Read sango Awafango-ngbanga 5 Bible Online

Awafango-ngbanga 5 - sango bible

Awafango-ngbanga 5

¹Na lango ni so, Debora na Barak, molenge ti Abinoam ahe bia so, ala tene:

²“Na kodro ti Israel, zo oko oko ayeke nduru ti tiri bira, azo ayeda na be ti ala ti gue na bira: ala mu singila na *KOTA GBIA!

³Ala agbia ti sese, ala ma mbi si! Ala amakonzi ti kodro, ala dingi mê ti ala, ala ma si! Mbi ye ti he bia ndali ti KOTA GBIA! Mbi ye ti he bia ndali ti KOTA GBIA, Nzapa ti Israel.

⁴KOTA GBIA, so mo londo na kodro ti Edom, so mo ye ti zu na hoto ti Seir, sese ayingi, ngu alondo na ya ti ambinda atuku na sese, ngu-Nzapa alondo na yayu apika mingi.

⁵Ahoto ayingi na dawa ti mo, KOTA GBIA ti Sinai. Ala yingi na dawa ti mo, Nzapa ti Israel.

⁶Na ngoi ti Shamgar, molenge ti Anat, na ngoi ti Yael, ndö ti alege ade dengo. Azo so ahon na lege, ala mu gi akete lege ti hon.

⁷Amakonzi ayeke daa mbeni pepe, makonzi oko ayeke daa pepe na kodro ti Israel ngbii asi na ngoi so, mbi Debora, mbi londo na nduzu, ngbii asi na ngoi so mbi ga tongana mama ti azo ti Israel.

⁸Azo asoro afini nzapa, tongaso bira ati na ya ti kodro ni. Me zo ayeke baa *vala wala likongo oko pepe na popo ti azo ti Israel, ataa mbeni oko pepe na popo ti aturugu saki baleosio.

⁹Be ti mbi ayeke na ndö ti amakonzi ti Israel, na ndö ti azo so alondo na be ti ala wani ti gue na bira. Ayeke nzoni ala mu singila na KOTA GBIA!

¹⁰Ala so ayeke ko na ndö ti avuru mama ti lele, ala so ayeke duti na ndö ti atapi nga na ala so ayeke tambula na ndö ti alege, ala gbu li ti ala si!

¹¹Na tere ti adu ti ngu, ala ma go ti azo ti kangbingo ngu. Kâ, ala yeke he bia ti gonda na Nzapa, ngbanga ti anzoni ye so lo sara na amakonzi ti Israel. Tongaso, azo ti KOTA GBIA azu na yanga ti gbata.

¹²Zingo, zingo, Debora! Zingo, zingo, mo he bia ti bira! Londo, Barak, molenge ti Abinoam! Londo mo kiri na azo ti mo so a gbu ala!

¹³Tanga ti azo so angba so ayeke zu na mbage ti amakonzi. Azo ti KOTA GBIA abongbi na tere ti lo tongana awalombe.

¹⁴Azo so akinda azo ti Amalek alondo na Efraim si aga. Azo ti mara ti Benjamin amu peko ti ala; ala li na popo ti aturugu ti ala. Amakonzi alondo na Makir si aga. Akota zo ti aturugu alondo ti ala na Zabulon si aga.

¹⁵Amakonzi ti mara ti Isakar abongbi oko na Debora; azo ti mara ti Isakar amu peko ti Barak na lando. Me na popo ti akete mara ti Ruben, azo apika patara ahon ndoni!

¹⁶Ngbanga ti nyen laa ala ngba ti duti na tere ti gbagba ti ataba ti ma gi iringo ndo ti azo ti batango ataba ni so? Na popo ti akete mara ti Ruben, pikango patara ahon ndoni!

¹⁷Azo ti mara ti Galaad angba ti ala na mbage ti To ti ngu ti Jourdain. Ngbanga ti nyen laa azo ti mara ti Dan ayeke lango ti ala na tere ti amangboko so? Azo ti mara ti Aser ayeke ti ala na yanga ti kota ngu-ingo, ndo so amangboko ayeke luti daa!

¹⁸Ti azo ti mara ti Zabulon, ala na azo ti mara ti Neftali ayeda ti gue na le ti kuâ, na ndo so bira ayeke kporo daa.

¹⁹Agbia so ayeke awato asi, ala sara bira; agbia ti Kanaan atiri bira na Taanak, nduru na ngu ti Megido. Me ala gbu kungba wala nginza na peko ti bira pepe.

²⁰Atongoro ti nduzu nga asara bira; na lege so ala yeke tambula daa, atongoro ni asara bira na Sisra.

²¹Kete ngu ti Kishon, kete ngu so asua ngbene ye aninga, asua amu awato ni kue ahon na ala. E gue na bira na mbeto pepe!

²²Tongaso, asokoto ti ambarata apika sese, ala yeke kpe loro kpakata, kpakata, kpakata!

²³*Ange ti KOTA GBIA atene: Ala deba azo ti gbata ti Meroz! Ala deba ala, ngbanga ti so ala ke ti ga ti mu maboko na KOTA GBIA! Ala ke ti mu maboko na angangu turugu ti lo.

²⁴E gonda Yael, wali ti Heber, zo ti mara ti Keni! E gonda lo na popo ti awali so kue ayeke lango na ya ti da ti bongo!

²⁵Sisra ahunda ngu ti nyon, Yael amu na lo ngu ti me ti bagara! Na ya ti kopo ti akota zo, lo mu na lo pendere ngu ti me ti bagara!

²⁶Na mbeni maboko ti lo, lo gbu keke so yanga ni aza si na maboko ti lo ti koli, lo gbu martoo ti azo ti kua. Lo pika li ti Sisra si bio ni asuru; lo koro ya ti li ti lo.

²⁷Koli ni akuku na gbe ti Yael, lo ti, lo lango na sese; lo kuku na gbe ti Yael, lo ti. Gi na ndo so lo kuku daa so, lo ti si lo kui.

²⁸Mama ti Sisra aluti na da si lo yeke baa ndo na gigi na le ti fenetere, lo yeke baa ndo na popo ti awen ti fenetere ni si lo yeke dema tere ti lo, lo tene: ‘Ngbanga ti nyen laa pusu ti mbarata ti lo asi hio pepe so-oo? Ngbanga ti nyen laa agere ti pusu ti mbarata ti lo ayeke hara harango so-oo?’

²⁹Ambeni wali ti yangbo ni so ayeke na ndara mingi akiri tënë na lo si lo wani, lo tene:

³⁰‘E hinga pepe, ala ngba ti kangbi aye so ala gbu na peko ti bira: maseka-wali oko wala use ndali ti turugu oko oko kue. Sisra awara ti lo abongo ti nzoroko; a fu bongo ni na pendere nzoroko nde nde. A fu ni mbage na mbage ti zia na go ti zo so aso benda na ya ti bira.’

³¹KOTA GBIA, ayeke nzoni awato ti mo kue akui tongana ti so Sisra akui. Ayeke nzoni ala so aye mo aga tongana lâ so ato nda ti su na ngangu!” Tongaso siriri akiri na ya ti kodro ni na ya ti ngu baleosio.