Read sango Awafango-ngbanga 6 Bible Online

Awafango-ngbanga 6 - sango bible

Awafango-ngbanga 6

¹Azo ti Israel asara ye so ayeke sioni na le ti *KOTA GBIA; tongaso KOTA GBIA azia ala na maboko ti azo ti Madian na ya ti ngu mbarambara.

²Azo ti Madian asara ngangu mingi na azo ti Israel. Ndali ti azo ti Madian ni, azo ti Israel aleke ando na gbe ti sese, na ya ti adu ti têne nga na li ti ahoto ti honde tere ti ala daa.

³Lakue tongana azo ti Israel alu ale ti kobe ti ala, azo ti Madian ayeke ga ti tiri bira na ala; azo ti Madian abongbi na azo ti Amalek nga na ambeni mara ti mbage ti To.

⁴Ala ga asara bâbâ ti ala na ndö ti sese ti azo ti Israel, ala buba akobe ti yaka ngbii asi na gbata ti Gaza. Ala zia kobe na azo ti Israel oko pepe; ataa ataba na angasa, ataa abagara, ataa alele, ala zia mbeni ye oko pepe.

⁵Tongana azo ti Madian ayeke londo ti gue na tere ti azo ti Israel, ala yeke mu anyama ti ala nga na ada ti ala ti bongo kue; ala yeke gue gbani gbani tongana akinda-gozo, ala na *azambala ti ala, zo alingbi ti diko wungo ti ala pepe. Ala mu ya ti kodro ni kue si ala buba ni kue.

⁶Sarango ye ti azo ti Madian abi azo ti Israel na ya ti kota yere; nilaa azo ti Israel adekongo na mbage ti KOTA GBIA titene lo mu maboko na ala.

⁷So azo ti Israel adekongo na KOTA GBIA titene lo zi ala na maboko ti azo ti Madian,

⁸KOTA GBIA atokua na ala mbeni wayanga-Nzapa; lo tene na ala: “Tënë so KOTA GBIA, Nzapa ti Israel atene ayeke so: ‘Mbi laa mbi sara si ala sigigi na sese ti Ezipte, mbi laa mbi zi ala na ndo so ala yeke lani angbaa daa.

⁹Mbi laa mbi zi ala na maboko ti azo ti Ezipte nga na maboko ti azo so kue asara ngangu na ala; mbi tumba azo ni na dawa ti ala si mbi mu na ala kodro ti azo ni.

¹⁰Mbi tene na ala: Mbi yeke KOTA GBIA, Nzapa ti ala. Ayeke nzoni ala voro anzapa ti azo ti Amori pepe so ayeke lango na sese ti ala.’ Me ala ke ti ma yanga ti mbi.”

¹¹*Ange ti *KOTA GBIA asi na kete kodro ti Ofra; lo duti na gbe ti keke ti shene ti Yoash, zo ti kete mara ti Abiezer. Gédéon, molenge ti Yoash angba ti pika le ti *ble na ya ti du so a leke titene apete ale ti *vinye daa; lo sara tongaso titene azo ti Madian abaa ni pepe.

¹²Ange ti KOTA GBIA asi na lo si atene na lo: “KOTA GBIA ayeke na mo, kpengba turugu!”

¹³Gédéon atene na lo: “Babâ, mbi gbu gere ti mo! Tongana KOTA GBIA ayeke na e, ngbanga ti nyen laa aye so kue asi na e? Aye ti dongo be so lo sara si akotara ti e atene tënë ni ando so ayeke na ndo wa? Ala yeke tene ka na e biani, ala tene: ‘KOTA GBIA laa asara si e sigigi na sese ti Ezipte!’ Fadeso, KOTA GBIA ado e azia awe; lo zia e na maboko ti azo ti Madian!”

¹⁴KOTA GBIA abaa ndo na mbage ti Gédéon si atene na lo: “Na ngangu so mo yeke na ni, gue, mo zi azo ti Israel na maboko ti azo ti Madian! Mbi laa mbi tokua mo.”

¹⁵Gédéon akiri tënë na lo: “Kota Gbia, mbi gbu gere ti mo! Fade mbi yeke soo azo ti Israel ni tongana nyen? Mara ti mbi ayeke kete mara na popo ti mara ti Manase. Ti mbi, mbi yeke gi ndangba molenge ti ya ti sewa ti mbi.”

¹⁶KOTA GBIA atene na lo: “Fade mbi yeke na mo; mo yeke kinda azo ti Madian, mo baa mo tene, gi zo oko laa mo kinda lo.”

¹⁷Gédéon akiri atene na KOTA GBIA: “Tongana mo baa mbi na nzoni le, ayeke nzoni mo fa na mbi mbeni ye so afa atene, mo laa mo yeke tene tënë na mbi so.

¹⁸Mbi gbu gere ti mo, ayeke nzoni mo hon pepe; mo ku, mbi ga na *sandaga ti mbi, mbi ya ni na mo si.” KOTA GBIA akiri tënë: “Mbi yeke ku mo ngbii mo ga si.”

¹⁹Gédéon ague, ato kete ngasa; lo mu kilo baleota ti farini si lo zö na mapa so a sara na mama ni pepe. Lo zia kasa ti nyama ni na ya ti mbeni sakpa si lo zia ngu ti kasa ni na ya ti mbeni ta; lo gue na ni na gbe ti keke ti shene ni si lo mu na ange ti KOTA GBIA.

²⁰Ange ni atene na lo: “Mu kasa ni na mapa so a sara na mama ni pepe so, mo gue, mo zia na ndö ti têne so. Na pekoni, mo tuku ngu ti kasa ni na ndö ni.” Gédéon asara gi tongaso.

