Read sango Awafango-ngbanga 1 Bible Online

Awafango-ngbanga 1 - sango bible

Awafango-ngbanga 1

¹Na peko ti kuâ ti Josué, azo ti Israel ahunda *KOTA GBIA, atene: “Mara wa laa na popo ti e ayeke gue kozo ti sara bira na azo ti Kanaan?”

²KOTA GBIA akiri tënë na ala: “Mara ti Juda laa ayeke gue; mbi zia kodro ni na maboko ti ala awe.”

³Azo ti mara ti Juda atene na a-ita ti ala azo ti mara ti Siméon: “Ala londo, e na ala e gue, e mu ndo so a mu na e ti ga ti e so, e yeke sara bira na azo ti Kanaan! Na pekoni, fade e na ala, e yeke gue ti mu sese ti ala.” Azo ti mara ti Siméon ayeda si ala na azo ti mara ti Juda ague.

⁴Azo ti mara ti Juda na ti Siméon alondo na bira na tere ti azo ti Kanaan nga na azo ti Perizi. KOTA GBIA azia azo ni na maboko ti ala; ala fâ azo saki baleoko na gbata ti Bezek.

⁵Na Bezek, ala wara gbia Adoni-Bezek, ala sara bira na lo si ala so benda na ndö ti azo ti Kanaan na ti Perizi.

⁶Adoni-Bezek akpe; ala tumba peko ti lo si ala gbu lo, ala fâ akota li ti maboko ti lo na ti gere ti lo.

⁷Adoni-Bezek atene: “Agbia balembarambara so mbi fâ akota li ti maboko ti ala na ti gere ti ala ayeke ro lani anduru mapa so ati na gbe ti meza ti mbi. Ye so mbi sara so laa Nzapa akiri peko ni na mbi so!” A mu Adoni-Bezek, ague na lo na Jérusalem si lo kui kâ.

⁸Azo ti Juda atiri bira na azo ti Jérusalem si ala mu gbata ni, ala fâ azo ni kue na yongoro zeme ala bi nga wâ na gbata ni.

⁹Na pekoni, azo ti Juda ague, atiri bira na azo ti Kanaan so ayeke lango na ndo so ahoto ayeke daa. Ala gue nga atiri bira na ala so ayeke lango na mbage ti Mbongo nga na ala so ayeke na *Kodro-ti-gbeni.

¹⁰Ala gue, atiri bira na azo ti Kanaan so ayeke lango na gbata ti Hebron. Ando, iri ti gbata ni ayeke Kiriat-Arba. Kâ, ala fâ azo ti kete mara ti Sheshai, Ahiman na Talmai.

¹¹Ala londo na ndo so si ala gue, atiri bira na azo ti Debir. Ando, iri ti gbata ni ayeke Kiriat-Sefer.

¹²Kaleb atene: “Zo so ayeke tiri na Kiriat-Sefer ti mu kodro ni, fade mbi yeke mu na lo Aksa, molenge ti mbi ti wali titene lo ga wali ti lo.”

¹³Otniel, molenge ti Kenaz so ayeke ngambe ti Kaleb ague, amu gbata ti Kiriat-Sefer. Tongaso Kaleb amu na lo molenge ti lo Aksa si aga wali ti lo.

¹⁴So Aksa aga na da ti Otniel awe, lo pusu Otniel titene lo hunda yaka na maboko ti babâ ti lo. Aksa alondo na ndö ti lele ti lo azu na sese si Kaleb ahunda lo: “Mo ye nyen?”

¹⁵Lo kiri tënë na lo: “Sara nzoni be na mbi! Sese so ayeke na Mbongo si mo mu na mbi so ayeke kuru ni. Mbi ye titene mo mu na mbi adu ti ngu nga”. Tongaso Kaleb amu na lo du ti ngu ti mbage ti nduzu na du ti ngu ti mbage ti gbeni.

¹⁶Babâ ti wali ti Moïse ayeke zo ti mara ti Keni. *Ahale ti lo na azo ti mara ti Juda alondo na gbata ti Amburu si ague na benyama ti Juda so ayeke na Mbongo ti sese ti Arad. Ala gue, asara kodro na popo ti azo ti Amalek.

