Read sango Aye so Nzapa afa 11 Bible Online

Aye so Nzapa afa 11 - sango bible

Aye so Nzapa afa 11

¹Na pekoni, a mu na mbi mbeni sosongo so akpa keke ti hakango na ye si a tene na mbi: “Londo, mo haka kota da ti Nzapa na gbalaka, mo diko wungo ti azo so ayeke voro Nzapa na ya ni.

²Me mo zia ya ti gbagba ni, mo haka ni pepe, ngbanga ti so a zia ni na maboko ti azo ti amara nde si fade ala yeke do na gere na ya ti nze baleosio na use gbata so ayeke nde si ayeke nzoni kue.

³Azo ti mbi use so ayeke tene taa-tënë na ndö ti mbi, ala so ayeke yu bongo ti mua so, fade mbi yeke mu lege na ala ti tene peko ti tënë ti yanga ti mbi na azo na ya ti lango saki oko ngbangbo use na baleomene.”

⁴Azo use so ayeke akeke ti olive use na agere ti lamba use so ayeke luti na dawa ti *Kota Gbia ti sese.

⁵Tongana mbeni zo aye ti sara sioni na ala, wâ ayeke sigigi na yanga ti ala si ayeke gbi awato ti ala ni. Zo so kue aye ti sara sioni na ala, alingbi lo kui gi tongaso.

⁶Ala yeke na ngangu ti kanga le ti nduzu si na ndembe so kue ala yeke tene peko ti tënë ti yanga ti Nzapa, ngu ayeke pika pepe. Ala yeke na ngangu na ndö ti angu kue ti sara si angu ni aga mene. Ala yeke nga na ngangu ti sara aye ti sioni nde nde na sese fani mingi tongana ti so be ti ala aye.

⁷Me tongana ala hunzi tenengo peko ti tënë ti yanga ti Nzapa awe, nyama so ayeke londo na ya ti *kota du so alinda mingi ayeke sigigi, lo yeke tiri bira na ala, lo yeke hon ndö ti ala si lo yeke fâ ala.

⁸Fade kuâ ti ala ayeke ngba na ndö ti kota balabala ti ya ti kota gbata ni, gbata so azo afâ Kota Gbia ti ala na ndö ti keke ti kroa daa so. Azo airi kota gbata ni na lege ti *mato atene, “Sodome” wala “Ezipte.”

⁹Fade azo ti akodro nde nde, azo ti akete mara nde nde, azo ti ayanga ti kodro nde nde na azo ti amara nde nde ayeke londo ti ga ti baa kuâ ti azo use so na ya ti lango ota na ndambo. Azo ayeke yeda pepe titene a lu kuâ ti azo ni.

¹⁰Azo ti ndö ti sese ayeke duti na ngia ndali ti kuâ ti azo use so. Ala yeke sara matanga, ala yeke mu akadoo na amba ti ala, ngbanga ti so awayanga-Nzapa use so aga na pasi mingi na ndö ti azo.

¹¹Na peko ti lango ota na ndambo ni, mbeni pupu so ayeke mu fini na zo alondo na Nzapa, aga ali na ya ti azo use so; ala londo aluti na ndö ti gere ti ala. Kota mbeto agbu azo so kue ayeke baa ala.

¹²Awayanga-Nzapa use so ama mbeni kota go so alondo na yayu si ayeke tene na ala, atene: “Ala ma na nduzu ge!” Na le ti awato ti ala, ala londo ague na yayu na ya ti mbinda.

¹³Gi na ndembe ni so sese ayingi ngangu; mbeni mbage oko na popo ti ambage baleoko ti gbata ni ati, azo saki mbarambara akui na ya ti ye ti ngangu so. Kota mbeto agbu tanga ti azo so angba na fini so si ala gonda Nzapa so ayeke na yayu.

¹⁴Use ye ti mawa ni ahon awe; me ota ye ti mawa ni aga nduru ti si.

¹⁵Mbarambara *ange ni ahuru tatalita ti lo. Mbi ma akota go so alondo na yayu, atene: “Fadeso lengo-gbia ayeke ti *Kota Gbia ti e, lo na *Mesii ti lo; fade lo yeke le-gbia kpu na kpu!”

¹⁶*Akangba baleuse na osio so ayeke duti na ndö ti ambata ti gbia na dawa ti Nzapa akuku, akpo li ti ala na sese

¹⁷si ala tene: “Kota Gbia Nzapa, mo so ngangu ti mo ahon angangu kue, mo yeke laso, mo yeke ando, e mu singila na mo; mo fa kota ngangu ti mo awe si mo to nda ti le-gbia.

¹⁸Amara nde asara ngonzo, me ndembe ti ngonzo ti mo asi awe, ndembe titene a fâ ngbanga na li ti azo so akui awe. So ayeke ndembe ti mungo futa na azo ti kua ti mo, awayanga-Nzapa, ala na azo ti mo so ayeke kpe mbeto ti mo, akete zo na akota zo. So ayeke ndembe ti bubango azo ti bubango sese.”

¹⁹Kota da ti Nzapa so ayeke na yayu, yanga ni azi si zo alingbi ti baa sanduku ti *mbuki so ayeke na ya ti kota da ni. Tongaso, wâ ti bekpa aza, a ma go ti azo, bekpa asungba, sese ayingi si *apembe ti bekpa atuku ngangu.