Read sango Awafango-ngbanga 12 Bible Online

Awafango-ngbanga 12 - sango bible

Awafango-ngbanga 12

¹Azo ti Efraim abongbi tere ti ala, ala gue, afâ ngu ti Jourdain, ala si na Safon. Ala tene na Yefte: “Ngbanga ti nyen laa mo gue, mo sara bira na azo ti Amon si mo iri e pepe titene e na mo, e gue pepe so? E yeke gbi mo na da ti mo kue.”

²Yefte akiri tënë na ala: “Mbi na azo ti mbi, e wara kota tënë na azo ti Amon. Mbi iri ala, azo ti Efraim, me ala soo mbi na maboko ti ala pepe.

³So mbi baa mbi tene, ala ga ti soo mbi pepe, mbi ka tere ti mbi na kuâ, mbi gue, mbi sara bira na azo ti Amon si *KOTA GBIA azia ala na maboko ti mbi. Ngbanga ti nyen si ala ga fadeso ti tiri bira na mbi?”

⁴Tongaso Yefte abongbi azo ti Galaad kue si lo gue, lo tiri bira na azo ti Efraim. Azo ti Galaad aso benda na ndö ti azo ti Efraim. Andaa azo ti Efraim atene lani, atene: “Ala, azo ti Galaad, ala yeke azo so alondo na popo ti azo ti Efraim si ala kpe, ague, aduti na popo ti azo ti Manase.”

⁵Na pekoni, azo ti Galaad ague si ala kanga ndo so a yeke fâ ngu ti Jourdain daa na gere; ala kanga lege na azo ti Efraim. Tongana mbeni zo ti Efraim akpe, asi na ndo so si lo ye ti fâ ngu, ala yeke hunda lo: “Mo yeke zo ti Efraim?” Tongana lo tene: “Ên-en”,

⁶ala yeke mu yanga na lo ti tene: “Shibolet”. Zo so atene: “Sibolet”, andaa lo tene ni na legeni pepe, ngbanga ti so tenengo ni akara lo. Tongaso, ala yeke gbu lo, ala fâ lo na ndo so a yeke fâ ngu ti Jourdain daa na gere so. Azo ti Efraim saki baleosio na use akui na ngoi ni so.

⁷Yefte, zo ti Galaad, aduti wafango-ngbanga ngu omene na Israel. Na pekoni lo kui si a lu lo na sese ti Galaad, na ya ti agbata ti Galaad.

⁸Na peko ti Yefte, Ibsan, zo ti Betlehem laa aga wafango-ngbanga na Israel.

⁹Lo du amolenge-koli baleota nga na amolenge-wali baleota. Lo mu amolenge-wali ni na akoli ti mbeni mara nde, lo mu nga awali ti mbeni mara nde ti mu ala na amolenge ti lo ti koli. Ibsan aduti wafango-ngbanga ngu mbarambara na Israel.

¹⁰Na pekoni Ibsan akui si a lu lo na Betlehem.

¹¹Na peko ti Ibsan, Elon, zo ti mara ti Zabulon aga wafango-ngbanga na Israel; lo duti wafango-ngbanga ngu baleoko.

¹²Na pekoni Elon akui si a lu lo na Ayalon, na sese ti Zabulon.

¹³Na peko ti Elon, Abdon, molenge ti Hilel, zo ti gbata ti Piraton aga wafango-ngbanga na Israel.

¹⁴Abdon ayeke na amolenge-koli baleosio nga na atara baleota; ala yeke ko na ndö ti alele balembarambara. Abdon aduti wafango-ngbanga ngu miombe na Israel.

¹⁵Na pekoni lo kui si a lu lo na Piraton, na hoto ti azo ti Amalek, na sese ti Efraim.