Read sango Awafango-ngbanga 15 Bible Online

Awafango-ngbanga 15 - sango bible

Awafango-ngbanga 15

¹Ambeni lango na pekoni, na ndembe ti fango ale ti *ble, Samson ague ti baa wali ti lo; lo mu kete ngasa, lo gue na ni. So lo si kâ awe, lo hunda ti li na ya ti kubu ti wali ti lo; me babâ ti wali ti lo akanga lege na lo, lo tene:

²“Mbi baa ti mbi, mbi tene, mo ke lo awe, ndani laa mbi mu lo na maseka-koli so a mu lo ti duti na tere ti mo na ya ti matanga ni. Me ngambe ti lo ayeke daa so lo yeke pendere ahon lo, mo lingbi ti mu lo senge!”

³Samson atene na ala: “Ti so ni, azo alingbi ti zia tënë na li ti mbi pepe tongana mbi sara sana na azo ti Filistii!”

⁴Samson ague, lo gbu ambo ti ngonda ngbangbo ota. Lo kanga ala use na use na mbage ti damba ti ala. Lo mu *tanda, lo zia na popo ti damba ti ala ni.

⁵Na pekoni, lo zia wâ na atanda ni, lo zi anyama ni si ala gue na ya ti ayaka ti *ble ti azo ti Filistii. Wâ agbi ale ti ble so a fâ ni awe nga na ale ti ble so angba na ndö ti gere ni. Wâ agbi nga ayaka ti *vinye na ti keke ti olive.

⁶Azo ti Filistii ahunda ndo, atene: “Zo wa laa asara ye so, zo wa?” Azo akiri tënë na ala, atene: “Samson, kogara ti zo ti Timna so laa asara ye ni, ngbanga ti so kogara ti lo azi wali ti lo na maboko ti lo si lo mu wali ni na maseka-koli so aduti na tere ti Samson na ya ti matanga.” Tongaso, azo ti Filistii ague si ala gbi wali ni, lo na babâ ti lo.

⁷Samson atene na ala: “So ala sara ye tongaso so, mbi yeke zia lege ti ala pepe, ngbii mbi kiri peko ti sioni ti ala na ala si.”

⁸Lo tiri bira na ala si lo fâ ala sioni sioni. Na pekoni, lo gue, lo duti na ya ti du ti têne ti Etam.

⁹Azo ti Filistii ague, asara bâbâ ti ala na sese ti Juda, ala mu ndo ngbii asi na Lehi.

¹⁰Azo ti Juda ahunda ala: “Ala ga ti sara bira na e ngbanga ti nyen?” Azo ti Filistii akiri tënë na ala, atene: “E ga ti gbu Samson titene e sara na lo gi mara ti ye so lo sara na e so.”

¹¹Azo ti Juda saki ota ague na du ti têne ti Etam. Ala tene na Samson: “Mo hinga, mo tene, e yeke na gbe ti azo ti Filistii pepe? Baa nga mara ti ye so mo sara na e so!” Lo kiri tënë na ala, lo tene: “Mbi sara na azo ti Filistii gi mara ti ye so ala sara na mbi so.”

¹²Azo ti Israel akiri atene na lo: “E ga ti kanga mo, ti zia mo na maboko ti azo ti Filistii.” Lo tene na ala: “Ala deba yanga ti ala na mbi so fade ala wani ayeke fâ mbi pepe.”

¹³Ala kiri tënë na lo: “Ên-en, e yeke fâ mo pepe! E ye ti kanga gi mo ti zia mo na maboko ti azo ti Filistii.” Ala mu afini kamba use, ala kanga na lo si ala sigigi na lo na ya ti du ti têne ni.

¹⁴So Samson asi na Lehi awe, azo ti Filistii amu loro ti ga na tere ti lo na dekongo na ngia. Tongaso, yingo ti *KOTA GBIA aga na ndö ti Samson: akamba so a kanga na maboko ti lo so aga tongana kamba ti *len so wâ agbi ni si ati.

¹⁵Samson abaa bio ti ngbangba ti lele so akui aninga pepe, lo yoro maboko ti lo, lo mu ni si lo fâ na azo saki oko.

¹⁶Na pekoni Samson atene: “Na bio ti ngbangba ti lele, mbi fâ azo saki oko; na bio ti ngbangba ti lele, mbi bongbi kuâ ti azo.”

¹⁷Na peko ti tënë so, lo mu bio ni si lo bi ni. Ndani laa a di iri ti ndo ni so Ramat-Lehi, so ti tene “hoto ti Bio-ti-ngbangba”.

¹⁸Nzara ti ngu ahon ndö ti lo; tongaso lo toto na KOTA GBIA, lo tene: “Mo laa mo sara si mbi, zo ti kua ti mo, mbi so benda na ndö ti azo so. Fade mo yeke zia mbi titene mbi kui nzara ti ngu, titene mbi ti na maboko ti azo so asara na Nzapa pepe so?”

¹⁹Tongaso Nzapa asuru ya ti kota têne so du ayeke na ya ni si ayeke na Lehi; ngu asigigi na ya ni. Samson anyon ngu ni si lo kiri lo wara ngangu. Ndani laa a di iri ti li ti ngu so “Li ti ngu ti Kore”; li ti ngu ni angba ngbii asi laso.

²⁰Na ngoi ti azo ti Filistii, Samson aduti wafango-ngbanga ngu baleuse na Israel.