Read sango Aye so Nzapa afa 6 Bible Online

Aye so Nzapa afa 6 - sango bible

Aye so Nzapa afa 6

¹Na pekoni, mbi baa Molenge ti Taba azi kozo *nzoroko ti anzoroko mbarambara so; mbi ma mbeni oko ti aye osio so ayeke na fini adekongo, go ti lo akpa toto ti bekpa, lo tene: “Ga!”

²Mbi baa ndo si mbi baa mbeni vuru mbarata. Zo so aduti na ndö ti lo agbu kokora na maboko ti lo; a mu na lo mbeni kpoto ti gbia, lo gue tongana walombe so ahon ndö ti azo na bira awe titene lo kiri lo hon ndö ti azo na bira.

³So Molenge ti Taba azi use nzoroko ni, mbi ma use ye so ayeke na fini adekongo, atene: “Ga!”

⁴Tongaso, mbeni mbarata ni asigigi, tere ti lo abe tongana wâ. A mu ngangu na zo so aduti na ndö ti mbarata ni ti zi siriri na ndö ti sese titene azo afâ tere na popo ti ala. A mu nga na lo yongoro zeme.

⁵So Molenge ti Taba azi ota nzoroko ni, mbi ma ota ye so ayeke na fini adekongo, atene: “Ga!” Mbi baa ndo si mbi baa mbeni vuko mbarata asigigi. Zo so ayeke duti na ndö ti mbarata ni agbu kilo na maboko ti lo.

⁶Mbi ma mbeni go na popo ti aye osio so ayeke na fini so, atene: “Ngere ti kilo oko ti *ble alingbi na nginza ti kua ti lango oko; ngere ti kilo ota ti *orze alingbi na nginza ti kua ti lango oko. Me ti mafuta na ti vin, mo ndu ni pepe!”

⁷So Molenge ti Taba azi osio nzoroko ni, mbi ma go ti osio ye so ayeke na fini adekongo, atene: “Ga!”

⁸Mbi baa ndo si mbi baa mbeni mbarata so tere ti lo avuru akpa kuâ. Iri ti zo so aduti na ndö ti mbarata ni ayeke “Kuâ” si ndo ti akuâ ayeke mu peko ti lo. A mu na lo ngangu ti gue na ndö ti sese kue, ti fâ azo na yongoro zeme, na lege ti nzara, na lege ti kuâ nga na lege ti asioni nyama. Tongana azo ayeke osio, lo yeke fâ oko.

⁹So Molenge ti Taba azi oku nzoroko ni, mbi baa na gbe ti gbalaka ayingo ti azo so a fâ ala ndali ti tënë ti Nzapa, wala ndali ti tënë so ala hinga na ndö ti Nzapa.

¹⁰Azo ni ayeke dekongo ngangu, atene: “Gbia, mo so mo yeke nde si mo yeke nzoni kue, mo yeke tene gi taa-tënë; mo yeke ku ande ngbii asi lawa si mo yeke fâ ngbanga na li ti azo ti ndö ti sese titene mo kiri na ala peko ti mene ti e so ala tuku so?”

¹¹Na pekoni, a mu yongoro vuru bongo na ala oko oko kue si a hunda na ala ti ku kete, ngbii azo ni afâ tanga ti amba ti ala, azo ti kua ti Nzapa na a-ita ti ala, tongana ti so a fâ ala so si; me wungo ti ala ade ti lingbi pepe.

¹²So Molenge ti Taba azi omene nzoroko ni, mbi baa sese ayingi ngangu: lâ avuko tongana vuko bongo ti mua, le ti nze aga bengba tongana mene;

¹³atongoro alondo na nduzu atuku na sese tongana ti so ale ti fige so ade ti be pepe ayeke tuku na sese na peko ti so kota pupu ayingi keke ni.

¹⁴Le ti nduzu arule tere ti lo si ayeke hon tongana mbeti so azo ayeke rule ni; ahoto na azoa kue alondo na ndo so ala yeke daa si ahon.

¹⁵Agbia ti sese so, akota zo, amakonzi ti aturugu, azo ti mosoro, angangu zo, azo so ayeke angbaa na azo so ayeke angbaa pepe, ala kue akpe ti honde tere ti ala na ya ti adu ti têne wala na popo ti akota têne so ayeke na ndö ti ahoto.

¹⁶Ala tene na ahoto na atêne ni, atene: “Ala ti na ndö ti e. Ala honde e si lo so lo yeke duti na ndö ti mbata ti gbia so abaa e pepe, tongaso si e kpe ngonzo ti Molenge ti Taba so!

¹⁷Biani, kota lango ti ngonzo ti ala asi awe; zo wa laa alingbi ti ngba na fini, zo wa?”