Read sango Awafango-ngbanga 16 Bible Online

Awafango-ngbanga 16 - sango bible

Awafango-ngbanga 16

¹Samson ague na gbata ti Gaza. Kâ, lo baa mbeni wali-ndumba si lo li na da ti lo.

²Azo ti Gaza ama a tene, Samson asi na ndo so awe. Tongaso, azo ti Gaza angoro ndo ni so, ala hara lo na bi ni kue na yanga ti gbagba ti gbata ni. Ala duti gi kpoo, ala tene na be ti ala, atene: “E ku ngbii, tongana ndo ahan awe si e fâ lo.”

³Me Samson alango ngbii asi na be ti bi. Na be ti bi ni, lo londo lo gbu akeke ti le ti yanga ti gbagba ni, na akadere ni use kue nga na angbongboro wen so a yeke kanga na yanga ti gbagba ni, lo gboto ni kue, lo zia na ndö ti go ti lo, lo gue na ni ngbii lo bi na li ti hoto so ayeke baa ndo na gbata ti Hebron.

⁴Na pekoni, Samson aye mbeni wali so iri ti lo Dalila; lo yeke lango na popo-hoto ti Sorek.

⁵Agbia oku ti azo ti Filistii aga si ala tene na Dalila: “Mo handa Samson titene lo fa na mo ndo so kota ngangu ti lo alondo daa, tongaso si e lingbi ti gbu lo, e kanga lo si e hon ndö ti lo. Fade e oko oko kue, e yeke mu na mo ale ti nginza saki oko na ngbangbo oko.”

⁶Dalila ahunda Samson, atene: “Mbi gbu gere ti mo, kota ngangu ti mo so alondo na ndo wa? Nyen laa a lingbi ti kanga mo na ni si a hon ndö ti mo?”

⁷Samson akiri tënë na lo: “Tongana a kanga mbi na afini kamba mbarambara ti gere ti bagara, akamba so ade ti hole pepe, mbi yeke woko si mbi ga tongana senge zo.”

⁸Agbia ti azo ti Filistii aga na Dalila afini kamba mbarambara ti gere ti bagara, akamba so ade ti hole pepe. Dalila akanga Samson na akamba ni.

⁹Andaa Dalila ahonde azo na ya ti kubu ti lo. Lo dekongo, lo tene: “Samson, azo ti Filistii ayeke ga ti tiri na mo!” Samson afâ ya ti akamba ni, mo baa mo tene, kamba ti bongo so wâ agbi ni. Tongaso, zo oko ahinga nda ti ngangu ti lo pepe.

¹⁰Dalila atene na Samson: “Mo handa mbi si mo tene gi mvene na mbi. Ayeke nzoni mo fa na mbi fadeso mara ti kamba wa laa alingbi ti kanga mo na ni.”

¹¹Samson atene na lo: “Tongana a kanga mbi na fini kamba so ade ti kanga na ye laoko pepe, mbi yeke woko kue si mbi yeke ga tongana senge zo.”

¹²Dalila amu fini kamba so ade ti kanga ye na ni laoko pepe si akanga na Samson. Na pekoni, lo dekongo, lo tene: “Samson, azo ti Filistii ayeke ga ti tiri na mo!” Andaa azo ti Filistii ahonde tere ti ala na ya ti kubu ti Dalila. Me Samson afâ ya ti akamba ni, mo baa mo tene, senge kamba ti li.

¹³Dalila atene na Samson: “Lawa laa mo yeke zia ti handa mbi, ti tene mvene na mbi? Fadeso, fa na mbi kamba so mbirimbiri alingbi ti kanga na mo.” Samson akiri tënë na lo: “Tongana mo mu kua ti li ti mbi so a sara na pete mbarambara, mo kanga na tere ti akamba ti masini ti sarango na bongo, mbi yeke woko ande si mbi yeke ga tongana senge zo.”

¹⁴Dalila awoko Samson na lango; lo mu kua ti li ti Samson mbarambara so a sara na pete so, lo kanga ni na tere ti akamba ti masini ti sarango na bongo. Na pekoni lo dekongo, lo tene: “Samson, azo ti Filistii ayeke ga ti tiri na mo!” Samson azingo na lango; lo gboto keke ti sarango na abongo ni, na masini ni nga na akamba ti sarango na bongo ni kue.

¹⁵Dalila atene na lo: “Mo tene mo ye mbi; ngbanga ti nyen laa mo mu be ti mo kue na mbi pepe so? Mo handa mbi fani ota, mo ke ti fa na mbi ndo so kota ngangu ti mo alondo daa.”

¹⁶Dalila aso mê ti Samson si lo woko lo na tenengo na lo gi oko tënë so lakue. Tongaso be ti Samson awoko kue, lo ye gi kuâ.

