Read sango Awafango-ngbanga 18 Bible Online

Awafango-ngbanga 18 - sango bible

Awafango-ngbanga 18

¹Na ngoi ni so, gbia ayeke na Israel pepe. Na ngoi ni so nga, azo ti mara ti Dan ayeke gi mbeni sese so ala lingbi ti duti daa, ngbanga ti so na popo ti amara ti Israel kue, azo ti mara ti Dan ade ti wara sese pepe ti ga ti ala.

²Azo ti mara ti Dan asoro na popo ti ala angangu koli oku so mbeto oko ayeke na ala pepe. Akoli ni alondo na gbata ti Sora. Azo ti mara ti Dan amu yanga na ala, atene: “Ala tambula, *abembe ndo na ya ti kodro ni.” Ala gue ngbii ala si na da ti Mika so ayeke na sese ti Efraim, ndo so ahoto ayeke daa si ala lango na ndo ni so.

³So ala si nduru na da ti Mika, ala hinga go ti maseka-koli, zo ti mara ti Lévi ni. Ala gue na tere ti lo si ala hunda lo: “Zo wa laa aga na mo ge, zo wa? Mo ga ti sara nyen ge? Nyen laa agbanzi mo ge, nyen?”

⁴Lo kiri tënë na ala, lo tene: “Mika asara na mbi aye nde nde: lo mu mbi si mbi ga wayango-sandaga ti lo.”

⁵Ala tene na lo: “Hunda Nzapa titene e hinga, wala tambula so e yeke gue so ayeke ga nzoni.”

⁶Wayango-sandaga ni atene na ala: “Ala lingbi ti gue senge! *KOTA GBIA ayeke na ala na ya ti tambula ni.”

⁷Akoli oku so alondo, ala gue, asi na gbata ti Laish. Ala baa so azo ti gbata ni ayeke na siriri, tongana ti so azo ti Sidon ayeke duti kpoo, mbeto ti mbeni ye oko ayeke sara ala pepe. Azo so ayeke nduru na ala agi tënë na ala pepe, mbeni zo ti sara ngangu na ala ayeke nga daa pepe. Azo ti Laish alango yongoro na tere ti azo ti Sidon, ala yeke ku ye na maboko ti mbeni zo pepe.

⁸Akoli oku so amu lege si ala kiri na tere ti a-ita ti ala na gbata ti Sora na ti Eshetaol. A-ita ti ala ahunda ala, atene: “Nyen laa ala baa kâ?”

⁹Ala kiri tënë atene: “E londo, e gue, e sara bira na ala! E gue, e baa kodro ni awe; so ayeke nzoni kodro mingi. Ala ngba ti duti na ndo so senge pepe! Ala londo, e gue, e mu kodro ni!

¹⁰Tongana ala li ande na ya ti kodro ni, ala yeke si na ndo ti azo so mbeto ti mbeni ye oko ayeke sara ala pepe. Kodro ni akono mingi; Nzapa azia kodro ni na maboko ti ala awe. Ndo so ala yeke wara anzoni ye ti sese kue daa laa.”

¹¹Tongaso azo ngbangbo omene ti mara ti Dan amu aye ti bira si ala londo na Sora nga na Eshetaol ti gue.

¹²Ala gue, asara bâbâ ti ala na Kiriat-Yearim, na sese ti Juda. Ndani laa angba ti iri ndo ni so Mahane-Dan ngbii asi laso. Ndo ni ayeke na mbage ti Do ti Kiriat-Yearim.

¹³Ala londo na ndo so, ala gue na sese ti Efraim, ndo so ahoto ayeke daa; ala si na da ti Mika.

¹⁴Akoli oku so ague lani abembe ndo na ya ti gbata ti Laish so, ala mu tënë si ala tene na a-ita ti ala: “Ala hinga atene, na ya ti mbeni da so, yanda na aye nde nde ti sambelango nzapa nga na yanda so a kporo wen ti nginza si a sara na ni ayeke daa? Fadeso ala baa ye so ala lingbi ti sara.”

¹⁵Akoli oku so amu lege ti gue na da ti Mika. Ala li na ya ti da ni si ala hunda maseka-koli ti mara ti Lévi so ayeke lango na da ni, atene: “Tongana nyen?”

