Read sango Awafango-ngbanga 14 Bible Online

Awafango-ngbanga 14 - sango bible

Awafango-ngbanga 14

¹Mbeni lâ, Samson alondo si lo gue na gbata ti Timna. Kâ, lo baa mbeni maseka-wali na popo ti amolenge-wali ti azo ti Filistii.

²So lo kiri na kodro awe, lo tene tënë ni na babâ nga na mama ti lo. Lo tene na ala: “Na Timna, mbi baa mbeni maseka-wali na popo ti amolenge-wali ti azo ti Filistii. Mbi ye ala mu lo na mbi titene lo ga wali ti mbi.”

³Babâ na mama ti lo atene na lo: “Na ya ti kete mara ti mo wala na popo ti azo ti e, mo wara mbeni maseka-wali pepe si mo gue ti mu wali gi na popo ti azo ti Filistii, azo so ahinga Nzapa pepe so?” Samson akiri tënë na babâ ti lo, atene: “Mu lo na mbi, ngbanga ti so lo laa lo nzere na be ti mbi.”

⁴Babâ na mama ti lo ahinga pepe atene, *KOTA GBIA laa ayeke pusu Samson ti sara ye so. Biani, lo yeke gi mbeni lege titene lo sara bira na azo ti Filistii. Na ngoi ni so, azo ti Filistii laa ayeke na ndö ti azo ti Israel.

⁵Samson, na babâ na mama ti lo ague na Timna. So ala si na yaka ti vinye so ayeke nduru na Timna awe, mbeni bamara atoto, ahuru aga na mbage ti lo.

⁶Yingo ti KOTA GBIA aga na ndö ti Samson. Ataa so ye oko ayeke na maboko ti lo pepe, lo gbu bamara ni si lo suru ya ti lo tongana senge molenge ti ngasa. Me lo honde tënë ti ye so lo sara so na babâ na mama ti lo.

⁷Lo gue, lo sara lisoro na wali ni; wali ni anzere na be ti lo mingi.

⁸Lango kete na pekoni, lo kiri na Timna ti mu wali ni. Na guengo ti lo, lo ngoro titene lo baa kuâ ti bamara ni. Gba ti awotoro na mafuta ti wotoro ayeke na ya ti kuâ ti bamara ni.

⁹Lo mu mbeni mafuta ni na maboko ti lo si lo yeke te ni na lege. So lo si na tere ti babâ na mama ti lo awe, lo mu mbeni na ala, ala te. So lo zi mafuta ti wotoro so na ya ti kuâ ti bamara so, lo tene nga tënë ni na babâ na mama ti lo pepe.

¹⁰Babâ ti Samson ague na ndo ti wali ni; Samson asara mbeni matanga tongana ti so amaseka-koli ayeke sara ka lakue.

¹¹So azo ti Filistii abaa lo awe, ala mu na lo amaseka-koli baleota ti duti na tere ti lo.

¹²Samson atene na ala: “Mbi ye ti tene na ala mbeni toli. Tongana ala sigigi na nda ti toli so kozo titene lango mbarambara ti matanga ni alingbi, fade mbi yeke mu na ala apendere bongo ti *len baleota, na abongo baleota ti matanga.

¹³Me tongana ala sigigi na nda ni pepe, ala laa ayeke mu na mbi apendere bongo ti len baleota na abongo baleota ti matanga.” Ala tene na lo: “Tene toli ti mo ni, e ma!”

¹⁴Samson atene na ala: “Ye ti tengo ni asigigi na ya ti lo so lo yeke te ye; nzerengo ye asigigi na ya ti lo so lo yeke ngangu. Ye ni so ayeke nyen?” Na ya ti lango ota, ala sigigi na nda ti toli ni pepe.

¹⁵Na lango mbarambara ni, ala tene na wali ti Samson: “Mo handa koli ti mo titene lo sigigi na e nda ti toli ni! Tongaso pepe, fade e yeke gbi mo na da ti babâ ti mo kue. Ala tisa e na matanga ni titene ala nzi aye ti e kue?”

¹⁶Wali ti Samson ague na peko ti koli ti lo na toto, lo tene: “Mo ye mbi oko pepe, mo ke mbi awe. Mo tene mbeni toli na azo ti kodro ti mbi, me mo sigigi na nda ni na mbi pepe!” Samson atene na lo: “Ataa babâ na mama ti mbi, mbi de ti sigigi na nda ni na ala pepe, mbi lingbi ti sigigi na nda ni na mo tongana nyen?”

¹⁷Na ya ti lango mbarambara ti matanga ni kue, wali ti Samson awoko lo na toto. Tongaso, na lango mbarambara ni, Samson asigigi na nda ti toli ni na wali ti lo, ngbanga ti so wali ni aso mê ti lo mingi. Wali ni ague, atene peko ni na azo ti kodro ti lo.

¹⁸Na lango mbarambara ni, kozo titene lâ akui, azo ti gbata ni aga si ala tene na Samson: “Nyen laa anzere ahon mafuta ti wotoro, nyen? Nyen laa ayeke ngangu ahon bamara, nyen?” Samson akiri tënë na ala: “Tongana ala fâ fade yaka na kete bagara ti mbi pepe, ka ala lingbi ti hinga nda ti toli ti mbi ni pepe.”

¹⁹Yingo ti KOTA GBIA aga na ndö ti Samson si lo zu na Askalon. Lo fâ akoli baleota na Askalon, lo mu abongo ti ala si lo gue, lo mu ni tongana abongo ti matanga na azo so asigigi na nda ti toli ti lo so. Ngonzo amu lo mingi si lo kiri na da ti babâ ti lo.

²⁰Âdu ti wali ti Samson, a mu lo na mbeni maseka-koli so azo amu lo ti duti na tere ti lo na lango ti matanga ni.