Read sango Aye so Nzapa afa 16 Bible Online

Aye so Nzapa afa 16 - sango bible

Aye so Nzapa afa 16

¹Na pekoni, mbi ma mbeni kota go so alondo na ya ti kota da ti Nzapa si atene na *a-ange mbarambara so, atene: “Ala gue, atuku ngonzo ti Nzapa so ayeke na ya ti akopo mbarambara so na ndö ti sese!”

²Kozo ange ni ague, lo tuku ye ti ya ti kopo ti lo na ndö ti sese. Ambeni sioni ka so aso mingi amu tere ti azo so kue ayeke lani na nzoroko ti nyama ni na tere ti ala, ala so ayeke voro limo ti nyama ni.

³Use ange ni atuku ye ti ya ti kopo ti lo na ya ti kota ngu-ingo. Ngu ni aga tongana mene ti zo so akui awe; anyama so kue ayeke na fini na ya ti kota ngu-ingo akui.

⁴Ota ange ni atuku ye ti ya ti kopo ti lo na ya ti *abale na ali ti ngu; abale na ali ti ngu ni kue aga mene.

⁵Mbi ma ange so ayeke na komandema na ndö ti angu, lo tene: “Mo yeke mbirimbiri, mo yeke laso, mo yeke ando, mo yeke nde si mo yeke nzoni kue; fango ngbanga ti mo ayeke na legeni!

⁶Biani, ndali ti so azo ni atuku ando mene ti azo ti mo na ti awayanga-Nzapa, mo mu na ala mene ti nyon. Ye so alingbi na ala laa.”

⁷Na pekoni, mbi ma mbeni go so alondo na mbage ti gbalaka si atene: “Biani, *Kota Gbia, Nzapa so ngangu ti mo ahon angangu kue, fango ngbanga ti mo ayeke na lege ti taa-tënë si ayeke nga mbirimbiri!”

⁸Osio ange ni atuku ye ti ya ti kopo ti lo na ndö ti lâ. Tongaso, a mu lege na lâ ti gbi azo na wâ ti lo.

⁹Ngangu ndo-wâ agbi azo; ala zonga iri ti Nzapa so ayeke na ngangu na ndö ti asioni ye so kue, me ala ke ti zia ngbene lege ti sarango ye ti ala, ala ke ti gonda Nzapa.

¹⁰Oku ange ni atuku ye ti ya ti kopo ti lo na ndö ti mbata ti gbia so nyama ni ayeke duti daa. Ndo avuko pitipiti na ndö ti kodro so nyama ni ale-gbia daa. Azo ate menga ti ala ndali ti pasi so ala yeke baa.

¹¹Azo ni azonga Nzapa so ayeke na yayu ndali ti pasi so ala yeke baa, nga ndali ti asioni ka so ayeke na tere ti ala. Me ala zia lege ti sarango asioni ye ti ala pepe.

¹²Omene ange ni atuku ye ti ya ti kopo ti lo na ya ti bale ti Efrate. Ngu ni ahole ti leke lege na agbia so alondo na To si ayeke ga.

¹³Na pekoni, mbi baa asioni yingo ota so akpa adale; ala londo na yanga ti sioni nyama so akpa ngunde, na yanga ti nyama so alondo na ya ti kota ngu-ingo nga na yanga ti wayanga-nzapa ti mvene si ayeke sigigi.

¹⁴Ayingo so ayeke asioni yingo so ayeke sara aye ti kpene. Ala gue ti wara agbia ti dunia kue ti bongbi ala na ndo oko ngbanga ti bira so ayeke ti ande na kota lango ti Nzapa so ngangu ti lo ahon angangu kue.

¹⁵Kota Gbia atene: “Baa, mbi yeke ga tongana zo ti nzi! Ti lo nzoni, zo so alango pepe si lo bata bongo ti lo na tere ti lo. Tongaso, fade lo yeke tambula na tere ti lo senge pepe, kamene ayeke sara lo na le ti azo pepe.”

¹⁶Ayingo ni abongbi agbia ni na ndo so a iri ni na yanga ti hebro “Harmagedon”.

¹⁷Mbarambara ange ni atuku ye ti ya ti kopo ti lo na ya ti pupu. Mbeni kota go alondo na mbage ti mbata ti gbia so ayeke na ya ti kota da ti Nzapa si atene: “Awe!”

¹⁸Tongaso, wâ ti bekpa aza, ambeni go atoto ngangu, bekpa asungba si sese ayingi ngangu. Ti londo na ndembe so zo ayeke na ndö ti sese ngbii asi laso, sese ade ti yingi tongaso laoko pepe.

¹⁹Ya ti kota gbata ni akangbi ota si agbata ti akodro nde nde atuku na sese. Nzapa adabe ti lo na kota gbata ti Babilone; lo mu vin ti ngonzo ti lo ti wâ na ya ti kopo titene azo ti gbata ni anyon.

²⁰Azoa kue ahon, ahoto kue ahon nga.

²¹Akota *pembe ti bekpa so nengo ni aga nduru na kilo baleosio, alondo na nduzu si atuku na ndö ti azo. Azo ni azonga Nzapa ngbanga ti apembe ti bekpa ni, nga ngbanga ti so apembe ti bekpa ni asara ngangu na ala ahon ndoni.