Read sango Aye so Nzapa afa 2 Bible Online

Aye so Nzapa afa 2 - sango bible

Aye so Nzapa afa 2

¹“Su mbeti so, mo tokua na *ange so ayeke na li ti *Eglize ti gbata ti Efeze: “Baa, lo so lo gbu atongoro mbarambara na maboko ti lo ti koli si ayeke tambula na popo ti agere ti lamba mbarambara so a sara ni na lôro, atene:

²Mbi hinga aye so mo yeke sara, na pasi so mo yeke baa na sarango kua ti mo, na kangango be ti mo. Mbi hinga so mo lingbi pepe ti kanga be ti mo na azo ti sioni. Azo so ayeke tene, ani yeke *awatokua, andaa ala yeke awatokua biani pepe so, mo tara ala si mo baa so ala yeke azo ti mvene.

³Mo kanga be ti mo: mo baa pasi ndali ti mbi, be ti mo awoko pepe.

⁴Me ye so mbi ke na mo ayeke so: mo ye mbi tongana ti kozoni pepe.

⁵Dabe ti mo na ndo so mo londo daa si mo ti! Zia lege ti sarango ye so mo yeke sara fadeso, kiri mo sara ye so mo sara kozoni. Tongana mo ngba na sioni lege so, fade mbi yeke ga ti zi gere ti alamba ti mo na ndo so ayeke daa.

⁶Me mbeni nzoni ye so mbi baa na mbage ti mo ayeke so: be ti mo ake sarango ye ti azo so amu peko ti Nicolas; mbi nga, be ti mbi ake sarango ye ti ala.

⁷“Zo so ayeke na mê ti mango ndo, ayeke nzoni lo ma tënë so Yingo ayeke tene na a-Eglize! “Zo so aso benda, fade mbi yeke mu na lo lege ti te le ti keke so ayeke mu fini na zo si ayeke na ya ti *paradi ti Nzapa.”

⁸“Su mbeti so, mo tokua na *ange so ayeke na li ti *Eglize ti gbata ti Simirne: “Baa, lo so lo yeke kozo ni si lo yeke ndangba ni, lo so akui si lo kiri na fini, atene:

⁹Mbi hinga so mo yeke na ya ti ye ti ngangu, mo yeke wayere — andaa mo yeke zo ti mosoro! — Ambeni zo atene, ani yeke azuife, andaa ala yeke taa azuife pepe. Ala yeke bongbi ti azo so ayeke sambela Satan. Mbi hinga atënë ti mvene so azo ni ayeke du na li ti mo.

¹⁰Mo yeke baa ande pasi, me ayeke nzoni mbeto ti pasi ni asara mo pepe. Baa, fade Zabolo ayeke bi ambeni zo na popo ti ala na da ti kanga, ti tara be ti ala, azo ti Nzapa; na ya ti lango baleoko kue, a yeke sara ngangu na ala. Ayeke nzoni mo bata tënë ti mbi ngbii asi na kuâ, fade mbi yeke mu na mo nzoni ye so a yeke mu na zo so aso benda, so ti tene fini so angba lakue lakue.

¹¹“Zo so ayeke na mê ti mango ndo, ayeke nzoni lo ma tënë so Yingo ayeke tene na a-Eglize! “Zo so aso benda, fade lo yeke kui kuâ ti use ni oko pepe.”

¹²“Su mbeti so, mo tokua na *ange so ayeke na li ti *Eglize ti gbata ti Pergame: “Lo so lo yeke na yongoro zeme so yanga ni aza mingi mbage na mbage, atene:

¹³Mbi hinga ndo so mo yeke duti daa: ayeke ndo so Satan azia mbata ti lo ti gbia daa, me mo ngba na tere ti mbi; be ti mo so mo zia na ndö ti mbi, mo zia lege ni pepe, ataa na ndembe so a fâ Antipas, lo so lo fa tënë na ndö ti mbi na legeni, na ndo so Satan azia mbata ti lo ti gbia daa.

