Read sango Awafango-ngbanga 3 Bible Online

Awafango-ngbanga 3 - sango bible

Awafango-ngbanga 3

¹*KOTA GBIA azia amara so ti ngba na ya ti kodro ni si na lege ti ala, lo tara be ti azo ti Israel, so ti tene ala so aduti ando pepe na ya ti bira so ayeke na Kanaan.

²Ye ni asi titene azo ti Israel so a du ala na peko si ala de ti hinga bira pepe so, alingbi ti manda lege ti sarango bira.

³Amara so angba na ya ti kodro ni ayeke so: agbia oku ti azo ti Filistii, azo ti Kanaan kue, azo ti Sidon nga na azo ti Hivi so ayeke lango na hoto ti Liban, ti londo na hoto ti Baal-Hermon ngbii asi na Lebo-Hamat.

⁴KOTA GBIA aye si na lege ti amara so, lo tara be ti azo ti Israel ti baa wala ala yeke bata andia ti lo so lo mu ando na akotara ti ala na lege ti Moïse.

⁵Lege so laa azo ti Israel angba ti lango na popo ti azo ti Kanaan, ti Het, ti Amori, ti Perizi, ti Hivi nga na azo ti Yebus.

⁶Azo ti Israel amu amolenge-wali ti amara so titene aga awali ti ala; ala mu nga amolenge ti ala ti wali na akoli ti amara so, ala voro nga anzapa ti ala.

⁷Azo ti Israel asara ye so ayeke sioni na le ti *KOTA GBIA, ala girisa KOTA GBIA, Nzapa ti ala si ala voro anzapa *Baal na *Ashera.

⁸Tongaso, ngonzo ti KOTA GBIA alondo na tere ti ala tongana wâ; lo zia ala na gbe ti komandema ti Kushan-Rishataim, gbia ti Mezopotamii. Ala sara ngu miombe na gbe ti komandema ti lo.

⁹Ala dekongo na mbage ti KOTA GBIA, lo mu mbeni zo ti soo ala: Otniel, molenge ti Kenaz, ngambe ti Kaleb.

¹⁰Yingo ti KOTA GBIA ayeke na ndö ti Otniel si lo ga wafango-ngbanga na ndö ti azo ti Israel. Lo gue na bira. KOTA GBIA azia Kushan-Rishataim, gbia ti Mezopotamii na maboko ti lo si lo hon ndö ti Kushan-Rishataim.

¹¹Siriri akiri na ya ti kodro ni na ya ti ngu baleosio. Na pekoni Otniel, molenge ti Kenaz akui.

¹²Azo ti Israel akiri asara ye so ayeke sioni na le ti *KOTA GBIA. Ndani laa KOTA GBIA amu ngangu na Eglon, gbia ti Moab titene lo gue na tere ti ala, ngbanga ti so ala sara ye so ayeke sioni na le ti KOTA GBIA.

¹³Eglon amu na tere ti lo azo ti mara ti Amon na ti Amalek titene ala gue, atiri bira na azo ti Israel; ala mu gbata ti Amburu.

¹⁴Azo ti Israel asara ngu baleoko na miombe na gbe ti komandema ti gbia Eglon.

¹⁵Ala dekongo na mbage ti KOTA GBIA, lo mu mbeni zo ti soo ala; zo ni ayeke Ehud, molenge ti Gera, zo ti mara ti Benjamin. Ehud ayeke sara kua gi na maboko ti lo ti wali. Azo ti Israel atokua lapo na maboko ti lo titene lo gue na ni na Eglon, gbia ti Moab.

¹⁶Ehud aleke mbeni zeme so yanga ni ayeke use. Zeme ni ayo nduru na santimetere baleoku. Lo kanga ni na gbe ti bongo na mbage ti gere ti lo ti koli.

¹⁷Lo gue si lo mu lapo ni na Eglon, gbia ti Moab; andaa Eglon ayeke zo so akono yegbe-yegbe.

¹⁸So lo mu na Eglon lapo ni awe, Ehud na azo so ayo lapo ni amu lege ti kiri.

¹⁹Na ndembe so ala si nduru na Gilgal awe, so ti tene ndo so ayanda so asara na têne ayeke daa, Ehud amu lege akiri na ndo ti gbia Eglon; lo tene na gbia ni: “Gbia, mbeni tënë so abaa gi mo oko ayeke na yanga ti mbi.” Gbia atene na azo so ayeke na tere ti lo ti sigigi. Tongaso azo ni kue asigigi.

²⁰Gbia Eglon ayeke duti na ya ti kubu ti nduzu so a leke ndali ti lo; ya ti kubu ni ade pendere. Ehud apusu nduru na tere ti lo si atene na lo: “Tënë so mbi ye ti tene na mo so alondo na Nzapa.” Gbia alondo na nduzu.

²¹Ehud ayoro maboko ti lo ti wali, lo gboto zeme so lo kanga na gbe ti bongo na mbage ti gere ti lo ti koli so si lo yoro na ya ti gbia ni.

²²Le ti zeme ni na keke ni kue ali na ya ti gbia ni si mafuta ti ya ti lo kue akanga ndö ni, ngbanga ti so Ehud agboto zeme ni pepe; lo sigigi na mbage ti peko.

²³So lo sigigi na yanga ti kubu ti mbage ti peko ni awe, lo kanga ayanga ti kubu ti nduzu ni kue na kerere na ndö ti gbia ni.

²⁴So lo sigigi lo hon awe, azo ti kua ti gbia ni aga; ala baa so ayanga ti kubu ti nduzu ni akanga kangango. Ala tene na be ti ala: “E hinga pepe, gbia angba na kabinee na ya ti dengo kubu so!”

²⁵Ala ku gbaa, gbia azi ayanga ti kubu ni pepe. Ala mu kerere si ala zi na ni. Ala baa so wa ti ala laa ayeke lango na sese so; lo kui awe!

²⁶Na ndembe so ala ngba fade ti ku so, Ehud akpe ti lo ahon awe. Lo kpe ngbii lo hon ndo so ayanda ti têne ayeke daa; lo gue ti soo tere ti lo na mbage ti Seira.

²⁷So lo si na sese ti Israel awe, lo huru didi na sese ti Efraim, ndo so ahoto ayeke daa titene lo bongbi azo ti Israel. Lo mu li ni, azo ti Israel ayeke na peko ti lo si ala londo ti zu hoto ni.

²⁸Lo tene na ala: “Ala mu peko ti mbi, ngbanga ti so KOTA GBIA azia azo ti Moab so ayeke awato ti ala na maboko ti ala awe.” Azo ni amu peko ti Ehud si ala gue, akanga lege na ndo so azo ayeke fâ ka ngu ti Jourdain daa na gere; ndo ni ayeke na lege ti guengo na sese ti Moab. Ala zia zo oko ti mara ti Moab ti fâ ngu ni pepe.

²⁹Na lango ni so, ala fâ azo ti Moab nduru na saki baleoko. Azo so azo ti Israel afâ ala, ala kue ayeke akoli so akono si ayeke na ngangu. Zo ti Moab oko akpe na maboko ti ala pepe.

³⁰Ti londo na lango ni so, azo ti mara ti Moab ati na gbe ti azo ti Israel si siriri akiri na ya ti kodro ni ngu balemiombe.

³¹Na peko ti Ehud ayeke Shamgar, molenge ti Anat. Lo fâ azo ti Filistii ngbangbo omene na keke ti fango lege na abagara. Lo nga lo soo azo ti Israel na ya ti aye ti ngangu.