²¹Tongaso ange ti KOTA GBIA ayeke na nduru keke na maboko ti lo; lo ndu kasa nga na mapa ni na keke ni. Wâ alondo na ya ti têne ni si agbi kasa ni nga na mapa ni kue. Na pekoni ange ni ahon, Gédéon akiri abaa lo pepe.

²²Gédéon ahinga atene, ange ti KOTA GBIA laa; lo tene na be ti lo: “Mawa na mbi Kota Gbia NZAPA! Mbi baa ange ti mo le na le!”

²³Me KOTA GBIA atene na lo: “Duti na siriri, sara mbeto pepe! Mo yeke kui pepe.”

²⁴Na ndo ni so, Gédéon aleke mbeni gbalaka na KOTA GBIA si lo di iri ni: “KOTA GBIA ayeke mu siriri.” Gbalaka ni angba na Ofra, kodro ti kete mara ti Abiezer ngbii asi laso.

²⁵Gi na bi ni so, *KOTA GBIA atene na Gédéon: “Mu koli-bagara ti babâ ti mo, so ti tene use koli-bagara ni so ngu ti lo ayeke mbarambara so. Gue mo kungbi na sese gbalaka so babâ ti mo ayeke mu *asandaga na *Baal so. Mo fâ nga keke so ayeke na tere ni si a leke aluti na nduzu ndali ti nzapa-wali *Ashera.

²⁶Fade mo leke na KOTA GBIA, Nzapa ti mo mbeni gbalaka so a leke ni nzoni na li ti hoto so. Na pekoni, mo mu koli-bagara ni, mo ya na sandaga so a yeke gbi ni kue na wâ na KOTA GBIA. Mo mu keke so a leke aluti na nduzu ndali ti Ashera si mo fâ ni so, mo gbi na sandaga ni.”

²⁷Gédéon amu akoli baleoko na popo ti azo ti kua ti lo, lo sara ye so KOTA GBIA ahunda na lo. Lo sara ye ni na kota lâ pepe; lo sara ni na bi ndali ti so lo sara mbeto ti azo ti da ti babâ ti lo nga na azo ti gbata ni.

²⁸Na ndaperere, so azo ti gbata ni azingo, ala baa so a kungbi gbalaka ti Baal na sese awe; ala baa nga so a de keke so a leke aluti na nduzu ndali ti Ashera si ayeke na tere ni; a mu use koli-bagara na sandaga so a yeke gbi ni kue na wâ na ndö ti fini gbalaka ni.

²⁹Ala yeke hunda tere ti ala na popo ti ala: “Zo wa laa asara ye so, zo wa?” Ala hunda nda ti tënë ni si azo atene na ala: “Gédéon, molenge ti Yoash laa asara ni.”

³⁰Tongaso azo ti gbata ni atene na Yoash: “Ga na molenge ti mo ni; lo lingbi na kuâ, ngbanga ti so lo kungbi gbalaka ti Baal na sese si lo de keke so a leke aluti na nduzu ndali ti Ashera si ayeke na tere ni.”

³¹Yoash akiri tënë na azo so kue aluti na tere ti lo: “Ala laa ayeke gbu koko ti Baal? Ala laa aye ti mu maboko na lo? Zo so agbu koko ti Baal, lo yeke kui kozo si ndo ahan. Tongana Baal ayeke nzapa, ayeke nzoni lo wani, lo gbu koko ti lo ndali ti gbalaka ti lo so a kungbi na sese so ma!”

³²Gi na lango ni so, azo adi iri ti Gédéon: Yerubaal, so aye ti tene: “Ayeke nzoni Baal agbu koko ti lo wani”, ngbanga ti so lo kungbi gbalaka ti Baal na sese.

³³Azo ti Madian kue, azo ti Amalek na ambeni mara ti mbage ti To abongbi oko, ala gue, afa ngu ti Jourdain si ala sara bâbâ ti ala na lando ti Yizreel.

³⁴Yingo ti *KOTA GBIA aga na ndö ti Gédéon; lo huru didi ti iri azo ti kete mara ti Abiezer titene ala ga na peko ti lo.

³⁵Lo tokua azo na sese ti Manase kue ti iri azo ti mara ni titene ala nga, ala ga na peko ti lo. Lo tokua nga ndo na azo ti mara ti Aser, ti Zabulon na ti Neftali; azo ni kue aga awara lo.

³⁶Gédéon atene na Nzapa: “Tongana mo ye ti soo azo ti Israel na lege ti mbi tongana ti so mo tene,

³⁷baa, mbi yeke gbara poro ti taba so kua ni angba daa na ndo so a yeke pika ale ti kobe daa. Tongana ngu ti pere ati na bi gi na ndö ti kua ti tere ti taba ni oko si sese so ayeke na tere ni angba na holengo ni, fade mbi yeke hinga, mbi tene, mo ye ti soo azo ti Israel na lege ti mbi tongana ti so mo tene.”

³⁸Ye ni asi gi tongana ti so Gédéon ahunda. So ndo ahan awe, lo londo lo gue, lo pete kua ti tere ti taba ni; ngu ti pere asigigi na ya ni asi du ti sembe oko.

³⁹Gédéon atene na Nzapa: “Ayeke nzoni ngonzo ti mo alondo na tere ti mbi pepe, tongana mbi kiri mbi hunda na mo mbeni ye. Mo mu na mbi lege titene mbi tara ti ndangba ni ti sara ye na lege ti poro ti taba so kua ni angba daa so: mbi ye titene kua ti tere ti taba ni angba na holengo ni si ngu ti pere ati gi na sese na tere ni.”

⁴⁰Na bi ni so, Nzapa asara ye so Gédéon ahunda so: kua ti tere ti taba ni angba na holengo ni, me ngu ti pere ati na sese na tere ni kue.