Read sango Aye so Nzapa afa 10 Bible Online

Aye so Nzapa afa 10 - sango bible

Aye so Nzapa afa 10

¹Mbi kiri mbi baa mbeni ngangu *ange, lo londo na yayu si lo yeke zu. Lo yu mbinda na tere ti lo tongana bongo, *kongö angoro li ti lo; le ti lo ayeke tongana lâ, angbongboro gere ti lo tongana menga ti wâ.

²Lo gbu na maboko ti lo mbeni kete buku so a zi ya ni. Lo zia gere ti lo ti mbage ti koli na ndö ti kota ngu-ingo si lo zia gere ti lo ti mbage ti wali na ndö ti sese.

³Lo dekongo ngangu tongana bamara so ayeke toto. Na peko ti dekongo ti lo, abekpa mbarambara asungba.

⁴So abekpa mbarambara ni asungba, mbi ye ti su tënë ni na mbeti, me mbi ma mbeni go so alondo na yayu si atene na mbi: “Bata tënë ti abekpa mbarambara so na be ti mo; mo su ni na mbeti pepe.”

⁵Ange so fade mbi baa lo si lo yeke luti na ndö ti kota ngu-ingo nga na ndö ti sese so, ayoro maboko ti lo ti koli na nduzu

⁶si lo deba yanga ti lo na iri ti Nzapa so ayeke na fini kpu na kpu, lo so lo sara yayu na aye ti ya ni kue, sese na aye ti ndö ni kue, kota ngu-ingo na aye ti ya ni kue. Ange ni atene: “Alingbi ti zia mbeni ngoi na ndö ni pepe!

⁷Me na ndembe so mbarambara ange ni ayeke huru tatalita ti lo, fade Nzapa ayeke sara aye so lo leke na hondengo ni ando. Lo yeke sara ye ni alingbi gi na tënë so lo tene na azo ti kua ti lo, awayanga-Nzapa.”

⁸Go so alondo na yayu si mbi ma kozoni so akiri atene na mbi: “Gue mo mu kete buku so a zi ya ni si ayeke na maboko ti ange so ayeke luti na ndö ti kota ngu-ingo nga na ndö ti sese so.”

⁹Mbi gue na tere ti ange ni si mbi hunda lo titene lo mu na mbi kete buku ni. Lo tene na mbi: “Mu ni, mo te ni: fade na ya ti mo ayeke see sengo, me na yanga ti mo ayeke nzere nzerengo tongana mafuta ti wotoro.”

¹⁰Mbi mu kete buku ni na maboko ti lo, mbi te ni. Kete buku ni anzere na yanga ti mbi tongana mafuta ti wotoro; me so mbi mene ni awe, asee sengo na ya ti mbi.

¹¹Na pekoni, a tene na mbi: “Alingbi mo kiri mo tene peko ti tënë ti yanga ti Nzapa so na ndö ti azo mingi: azo ti akodro nde nde, azo ti amara nde nde, azo ti ayanga ti kodro nde nde na agbia mingi.”