¹⁶Na ndembe ni so, azo ngbangbo omene ti mara ti Dan, na aye ti bira na maboko ti ala, aluti ti ala na yanga ti da ni.

¹⁷Akoli oku so ague lani ti bembe ndo na ya ti kodro ni, so ala li na ya ti da ni awe, ala mu ayanda ni, aye nde nde ti sambelango nzapa na yanda so a kporo wen ti nginza si a sara na ni. Wayango-sandaga ni aluti ti lo na yanga ti da ni, lo na azo ngbangbo omene so ayeke na aye ti bira na maboko ti ala.

¹⁸So ala li na ya ti da ti Mika si ala mu ayanda, aye nde nde ti sambelango nzapa nga na yanda so a kporo wen ti nginza si a sara na ni, wayango-sandaga ni ahunda ala, atene: “Nyen laa ala yeke sara so?”

¹⁹Ala kiri tënë na lo, atene: “Kanga yanga ti mo! Mo tene tënë oko pepe. Ga e gue! Mo ga tongana babâ ti e na wayango-sandaga ti e. Mo ye ti ngba wayango-sandaga ti mbeni sewa oko wala mo ye ti duti wayango-sandaga ti mbeni mara oko ti Israel?”

²⁰So wayango-sandaga ni ama tënë so, be ti lo asi na kota ngia. Lo mu ayanda, aye nde nde ti sambelango nzapa nga na yanda so ala sara ni si lo li na popo ti azo ni.

²¹Azo ti mara ti Dan amu lege ti gue; ala zia amolenge, anyama nga na *akangba na dawa.

²²So ala gue, ayo na da ti Mika, azo ti tere ti da ti lo abongbi si ala tumba peko ti azo ti Dan.

²³Ala dekongo na peko ti azo ti Dan. Azo ti Dan abaa ndo na peko si ala hunda Mika, atene: “Nyen laa asara mo, nyen? Nyen laa asara si ala dekongo kirikiri tongaso?”

²⁴Mika akiri tënë na ala: “Ala mu anzapa so mbi sara ndali ti mbi; ala mu nga wayango-sandaga ti mbi, ala hon na lo. Mbeni ye oko angba na mbi pepe si ala yeke hunda mbi, atene: ‘Nyen laa asara mo, nyen?’ ”

²⁵Azo ti Dan akiri tënë na lo: “Mo ngba ti so mê ti e na atënë ti mo so pepe! Tongana mo ngba daa, ambeni zo ti ngonzo na popo ti e ayeke londo fafadeso ti tuku na ndö ti ala si mo na asewa ti mo kue ayeke kui.”

²⁶Azo ti Dan amu lege si ala hon. Mika abaa so ala yeke ngangu ahon azo ti lo, lo mu lege, lo kiri na da ti lo.

²⁷Azo ti Dan amu aye so Mika aleke so nga na wayango-sandaga so ayeke sara kua na lo si ala hon na lo. Ala gue, atiri na azo ti gbata ti Laish so ayeke duti lani kpoo si mbeto ti mbeni ye ayeke sara ala pepe so. Azo ti Dan afâ ala kue si ala bi wâ na gbata ni.

²⁸Zo oko ti ga ti mu maboko na gbata ti Laish ayeke daa pepe, ngbanga ti so gbata ni ayo na Sidon si azo ti gbata ni ayeke ku ye na maboko ti mbeni zo pepe. Gbata ti Laish ayeke na popo-hoto so ague ngbii asi na Bet-Rehob. Azo ti Dan akiri aleke gbata ni si ala duti daa.

²⁹Ala zia iri ti gbata ni Dan, alingbi na iri ti kotara ti ala, molenge ti Jacob; me kozo iri ti gbata ni ayeke Laish.

³⁰Azo ti Dan amu yanda ti Mika si aga nzapa so ala yeke voro ni. Jonatan, molenge ti Gershom, molenge ti Moïse aga wayango-sandaga ti mara ti Dan. *Ahale ti Jonatan agbu kua ni ngbii asi na ngoi so a gbu azo ti kodro ni, a gue na ala na kodro wande.

³¹Azo ti Dan abata yanda ti Mika so na ngoi so kue da ti Nzapa ayeke na kodro ti Silo.