Read sango Aye so Nzapa afa 3 Bible Online

Aye so Nzapa afa 3 - sango bible

Aye so Nzapa afa 3

¹“Su mbeti so, mo tokua na *ange so ayeke na li ti *Eglize ti gbata ti Sarde: “Lo so lo yeke na ayingo ti Nzapa mbarambara na atongoro mbarambara, atene: mbi hinga aye so mo yeke sara. Azo abaa mo atene, mo yeke na fini, andaa mo kui awe.

²Ayeke nzoni mo zingo. Ye so angba na mo si ayeke kui kuingo so, ayeke nzoni mo sara titene ye ni akiri atambula ngangu. Biani, mbi baa ye so mo yeke sara ayeke nzoni kue na le ti Nzapa ti mbi pepe.

³Mo dabe ti mo na tënë so a fa na mo si mo ma ni ando so. Sara ye alingbi na ni, zia ngbene lege ti sarango ye ti mo. Tongana mo zingo pepe, fade mbi yeke ga na tere ti mo tongana zo ti nzi, mo yeke hinga ngoi so mbi yeke ga na ni pepe.

⁴Me ambeni zo oko oko ayeke na Sarde so abata bongo ti ala nzoni. Fade ala yeke tambula na tere ti mbi na vuru bongo, ngbanga ti so ala lingbi ti yu ni.

⁵“Zo so aso benda, fade lo yeke yu vuru bongo. Fade mbi yeke zi iri ti lo pepe na ya ti mbeti so a su iri ti azo so ayeke na taa fini daa. Mbi yeke tene polele na le ti Babâ ti mbi na ti a-ange ti lo mbi tene, lo yeke zo ti mbi.

⁶“Zo so ayeke na mê ti mango ndo, ayeke nzoni lo ma tënë so Yingo ayeke tene na a-Eglize!”

⁷“Su mbeti so, mo tokua na *ange so ayeke na li ti *Eglize ti gbata ti Filadelfii: “Lo so lo yeke nde si lo yeke nzoni kue, lo so lo yeke tene gi taa-tënë, lo so lo yeke na kerere ti David na maboko ti lo, lo laa lo yeke tene tënë so. Tongana lo zi yanga ti da, mbeni zo alingbi ti kanga ni pepe; tongana lo kanga ni, mbeni zo alingbi ti zi ni pepe.

⁸Lo tene: Mbi hinga aye so mo yeke sara. Mbi zi mbeni yanga ti da na dawa ti mo so mbeni zo alingbi ti kanga ni pepe. Mo yeke na ngangu mingi pepe, me mo sara ye alingbi na tënë ti mbi si mo bere tënë ti mbi pepe.

⁹Baa, ambeni zo atene, ani yeke azuife, andaa ala yeke taa azuife pepe. Ala yeke tene mvene, ala yeke azo ti bongbi ti Satan. Fade mbi yeke sara titene ala ga, ala kuku na gbe ti mo si ala hinga atene, mbi ye mo.

¹⁰Mo bata tënë ti mbi, mo zia lege ni oko pepe. Ndani laa mbi nga, mbi yeke bata mo na ngoi ti aye ti tarango be so ayeke si ande na azo ti sese kue.

¹¹Mbi yeke ga fafadeso. Ye so ayeke na maboko ti mo so, mo gbu ni ngangu, tongaso si mbeni zo agboto pepe nzoni ye so a yeke mu na zo so aso benda.

¹²“Zo so aso benda, fade mbi yeke sara titene lo ga tongana ngbongboro têne ti gbungo-li ti da, na ya ti kota da ti Nzapa ti mbi; lo yeke sigigi na ya ti da ni oko pepe. Mbi yeke su iri ti Nzapa ti mbi na iri ti gbata ti Nzapa ti mbi so ayeke fini Jérusalem na tere ti zo ni, gbata so ayeke londo na tere ti Nzapa ti mbi na yayu si ayeke zu na sese. Mbi yeke su nga fini iri ti mbi na tere ti zo ni.

¹³“Zo so ayeke na mê ti mango ndo, ayeke nzoni lo ma tënë so Yingo ayeke tene na a-Eglize!”

¹⁴“Su mbeti so, mo tokua na *ange so ayeke na li ti *Eglize ti gbata ti Laodise: “Lo so iri ti lo ayeke Amen, lo so lo yeke taa zo ti fango peko ti tënë na legeni mbirimbiri si lo yeke na tongo nda ti ye so kue Nzapa asara, lo tene:

¹⁵Mbi hinga aye so mo yeke sara: mo yeke de pepe si mo yeke nga wâ pepe. Tongana mo yeke fade de wala mo yeke fade wâ, ka ayeke nzoni!

¹⁶Me so mo yeke de kete, mo yeke de pepe si mo yeke wâ pepe so, fade mbi yeke de mo na yanga ti mbi.

¹⁷Mo yeke tene: ‘Mbi yeke zo ti mosoro, mbi wara mosoro mingi, mbeni ye atia mbi pepe.’ Andaa mo hinga pepe mo tene, mo yeke zo ti mawa, zo so ye ahon ndö ti lo, zo ti iringo ye, waziba na zo so bongo ayeke na tere ti lo pepe.

¹⁸Ndani laa mbi yeke mu wango na mo titene mo vo lôro so a kporo ni na wâ si a zi asioni ye kue daa so; vo ni na maboko ti mbi si mo ga zo ti mosoro. Vo nga abongo na maboko ti mbi titene mo yu si azo abaa tere ti mo so ayeke senge so pepe. Vo yoro ti le na maboko ti mbi, mo zia na le ti mo si mo kiri mo baa ndo nzoni.

¹⁹Azo so kue mbi ye ala, mbi yeke pika ala si mbi yeke kiri ala na nzoni lege. Zia be ti mo kue na sarango kua, zia sioni lege ti sarango ye ti mo!

²⁰Baa, mbi yeke luti na yanga ti da si mbi yeke pika ni. Zo so ama go ti mbi si lo zi yanga ti da ni, fade mbi yeke li na ya ti da ti lo si mbi na lo, e yeke te kobe.

²¹“Zo so aso benda, fade mbi yeke mu na lo lege ti duti na tere ti mbi, na ndö ti mbata ti mbi ti gbia, tongana ti so mbi so benda si mbi duti na tere ti Babâ ti mbi na ndö ti mbata ti lo ti gbia so.

²²“Zo so ayeke na mê ti mango ndo, ayeke nzoni lo ma tënë so Yingo ayeke tene na a-Eglize!”