Read sango Awafango-ngbanga 10 Bible Online

Awafango-ngbanga 10 - sango bible

Awafango-ngbanga 10

¹Na peko ti kuâ ti Abimelek, Tola, molenge ti Puva, molenge ti Dodo, zo ti mara ti Isakar, alondo ti soo azo ti Israel na ya ti kpale. Tola ayeke lango na Shamir, na sese ti Efraim, ndo so ahoto ayeke daa.

²Lo duti wafango-ngbanga ti azo ti Israel ngu baleuse na ota. Na pekoni, lo kui si a lu lo na Shamir.

³Na peko ti Tola, zo so aga na peko ti lo ayeke Yair, zo ti mara ti Galaad; lo duti wafango-ngbanga ti azo ti Israel na ya ti ngu baleuse na use.

⁴Lo yeke na amolenge-koli baleota so ala kue ayeke tambula na ndö ti alele baleota. Ala yeke awa ti kodro baleota na sese ti Galaad. Azo adi iri ti akodro so Akete kodro ti Yair ngbii asi laso.

⁵Yair akui si a lu lo na Kamon.

⁶Azo ti Israel akiri asara ye so ayeke sioni na le ti *KOTA GBIA: ala voro anzapa *Baal na *Astarte. Ala voro nga anzapa ti azo ti Sirii, ti Sidon, ti Moab, ti Amon na ti azo ti Filistii. Ala do KOTA GBIA azia si ala kiri avoro lo pepe.

⁷Ngonzo ti KOTA GBIA alondo tongana wâ na tere ti azo ti Israel, lo zia ala na maboko ti azo ti Filistii na ti azo ti Amon.

⁸Ti londo na ngu ni so nga na ya ti ngu baleoko na miombe, azo ni asara sana mingi na azo ti Israel so ayeke lango na sese ti azo ti Amori so ayeke na sese ti Galaad, ndo so ayeke na mbage ti ngu ti Jourdain.

⁹Azo ti Amon afâ ngu ti Jourdain ti sara bira na azo ti Juda, ti Benjamin na ti Efraim. Ti azo ti Israel, ala yeke na ya ti kota kpale.

¹⁰Azo ti Israel adekongo na mbage ti KOTA GBIA titene lo soo ala; ala tene: “E sara siokpari so ake mo, ngbanga ti so e zia mo, mo so mo yeke Nzapa ti e, ti voro anzapa Baal.”

¹¹KOTA GBIA akiri tënë na ala: “Ando azo ti Ezipte, ti Amori, ti Amon, ti Filistii,

¹²ti Sidon, ti Amalek na azo ti Maon asara ngangu na ala; ala azo ti Israel, ala dekongo na mbage ti mbi titene mbi mu maboko na ala. Mbi soo ala lani pepe?

¹³Me ti ala, ala do mbi azia ti voro anzapa nde. Ndani laa mbi yeke kiri ti soo ala pepe.

¹⁴Ala gue! Ala dekongo na anzapa so ala soro ala so ma! Anzapa ni asoo ala na ngoi so ala yeke na ya ti kpale ma!”

¹⁵Azo ti Israel akiri tënë na KOTA GBIA: “E sara siokpari awe. Sara na e tongana ti so be ti mo aye; me mo soo e laso si!”

¹⁶Na pekoni, azo ti Israel aga azi anzapa ti awande so ayeke na popo ti ala, ala kiri avoro KOTA GBIA. Tongaso, KOTA GBIA akanga be ti lo gbaa na ndö ti pasi so azo ti Israel ayeke baa.

¹⁷Azo ti Amon abongbi si ala sara bâbâ ti ala na sese ti Galaad. Azo ti Israel abongbi si ala sara bâbâ ti ala na Mispa.

¹⁸Tongaso, azo ti Galaad na amakonzi ti ala atene na popo ti ala: “Zo wa laa ayeke londo kozo ti sara bira na azo ti Amon, zo wa? Zo ni so ayeke ga ande makonzi na ndö ti azo ti Galaad kue.”