Read sango Aye so Nzapa afa 19 Bible Online

Aye so Nzapa afa 19 - sango bible

Aye so Nzapa afa 19

¹Na pekoni, mbi ma mbeni kota go tongana ti gba ti azo na yayu; ala tene: “Aleluya! Nzapa ayeke Wasongo e! Gonda na ngangu ayeke ti lo!

²Fango ngbanga ti lo ayeke na lege ti taa-tënë si ayeke mbirimbiri! Lo fâ ngbanga na li ti kota wali-ndumba so abuba ndö ti sese na sarango aye ti ndumba ti lo. Nzapa afâ ngbanga na li ti lo ndali ti so lo fâ azo ti kua ti Nzapa.”

³Ala kiri atene: “Aleluya! Wâ so agbi kota gbata ni, guru ni ayeke sigigi kpu na kpu!”

⁴*Akangba baleuse na osio na aye osio so ayeke na fini akuku si ala voro Nzapa so ayeke duti na ndö ti mbata ti gbia so, ala tene: “Amen! Aleluya!”

⁵Mbeni go alondo na mbage ti mbata ti gbia ni si atene: “Ala azo ti kua ti Nzapa kue, ala akota zo na akete zo, ala so ayeke kpe mbeto ti lo, ala sepela Nzapa!”

⁶Mbi ma mbeni go tongana ti gba ti azo; go ni ayeke tongana toto ti kota ngu na ti bekpa so asungba ngangu, atene: “Aleluya! Biani, *Kota Gbia, Nzapa ti e so ngangu ti lo ahon angangu kue ato nda ti le-gbia awe!

⁷Ayeke nzoni e sara ngia, e dodo na ngia! E gonda lo! Biani, ndembe ti matanga ti mungo wali ti Molenge ti Taba alingbi awe! Wali so lo ye ti mu lo so aleke tere ti lo awe.

⁸A mu na lo pendere bongo ti *len so ayeke za zango si ayeke *nzoni titene lo yu ni.” (Bongo ti len ni ayeke aye ti mbirimbiri so azo ti Nzapa asara.)

⁹*Ange ni atene na mbi: “Su tënë so na mbeti: ‘Ti ala nzoni, azo so a tisa ala ti gue na matanga ti mungo wali ti Molenge ti Taba!’ ” Ange ni akiri atene: “So taa atënë so alondo na Nzapa.”

¹⁰Mbi kuku na gbe ti ange ni ti voro lo, me lo tene na mbi: “Sara ye tongaso pepe! Mbi yeke gi mba ti mo, zo ti kua; mbi yeke nga mba ti a-ita ti mo na ti azo so kue abata taa-tënë so Jésus afa. Mo voro gi Nzapa!” Taa-tënë so Jésus afa, ni laa amu ngangu na awayanga-Nzapa ti sara na kua ti ala.

¹¹Na pekoni, mbi baa yanga ti yayu azi si mbeni vuru mbarata ayeke daa; iri ti lo so aduti na ndö ti mbarata ni ayeke “Zo ti batango tënë ti yanga ti lo” nga na “Zo ti tenengo taa-tënë.” Lo yeke fâ ngbanga na legeni si lo yeke tiri bira na lege ti mbirimbiri.

¹²Le ti lo ti bango na ndo ayeke za tongana menga ti wâ, akpoto mingi ti gbia ayeke na li ti lo. A su mbeni iri na tere ti lo so zo oko ahinga nda ni pepe, me gi lo oko.

¹³Lo yu kota bongo so a yoro na ya ti mene. Iri ti lo ayeke “Tënë ti Nzapa.”

¹⁴Aturugu ti yayu amu peko ti lo, ala kue ayeke na ndö ti avuru mbarata si ala yu pendere vuru bongo so a sara na *len si ayeke *nzoni.

¹⁵Mbeni yongoro zeme so yanga ni aza mingi alondo na yanga ti lo si ayeke sigigi. Na yongoro zeme ni laa, alingbi lo kinda azo ti amara nde. Fade lo yeke fa lege na ala na komandema ti ngangu; lo yeke do ale ti *vinye na ya ti du ti petengo na vin ti kota ngonzo ti Nzapa so ngangu ti lo ahon angangu kue.

¹⁶A su iri na ndö ti kota bongo ti lo nga na ndö ti gere ti lo; iri ni ayeke: “Gbia ti agbia, *Kota Gbia ti akota gbia.”

¹⁷Na pekoni, mbi baa mbeni *ange so ayeke luti na ya ti lâ. Lo dekongo ngangu na andeke so kue ayeke huru yongoro kâ na le ti nduzu, lo tene: “Ala ga abongbi tere ti ala ndali ti kota matanga ti Nzapa!

¹⁸Ala ga ate kasa ti tere ti agbia, ti aturugu ti kota kamba, ti aturugu, ti ambarata, ti azo so ayeke kpe na ambarata ni, ti azo kue: akota zo na akete zo, angbaa na ala so ayeke angbaa pepe!”

¹⁹Mbi baa nyama ni, agbia ti ndö ti sese nga na aturugu ti ala. Ala bongbi tere ti ala ti tiri na lo so ayeke duti na ndö ti mbarata ni, lo na aturugu ti lo.

²⁰A gbu nyama ni na wayanga-nzapa ti mvene so asara aye ti kpene na dawa ti lo so. Na lege ti aye ti kpene laa lo wara lege ti handa azo so awara nzoroko ti nyama ni si avoro limo so akpa nyama ni so. A mu ala use kue si a bi ala na fini le ti ala na le ti kota wâ ti *sufre.

²¹A fâ aturugu ti ala kue na yongoro zeme so ayeke sigigi na yanga ti lo so ayeke na ndö ti mbarata ni; andeke kue ate kasa ti tere ti azo ni, ya ti ala asi.