¹⁴Me ambeni ye so mbi ke na mo ayeke so: na ndo ti mo, ambeni zo ayeke daa so ayeke mu peko ti Balaam na lege ti fango tënë ti lo. Ando Balaam amu wango na Balak titene lo handa azo ti Israel ti te anyama so a mu na *sandaga na anzapa nde si ala sara nga aye ti ndumba.

¹⁵Na ndo ti mo nga, ambeni zo amu tere ti ala kue ti sara ye so azo ti mungo peko ti Nicolas ayeke fa.

¹⁶Tongaso, mo zia ngbene lege ti sarango ye ti mo. Tongaso pepe, fade mbi yeke ga fafadeso ti tiri na azo so na yongoro zeme so ayeke sigigi na yanga ti mbi.

¹⁷“Zo so ayeke na mê ti mango ndo, ayeke nzoni lo ma tënë so Yingo ayeke tene na a-Eglize! “Zo so aso benda, fade mbi yeke mu na lo *mane so angba na hondengo ni. Mbi yeke mu nga na lo mbeni vuru têne so a su fini iri na ndö ni, mbeni zo nde ahinga iri ni pepe, gi zo so awara iri ni si ahinga.”

¹⁸“Su mbeti so, mo tokua na *ange so ayeke na li ti *Eglize ti gbata ti Tiatire: “Molenge ti Nzapa, lo so le ti lo ti bango na ndo aza tongana menga ti wâ si agere ti lo akpa bengba wen so a kpaka ni si aza zango, lo tene:

¹⁹Mbi hinga aye so mo yeke sara, ndoye ti mo, mabe ti mo, nzoni ye so mo yeke sara na azo nga na kangango be ti mo. Aye so mo yeke sara fadeso ahon ti so mo sara kozoni.

²⁰Me ye so mbi ke na mo ayeke so: mo zia lege na Yezabel, wali so, ti sara si azo ti kua ti mbi agirisa lege. Lo yeke tene na azo atene, ni yeke wayanga-Nzapa, lo yeke fa lege na azo ti mbi ti sara aye ti ndumba si ala yeke te akobe so a mu na *sandaga na ayanda.

²¹Mbi zia na lo ngoi titene lo zia ngbene lege ti sarango ye ti lo, me lo ye ti zia lege ti sarango ye ti ndumba ti lo ni pepe.

²²Ndani laa mbi yeke bi lo na ndö ti gbogbo na kobela titene lo baa pasi mingi, lo na azo so lo na ala ayeke sara aye ti ndumba. Tongana ala zia ngbene lege ti sarango ye ti ala ni pepe, pasi ni ayeke si na ala.

²³Fade mbi yeke fâ azo so kue ayeke mu peko ti wali ni. Na pekoni, a-Eglize kue ayeke hinga atene, mbi yeke lo so lo hinga tënë so ayeke na ya ti be ti zo nga na nzara ti be ti zo. Fade mbi yeke futa zo oko oko alingbi na ye so lo sara.

²⁴“Me ti ala azo ti Tiatire, ambeni zo na popo ti ala ake ti mu peko ti asioni tënë so azo ni ayeke fa. Ala so ake ti zia be ti ala na ndö ti atënë so azo ni airi ni ‘atënë ti Satan so angba na hondengo ni’, mbi tene na ala: mbi ye ti zia na ndö ti ala mbeni nengo kungba nde pepe.

²⁵Gi ye oko, ye so ayeke na maboko ti ala, ala bata ni ngangu ti ku na gango ti mbi.

²⁶“Zo so aso benda si lo ngba ti sara aye so mbi ye ngbii asi na ndani, fade mbi yeke mu na lo komandema na ndö ti amara nde.

²⁷Fade lo yeke fa lege na ala na komandema ti ngangu, lo yeke fâ ya ti ala kete kete tongana ti so zo ayeke fâ ya ti ta ti sese.

²⁸Tongaso laa mbi wara komandema ni na maboko ti Babâ ti mbi. Fade mbi yeke mu na lo tongoro ti ndaperere.

²⁹“Zo so ayeke na mê ti mango ndo, ayeke nzoni lo ma tënë so Yingo ayeke tene na a-Eglize!”