Read sango Aye so Nzapa afa 22 Bible Online

Aye so Nzapa afa 22 - sango bible

Aye so Nzapa afa 22

¹Na pekoni, *ange ni afa na mbi kota *bale so ayeke mu fini na zo; zo ayeke baa ndo na ya ti bale ni kue. Ngu ni alondo na mbage ti mbata ti Gbia Nzapa na ti Molenge ti Taba si ayeke sigigi.

²Ngu ni asua, ahon na be ti balabala ti ya ti gbata ni. Na atere ti ngu ni, mbage na mbage, keke so ayeke mu fini na zo ayeke daa. Keke ni ayeke le fani baleoko na use na ya ti ngu oko, so ti tene nze na nze. Akugbe ti keke ni ayeke yoro ti kaingo na kobela na tere ti amara.

³Mbeni ye so Nzapa adeba ni ayeke duti ande na ya ti gbata ni pepe. Mbata ti Gbia Nzapa na ti Molenge ti Taba ayeke duti na ya ti gbata ni si azo ti kua ti lo ayeke voro lo.

⁴Azo ni ayeke baa le ti lo si a yeke su iri ti lo na ndö ti le ti ala.

⁵Ndo ayeke kiri ti vuko na ndo ni so pepe, azo ayeke ku zango ti lamba wala sungo ti lâ ti baa ndo na ni pepe, ngbanga ti so *Kota Gbia Nzapa ayeke su na ndö ti ala. Ala yeke le-gbia kpu na kpu.

⁶Na pekoni, *ange ni atene na mbi: “Tënë so ayeke taa-tënë, zo alingbi ti zia be ti lo na ndö ni. *Kota Gbia, Nzapa so ayeke mu Yingo ti lo na awayanga-Nzapa, lo laa lo tokua ange ti lo ti fa na azo ye so aga nduru ti si.”

⁷Jésus atene: “Baa, mbi yeke ga fafadeso! Ti lo nzoni, zo so asara ye alingbi na tënë ti peko ti yanga ti Nzapa so a su na ya ti buku so!”

⁸Mbi Jean, mbi ma atënë so si mbi baa nga aye so. So mbi ma atënë ni si mbi baa aye ni awe, mbi kuku na gbe ti ange ni ti voro lo, lo so afa aye ni na mbi so.

⁹Me lo tene na mbi: “Sara ye tongaso pepe! Mbi yeke gi mba ti mo zo ti kua; mbi yeke nga mba ti a-ita ti mo awayanga-Nzapa, na ala so kue asara ye alingbi na tënë ti ya ti buku so. Mo voro gi Nzapa!”

¹⁰Lo kiri lo tene na mbi: “Atënë ti peko ti yanga ti Nzapa so a su na ya ti buku so, mo honde ni pepe, ngbanga ti so ngoi ti singo ti aye ni aga nduru awe.

¹¹Zo so ayeke kirikiri, ayeke nzoni lo ngba ti sara ye ti kirikiri; zo so ayeke sara sioni ye, ayeke nzoni lo ngba ti sara sioni ye. Zo so ayeke mbirimbiri, ayeke nzoni lo ngba ti sara ye ti mbirimbiri. Zo so ayeke ti Nzapa, ayeke nzoni lo ngba zo ti Nzapa.”

¹²Jésus atene: “Baa, mbi yeke ga fafadeso! Mbi yeke ga na futa ti mbi ti kangbi na zo oko oko alingbi na ye so lo sara.

¹³Mbi yeke *Alfa na *Omega, mbi yeke lo so ayeke kozo ni na lo so ayeke ndangba ni, mbi yeke tongo nda ti aye kue si mbi yeke kongo nda ti aye kue.”

¹⁴Ti ala nzoni, ala so asukula bongo ti ala avuru, tongaso si ala wara lege ti te lengo ti keke so ayeke mu fini na zo si ala wara nga lege ti li na ayanga ti gbagba ni ti gue na ya ti gbata ni.

¹⁵Na gigi, azo so sarango ye ti ala akpa ti mbo, azo ti guengo na gbe ti yoro, azo ti sarango aye ti ndumba, azo ti fango zo nga na azo so aye mvene si ayeke tene mvene!

¹⁶“Mbi Jésus, mbi tokua ange ti mbi ti gue ti fa peko ti aye so na *a-Eglize. Mbi yeke *hale ti sewa ti David, mbi yeke tongoro ti ndaperere so ayeke za mingi.”

¹⁷Yingo-Vuru na wali so amu koli na fini ni atene: “Ga!” Ayeke nzoni zo so ama tënë so, atene: “Ga!” Zo so nzara ti ngu asara lo, ayeke nzoni lo ga. Zo so ayeda, ayeke nzoni lo mu ngu senge senge lo nyon, ngu so ayeke mu fini na zo.

¹⁸Azo so kue ayeke ma tënë ti peko ti yanga ti Nzapa so ayeke na ya ti buku so, mbi Jean, mbi tene tënë so mbirimbiri na ala: tongana mbeni zo azia mbeni tënë na ndö ni, fade Nzapa ayeke zia aye ti sioni so a tene tënë ni na ya ti buku so na ndö ti lo.

¹⁹Tongana mbeni zo azi mbeni tënë ti peko ti yanga ti Nzapa so ayeke na ya ti buku so, fade Nzapa ayeke zi ye so aga ti zo ni si a tene tënë ni na ya ti buku so, so ti tene le ti keke so ayeke mu fini na zo nga na gbata so ayeke nde si ayeke nzoni kue.

²⁰Zo so atene tënë ti aye so, lo tene, aye ni ayeke taa-tënë; lo tene: “Biani, mbi yeke ga fafadeso!” Amen! Ga, *Kota Gbia Jésus!

²¹Ayeke nzoni Kota Gbia Jésus asara nzoni be na azo kue!