Read sango 3 Jean 1 Bible Online

3 Jean 1 - sango bible

3 Jean 1

¹Mbi *kangba, mbi tokua mbeti so na Gaius so mbi ye lo mingi, mbi ye lo na be ti mbi kue.

²Ita ti mbi so mbi ye mo mingi, mbi sambela titene aye ti mo kue ague na legeni, mo duti na nzoni tere tongana ti so yingo ti mo ayeke duti nzoni so.

³Lani ambeni ita asi, ala tene na mbi atene, mo ngba lakue na lege ti taa-tënë si mo ngba ti sara ye lakue na lege ti taa-tënë. Tënë so anzere na be ti mbi mingi.

⁴Tongana mbi ma a tene, amolenge ti mbi ayeke sara ye na lege ti taa-tënë, mbeni ye ti zia ngia na be ti mbi ti hon so ayeke daa pepe.

⁵Ita ti mbi so mbi ye mo mingi, mo yeke sara ye alingbi na mabe ti mo tongana mo yeke mu maboko na a-ita, ataa so mo hinga le ti ala kozoni pepe.

⁶Ala fa na *Eglize ge tënë ti ndoye ti mo. Ayeke nzoni mo ngba ti mu maboko na ala na ya ti tambula ti ala tongana ti so be ti Nzapa aye.

⁷Biani, ala yeke tambula ti sara kua ti Christ, ala ke ti wara ye na maboko ti azo ti amara nde.

⁸Tongaso, alingbi e mu maboko na azo tongaso si e na ala kue, e sara kua maboko na maboko ndali ti taa-tënë.

⁹Mbi su fade mbeni nduru mbeti si mbi tokua ni na *Eglize; me Diotrefe so aye lakue gi ti duti na komandema na ndö ti amba ti lo, lo ke ti ma yanga ti e.

¹⁰Ndani laa, tongana mbi si ande kâ, fade mbi yeke fa na le ti azo aye so kue lo yeke sara, na asioni tënë so lo yeke tene na tere ti e, na atënë ti mvene so lo yeke tene. Na ndö ni, tongana a-ita asi, lo wani, lo ke ti yamba ala. A-ita so aye ti yamba azo so asi, lo yeke kanga lege na ala si lo yeke tumba ala na ya ti Eglize.

¹¹Ita ti mbi so mbi ye mo mingi, mo mu peko ti sioni ye pepe, me mo mu peko ti nzoni ye. Zo so asara nzoni ye, andaa lo yeke zo ti Nzapa; zo so asara sioni ye, andaa lo hinga Nzapa pepe.

¹²Azo kue ayeke tene nzoni tënë ti Demetrius, ndali ti so lo yeke sara ye gi na lege ti taa-tënë. E nga, e yeke tene nzoni tënë ti lo; mo hinga so tënë so e yeke tene na ndö ti lo ayeke taa-tënë.

¹³Mbi yeke na atënë mingi ti tene na mo, me mbi ye ti mu keke ti mbeti ti su atënë ni na le ti mbeti pepe.

¹⁴Mbi ye ti baa mo na ya ti alango so ayeke ga si mbi na mo, e tene tënë na yanga.

¹⁵Ayeke nzoni mo duti na siriri! Amba ti mo abara mo. Mo bara na e amba ti e oko oko kue.