo ayeke molenge ti Nzapa wala molenge ti Zabolo ayeke so: zo so ayeke sara ye ti mbirimbiri pepe, wala lo ye ita ti lo pepe, lo yeke zo ti Nzapa pepe.

¹¹Tënë so ala ma, ngbene ye na tongo nda ni ayeke so: alingbi e ye tere na popo ti e.

¹²E sara ye tongana Kain pepe: lo yeke zo ti Sioni wato si lo fâ ita ti lo Abel. Ngbanga ti nyen si lo fâ lo? Ngbanga ti so ye so Kain ayeke sara, ayeke sioni si ti ita ti lo ayeke mbirimbiri.

¹³A-ita, tongana azo ti dunia so ake ala, ayeke nzoni li ti ala akpe pepe.

¹⁴Ti e, e hinga, e tene, e sigigi na gbe ti ngangu ti kuâ awe si e yeke na fini; e hinga ni, ngbanga ti so e ye a-ita ti e. Zo so aye ita ti lo pepe, andaa lo ngba na gbe ti ngangu ti kuâ.

¹⁵Zo so ake ita ti lo, lo yeke zo ti fango zo. Ala hinga kue, fini so angba lakue lakue ayeke duti ye ti zo ti fango zo pepe.

¹⁶Ndoye ayeke nyen? Ye so e yeke hinga ndoye na ni ayeke so: Jésus Christ aka fini ti lo ndali ti e. Tongaso e nga, alingbi e ka fini ti e ndali ti a-ita ti e.

¹⁷Tongana mbeni zo ayeke na amosoro ti dunia so, lo baa mbeni ita ti lo so ye atia lo si lo ke ti sara nzoni na ita ti lo ni, fade lo yeke tene, ni ye Nzapa biani laa?

¹⁸Amolenge ti mbi, e ye tere gi na lege ti tënë ti yanga pepe; me e ye tere na lege ti aye so e yeke sara nga na lege ti taa-tënë.

¹⁹Lege so e yeke hinga, e tene, e yeke azo ti taa-tënë laa; lege so be ti e ade na gbe ti Nzapa laa.

²⁰Biani, tongana be ti e ayeke bi tënë na li ti e, e hinga so Nzapa ayeke kota ahon be ti e si lo hinga ye kue.

²¹A-ita ti mbi so mbi ye ala mingi, tongana be ti e ayeke bi tënë na li ti e pepe, e yeke zia be ti e kue kue kue na ndö ti Nzapa.

²²Ye so kue e hunda na lo, e yeke wara ni, ngbanga ti so e yeke sara ye alingbi na andia ti lo si e yeke sara ye so anzere na be ti lo.

²³Ndia ti lo ayeke so: e ma na be na iri ti Molenge ti lo Jésus Christ si e ye nga tere na popo ti e alingbi na yanga so Christ amu na e.

²⁴Zo so asara ye alingbi na andia ti Nzapa, lo ga oko na Nzapa si Nzapa aga oko na lo. Ye so afa atene, Nzapa aga oko na e ayeke so: lo mu na e Yingo-Vuru.