Read sango Awafango-ngbanga 17 Bible Online

Awafango-ngbanga 17 - sango bible

Awafango-ngbanga 17

¹Mbeni koli ayeke daa, iri ti lo Mika; lo yeke lango na sese ti Efraim, ndo so ahoto ayeke daa.

²Mbeni lâ, lo tene na mama ti lo: “Lani a nzi ale ti nginza ti mo saki oko na ngbangbo oko. Taa na le ti mbi, mo deba zo ti nzi ni. Fadeso, mbi ye ti tene na mo, mbi laa mbi mu nginza ni!” Mama ti lo atene: “Molenge ti mbi, *KOTA GBIA asara tufa na ndö ti mo!”

³Mika akiri na ale ti nginza saki oko na ngbangbo oko so na mama ti lo. Mama ti lo atene na lo: “Molenge ti mbi, mbi ye ti mu nginza so na iri ti mo na KOTA GBIA titene a leke na mbeni yanda so a kporo wen si a sara na ni. Fadeso, mbi kiri nginza ni na mo.”

⁴Me Mika akiri na nginza ni na mama ti lo; mama ti lo azi ale ti nginza ni ngbangbo use, lo mu na mbeni matawa. Matawa ni amu nginza ni, lo kporo ni si lo sara na mbeni yanda. A zia yanda ni na ya ti da ti Mika.

⁵Andaa Mika ayeke fade na mbeni ndo ti vorongo nzapa na da ti lo. Lo leke mbeni yanda ti da na aye nde nde ti vorongo na nzapa. Na pekoni, lo mu mbeni molenge ti lo ti koli si lo zia lo wayango-sandaga ti lo.

⁶Na ngoi ni so, gbia oko ayeke na Israel pepe; zo oko oko ayeke sara gi ye ti be ti lo.

⁷Mbeni maseka-koli ayeke daa; lo yeke zo ti mara ti Lévi, lo yeke lango na Betlehem, na sese ti Juda. Lo lango kâ tongana gene.

⁸Lo londo na Betlehem na sese ti Juda ti gi mbeni ndo so lo lingbi ti lango daa. Lo gue ngbii lo si na da ti Mika na sese ti Efraim, ndo so ahoto ayeke daa.

⁹Mika ahunda lo: “Mo londo na ndo wa?” Lo kiri tënë na lo: “Mbi yeke zo ti mara ti Lévi. Mbi lango na Betlehem, na sese ti Juda; mbi yeke gi mbeni ndo so mbi lingbi ti lango daa tongana gene.”

¹⁰Mika atene na lo: “Mo ngba na ndo so, mo ga tongana babâ ti mbi na wayango-sandaga ti mbi; mbi yeke mu na mo ale ti nginza baleoko na ya ti ngu oko oko, mbi yeke mu nga na mo abongo nga na kobe.” Zo ti mara ti Lévi ni ali

¹¹si lo yeda ti ngba na ndo ti Mika. Mika amu lo si lo ga tongana molenge ti ya ti lo.

¹²Mika azia zo ti Lévi ni wayango-sandaga ti lo; maseka ni ayeke lango gi na da ti Mika.

¹³Mika atene na be ti lo, atene: “Fadeso mbi hinga, mbi tene, KOTA GBIA ayeke sara nzoni na mbi, ngbanga ti so mbi yeke na mbeni zo ti mara ti Lévi so aga wayango-sandaga ti mbi.”