Read sango Aye so Nzapa afa 15 Bible Online

Aye so Nzapa afa 15 - sango bible

Aye so Nzapa afa 15

¹Na pekoni, mbi baa mbeni ye ti kpene nde na yayu; ye ni ayeke kota mingi si ayeke nga ye ti dongo be. Mbi baa *a-ange mbarambara so agbu tanga ti aye ti sioni mbarambara na maboko ti ala. Biani, tanga ti aye so ayeke sara titene ngonzo ti Nzapa ahunzi.

²Mbi baa mbeni ye so akpa kota ngu-ingo so zo ayeke baa ndo na ya ni kue, abongbi ni na wâ. Mbi baa azo so aso benda na ndö ti nyama ni, na ndö ti limo ti lo nga na ndö ti nimoro ti iri ti lo, ala yeke luti na ndö ti kota ngu-ingo so zo ayeke baa ndo na ya ni kue. Kundi so Nzapa amu na ala ayeke na maboko ti ala.

³Ala yeke he bia ti Moïse, zo ti kua ti Nzapa, nga na bia ti Molenge ti Taba; bia ni atene: “*Kota Gbia, Nzapa so ngangu ti mo ahon angangu kue, aye so mo sara ayeke kota mingi si ayeke nga aye ti dongo be! Gbia ti amara nde, lege ti sarango ye ti mo ayeke mbirimbiri si ayeke na lege ti taa-tënë!

⁴Kota Gbia, zo wa laa ayeke kpe mbeto ti mo pepe? Zo wa laa ayeke gonda iri ti mo pepe? Biani, gi mo oko laa mo yeke nde si mo yeke nzoni kue. Fade amara kue ayeke ga ti kuku na gbe ti mo, ndali ti so ala kue abaa fadeso lege so mo yeke fâ na ngbanga ti mo awe.”

⁵Na pekoni, mbi baa kota da ti Nzapa so ayeke na yayu; yanga ni azi. Mbi baa da ti bongo so Nzapa na azo ti lo ayeke wara tere daa ayeke na ya ti kota da ni.

⁶A-ange mbarambara so agbu aye ti sioni mbarambara na maboko ti ala, alondo na ya ti kota da ti Nzapa, asigigi. Ala yu bongo so a sara na *len ti nzoni ni so aza zango si ala kanga na kate ti ala kamba ti ndö ti bongo so a sara na lôro.

⁷Mbeni oko na popo ti aye osio so ayeke na fini amu akopo mbarambara na a-ange mbarambara so; a sara akopo ni na lôro. Ya ti akopo ni asi singo na ngonzo ti Nzapa, lo so lo yeke na fini kpu na kpu.

⁸Ya ti kota da ti Nzapa asi na guru ti wâ ndali ti gonda ti Nzapa na ngangu ti lo. Zo oko alingbi ti li na ya ti kota da ni pepe, ngbii aye ti sioni mbarambara so a-ange aga na ni so ahunzi si.