¹⁷Lo sigigi na nda ti ngangu ti lo, lo tene: “A fâ kua ti li ti mbi laoko pepe, ngbanga ti so, so mbi de na ya ti mama ti mbi, a mu mbi na Nzapa titene mbi ga nazir. Tongana a fâ kua ti li ti mbi, ngangu ti mbi ayeke hunzi si mbi yeke ga senge zo.”

¹⁸So Dalila ahinga atene, Samson azi be ti lo kue na lo awe, lo tokua na agbia oku ti azo ti Filistii titene ala ga. Lo tene na ala: “Ti so ni, ala ga, ngbanga ti so lo zi be ti lo kue na mbi awe.” Agbia ni alondo ague na ndo ti Dalila na nginza so ala ye ti mu na lo so.

¹⁹Lo woko Samson na lango na ndö ti gere ti lo. Lo iri mbeni koli si koli ni akio kua ti li ti Samson so a sara na pete mbarambara so. Tongaso Samson ato nda ti woko nda si ngangu ti lo asigigi na ya ti tere ti lo.

²⁰Dalila atene: “Samson, azo ti Filistii ayeke ga ti tiri na mo!” Lo zingo na lango, lo tene: “Mbi yeke sigigi na ya ti kamba tongana ti kozoni si mbi yeke hon.” Andaa lo hinga pepe, lo tene, *KOTA GBIA azia lo awe.

²¹Azo ti Filistii agbu lo si akoro le ti lo. Ala gue na lo na gbata ti Gaza. Ala kanga lo na zingiri ti bengba wen, ala mu na lo kua ti nikango ale ti *ble na da ti kanga.

²²Me kua ti li ti Samson so a kio ni kue so, ato nda ti kiri ti sigigi.

²³Mbeni lâ, agbia oku ti azo ti Filistii abongbi ti sara ngia na ti mu kota *sandaga na Dagon, nzapa ti ala. Ala he bia, atene: “Nzapa ti e azia Samson, wato ti e na maboko ti e awe.”

²⁴So azo ti kodro ni abaa lo, ala gonda nzapa ti ala, atene: “Nzapa ti e azia wato ti e na maboko ti e awe, lo so lo buba kodro ti e si lo hunzi azo ti kodro ni kue so.”

²⁵Ndali ti so be ti ala asi singo na kota ngia, ala tene: “Ala ga na Samson ge titene lo sara ye ti ngia, e baa!” A gue, asigigi na Samson na da ti kanga si lo sara ye ti ngia na le ti ala. A zia lo na popo ti angbongboro yongoro gere ti da ti nzapa ti ala.

²⁶Lo tene na maseka-koli so agbu maboko ti lo si ayeke fa lege na lo so, lo tene: “Mo gue na mbi na tere ti angbongboro yongoro gere ti da so da ti nzapa ni aluti na ndö ni titene mbi ba tere ti mbi daa.”

²⁷Andaa akoli na awali asi singo na ya ti da ni; agbia oku ti azo ti Filistii ayeke nga kâ. Azo so kue ayeke na ndo so a leke na li ti da ni titene azo aduti daa, wungo ti ala ayeke nduru na saki ota; ala kue ayeke baa sarango ye ti ngia so Samson ayeke sara.

²⁸Tongaso, Samson asambela KOTA GBIA, lo tene: “Kota Gbia NZAPA, mbi voro mo, dabe ti mo na mbi! Kiri mo mu ngangu na mbi ti fani oko si gi fani oko, mbi lingbi ti kiri peko ti sioni na azo ti Filistii ndali ti le ti mbi so ala koro ni use kue so!”

²⁹Na pekoni, Samson atara na maboko ti lo angbongboro yongoro gere use ti da so da ni aluti na ndö ni so. Lo gbu mbeni ngbongboro yongoro gere ni na maboko ti lo ti koli si lo gbu mbeni na maboko ti lo ti wali.

³⁰Lo dekongo, lo tene: “Mbi ye ti kui na azo ti Filistii legeoko!” Tongaso lo pusu angbongboro yongoro gere ti da ni ngangu si da ni ati na ndö ti agbia nga na ndö ti azo so kue ayeke na ya ti da ni. Azo so Samson akui legeoko na ala awu ahon azo so lo fâ ala na ndembe so lo ngba na fini.

³¹A-ita ti lo na asewa ti lo kue aga si amu kuâ ti lo. Ala gue na lo, ala lu lo na du ti kuâ ti babâ ti lo Manoa, na popo ti agbata ti Sora na Eshetaol. Samson aduti wafango-ngbanga ngu baleuse na Israel.