Read sango Jude 1 Bible Online

Jude 1 - sango bible

Jude 1

¹Mbi Jude, zo ti kua ti Jésus Christ, so mbi yeke nga ita ti Jacques, mbi tokua mbeti so na azo so Nzapa Babâ airi ala, azo so lo ye ala si Jésus Christ ayeke bata ala.

²Ayeke nzoni Nzapa asara nzoni be na ala, lo mu na ala siriri nga na ndoye gbani gbani!

³A-ita ti mbi so mbi ye ala mingi, mbi ye fade mingi ti su mbeti na ala na ndö ti tënë ti songo so Nzapa asoo e na ala kue so. Me mbeni ye apusu mbi ti su mbeti so ti mu ngangu na be ti ala titene ala tiri bira ti bata mabe so Nzapa amu na azo ti lo fani oko biani biani.

⁴Biani, ambeni zo ti sioni ali na popo ti ala na hondengo ni; azo ni ayeke buba ya ti tënë ti nzoni be ti Nzapa ti e ti mu lege na ala wani ti sara aye ti potopoto ti ala. Ala ke tënë ti Jésus Christ, lo so lo yeke oko Makonzi ti e na *Kota Gbia ti e. Mbeti ti Nzapa atene tënë ti ngbanga so a fâ na li ti azo ni, ngbene ye aninga awe.

⁵Ataa so ala hinga ni kue awe, mbi ye ti dabe ti ala daa: ando, Kota Gbia amu azo ti Israel na kodro ti Ezipte, lo sigigi na ala si lo soo ala; me na pekoni, lo sara si azo so ake tënë ti lo akui.

⁶Ala dabe ti ala na ambeni *a-ange: kota ndo so Nzapa amu na ala, be ti ala anzere na ni pepe; ndo so lo mu na ala titene aga ti ala wani, ala do azia. Tongaso, lo kanga ala na zingiri, lo bata ala kpu na kpu na ya ti vukongo ndo ti ku na kota lango ti fango ngbanga.

⁷Ala dabe ti ala na azo ti agbata ti Sodome na Gomore nga na ambeni kodro so ayeke na tere ni: azo ni asara asioni ye tongana ti a-ange so, ala mu be ti ala kue ti sara gi aye ti ndumba, ala sara asioni ye so akpa titene zo asara pepe. Fadeso ala yeke baa pasi na ya ti wâ so ayeke gbi lakue lakue; ala ga tapande ndali ti azo kue.

⁸Azo so asi na popo ti ala so, ala nga ayeke sara ye tongaso: ambeni ye aga na li ti ala tongana bango-li, apusu ala ti sara siokpari na tere ti ala wani; ala baa komandema ti Nzapa tongana buba ye na le ti ala si ala yeke zonga ayingo ti yayu so ayeke na gonda.

⁹Ataa Michel, makonzi ti a-ange asara mara ti ye so laoko pepe. Ando, tënë alondo na popo ti lo na Zabolo si ala yeke papa ndali ti mungo kuâ ti Moïse. Me titene lo fâ ngbanga ti sioni na li ti Zabolo, Michel abaa tere ti lo tongana zo so akpa pepe. Gi tënë so lo tene na Zabolo ayeke so: “Ayeke nzoni Kota Gbia afâ ngbanga na li ti mo!”

¹⁰Me ti azo ni so, ala yeke zonga aye so ala hinga nda ni pepe. Ataa aye so ala hinga, ala hinga ni tongana anyama so ayeke na ndara pepe si aye ni ayeke buba fini ti ala.

¹¹Mawa na azo ni so! Ala mu peko ti Kain. Ndali ti nginza, ala girisa lege tongana Balaam; ala kui, ngbanga ti so ala sara ngangu li tongana azo ti Kore.

¹²A-ita, na ndembe so ala yeke te kobe ti beoko si azo ni so ayeke na popo ti ala, azo ni aga tongana mbeni sarate na ya ti matanga ti ala ti tengo kobe. Azo ni so ayeke te ye na kamene pepe, ala hinga gi nzara ti ya ti ala. Ala yeke tongana ambinda so pupu ayeke hon na ni si ngu apika na peko ni pepe. Ala yeke nga tongana akeke so ale pepe, ataa so ndembe ni alingbi awe; tongana a zi gere ni, akui biani biani.

¹³Ala yeke tongana asioni *mapo ti le ti kota ngu-ingo so pupu ayeke yingi ni kirikiri, aye ti kamene ti ala ni ayeke sara tongana *afuru ti ngu. Ala yeke nga tongana ambeni tongoro so ayeke tambula kirikiri; ndo so a leke ndali ti azo ni titene ala duti daa kpu na kpu ayeke na ndo so avuko pitipiti.

¹⁴Henok, lo so lo yeke na molongo mbarambara ti *ahale ti Adam, atene tënë na ndö ti azo so ando, lo tene: “Ala ma tënë so: ‘Kota Gbia ayeke ga na a-ange gbani gbani so ayeke nde si ayeke nzoni kue.

¹⁵Lo yeke ga ti fâ ngbanga na li ti azo kue, ti kanga azo ti sioni ndali ti asioni ye so kue ala sara. Lo yeke kanga nga azo ti siokpari so ayeke azo ti sioni ndali ti asioni yanga so kue ala tene na tere ti lo.’ ”

¹⁶Be ti azo ni anzere laoko pepe, demango tere ti ala ahon ndoni; ala ye ti sara ye alingbi gi na asioni nzara ti be ti ala; ala yeke tene gi atënë ti baba si ala yeke diko apendere tënë ti handa na azo ngbanga ti warango ye.

¹⁷A-ita ti mbi so mbi ye ala mingi, ala dabe ti ala na atënë so *awatokua ti *Kota Gbia ti e Jésus Christ atene ando na ala.

¹⁸Awatokua ni atene na ala: “Na lango ti ndani, azo ayeke he ala na ngia, azo ti sioni so ayeke sara ye alingbi gi na asioni nzara ti be ti ala.”

¹⁹Azo so laa ayeke ga na kangbi na popo ti ala. Atënë ti be ti ala ayeke ti senge zo ti sese, me ala yeke na Yingo ti Nzapa pepe.

²⁰Me ti ala, a-ita ti mbi so mbi ye ala mingi, ala luti ngangu na ndö ti mabe ti ala so ayeke nde si ayeke nzoni kue. Ala sambela na lege ti Yingo-Vuru.

²¹Ala ngba na lege ti ndoye ti Nzapa. Ala ku titene Kota Gbia ti e Jésus Christ amu na ala fini so angba lakue lakue na lege ti nzoni be ti lo.

²²Ala baa mawa ti azo so angba ti dekite.

²³Ti azo so ayeke gue na le ti wâ, ala gboto ala na ya ti wâ ni ti soo ala. Ti ambeni zo ni, ala baa mawa ti ala, me ala sara ni na mbeto. Ataa bongo ti azo ni, ala ndu ni pepe, ngbanga ti so aye ti sioni ti azo ni agbu tere ni kue.

²⁴Nzapa so alingbi ti bata ala si ala ti pepe, lo lingbi ti sara si ala ga nzoni kue, ala si na gbe ti gonda ti lo na ngia.

²⁵Lo oko laa lo yeke Nzapa, Wasongo e na lege ti Jésus Christ, *Kota Gbia ti e. Gonda, kota ndo, ngangu nga na komandema ayeke ti lo, ando ngu na ngu, fadeso ngbii gbanda kpu na kpu! Amen.