¹⁷Azo ti mara ti Juda na azo ti mara ti Siméon so ayeke a-ita ti ala, alondo si ala gue, atiri bira na azo ti Kanaan so ayeke lango na gbata ti Sefat; ala fâ azo ti gbata ni si ala buba gbata ni biani biani. Iri ti gbata ni fadeso ayeke Horma, so ti tene “Lo so a buba lo biani biani”.

¹⁸Mara ti Juda ague, amu agbata ti Gaza, Askalon, Ekron na asese ti ala kue.

¹⁹KOTA GBIA wani ayeke na azo ti Juda, lo sara si ala mu sese so ahoto ayeke daa. Me ala tumba azo so alango na lando ti gbeni so pepe, ngbanga ti so azo ni ayeke na apusu ti bira so a sara na wen.

²⁰A mu gbata ti Hebron na Kaleb alingbi na tënë ti yanga ti Moïse so lo tene ando. Kaleb amu gbata ni na maboko ti akete mara ota ti Anak.

²¹Ahale ti Benjamin atumba azo ti mara ti Yebus pepe, ala yeke lango na Jérusalem. Tongaso, mara ti Yebus ni na azo ti Benjamin angba ti lango ndo oko na Jérusalem ngbii asi laso.

²²Ahale ti Joseph ague, atiri bira na gbata ti Betel; KOTA GBIA ahale ti Joseph.

²³Ala tokua azo ti gue ti *bembe ndo na ya ti gbata ni kue; ando iri ti gbata ni ayeke Luz.

²⁴Azo ti bembengo ndo ni abaa mbeni koli so alondo na gbata ni ti sigigi. Ala tene na lo: “Fa na e lege so e lingbi ti hon daa si e li na ya ti gbata ni. Fade e yeke sara nzoni be na mo.”

²⁵Koli ni afa na ala lege ti lingo na ya ti gbata ni, ala li na ya ti gbata ni si ala fâ azo ti gbata ni kue na yongoro zeme; me gi koli so, lo na asewa ti lo laa azo ni azia ala si ala hon.

²⁶Koli ni ague na kodro ti azo ti mara ti Het. Kâ, lo leke mbeni gbata so lo di iri ni Luz; iri so angba ngbii asi laso.

²⁷Mara ti Manase awara lege pepe ti mu agbata tongana: Bet-Shean, Taanak, Dor, Ibleam na Megido nga na akete kodro so ayeke na tere ni titene aga ti ala. Azo ti Kanaan angba ti lango na sese ni so.

²⁸Na ngoi so azo ti Israel aga ngangu mingi, ala yeke mu azo ti Kanaan ti sara akua ti ngbaa; me ala mu sese na maboko ti azo ti Kanaan ni pepe.

²⁹Mara ti Efraim atumba azo ti Kanaan pepe; ala so ayeke lango na Gezer angba ti lango na popo ti azo ti mara ti Efraim.

³⁰Mara ti Zabulon atumba azo ti Kanaan pepe, ala so ayeke lango na Kitron nga na Nahalal so. Ala ngba ti lango na popo ti azo ti mara ti Zabulon, me ala yeke sara kua ti ngbaa na azo ti mara ti Zabulon.

³¹Mara ti Aser atumba pepe azo so ayeke lango na gbata ti Ako, Sidon, Alab, Akzib, Helba, Afik nga na Rehob;

³²azo ti mara ti Aser angba asara kodro na azo ti Kanaan so ayeke na ya ti akodro ni so. Biani, mara ti Aser amu sese na maboko ti azo ti Kanaan pepe.

³³Mara ti Neftali atumba azo so ayeke lango na gbata ti Bet-Shemesh nga na ti Bet-Anat pepe. Ala ngba asara kodro na popo ti ala. Me azo ti Kanaan ayeke sara kua ti ngbaa na azo ti Bet-Shemesh na azo ti Bet-Anat.

³⁴Mara ti Amori atumba azo ti mara ti Dan ti gue na ndo so ahoto ayeke daa mingi; ala zia lege na ala ti zu na apopo-hoto pepe.

³⁵Azo ti mara ti Amori angba ti lango na Har-Heres, Ayalon na Shaalbim. Me na pekoni, azo ti mara ti Efraim na ti Manase aga ngangu si azo ti mara ti Amori ayeke sara kua ti ngbaa na ala.

³⁶Sese ti azo ti mara ti Amori alondo na gbe ti hoto ti Akparakongo ague ngbii asi na kodro ti azo ti Edom.