Read sango Aye so Nzapa afa 7 Bible Online

Aye so Nzapa afa 7 - sango bible

Aye so Nzapa afa 7

¹Na pekoni, mbi baa *a-ange osio, ala yeke luti na ndangoro osio ti sese kue. Ala yeke kanga lege na pupu osio so ayeke ya na ndö ti sese titene pupu ni aya na ndö ti sese, wala na le ti kota ngu-ingo wala na ndö ti akeke pepe.

²Mbi baa mbeni ange nde so alondo na mbage ti To si lo yeke gue na nduzu. Lo gbu na maboko ti lo ye ti kpongo na *nzoroko ti Nzapa, lo so lo yeke na fini. Lo dekongo ngangu na a-ange osio so awara ngangu ti buba sese na kota ngu-ingo so, lo tene:

³“Ala sara sioni na sese, wala na kota ngu-ingo wala na akeke pepe! Ala ku e kpo nzoroko na ndö ti le ti azo ti kua ti Nzapa ti e si.”

⁴A fa na mbi wungo ti azo so kue a kpo nzoroko ti Nzapa na ndö ti le ti ala. Azo ni ayeke azo ti amara kue ti Israel, wungo ti ala ayeke saki ngbangbo oko na baleosio na osio.

⁵Na popo ti azo ti mara ti Juda, a kpo nzoroko na ndö ti le ti azo saki baleoko na use; na popo ti azo ti mara ti Ruben, azo saki baleoko na use; na popo ti azo ti mara ti Gad, azo saki baleoko na use;

⁶na popo ti azo ti mara ti Aser, azo saki baleoko na use; na popo ti azo ti mara ti Neftali, azo saki baleoko na use; na popo ti azo ti mara ti Manase, azo saki baleoko na use;

⁷na popo ti azo ti mara ti Siméon, azo saki baleoko na use; na popo ti azo ti mara ti Lévi, azo saki baleoko na use; na popo ti azo ti mara ti Isakar, azo saki baleoko na use;

⁸na popo ti azo ti mara ti Zabulon, azo saki baleoko na use; na popo ti azo ti mara ti Joseph, azo saki baleoko na use; na popo ti azo ti mara ti Benjamin, azo saki baleoko na use. Ala so kue laa a kpo nzoroko ni na ndö ti le ti ala.

⁹Na pekoni, mbi kiri mbi baa azo gbani gbani, zo alingbi ti diko wungo ti ala pepe. Azo ni ayeke azo ti amara kue, azo ti akete mara kue, azo ti ayanga ti akodro nde nde kue. Ala yeke luti na le ti lo so ayeke duti na ndö ti mbata ti gbia nga na le ti Molenge ti Taba; ala kue ayu ayongoro vuru bongo si ala gbu amaboko ti keke ti mburu na maboko ti ala.

¹⁰Ala yeke dekongo ngangu, atene: “Nzapa ti e so aduti na ndö ti mbata ti gbia, lo na Molenge ti Taba, ala laa asoo e!”

¹¹*A-ange so kue angoro mbata ti gbia ni, na *akangba ni na aye osio so ayeke na fini, ala kue akuku, akpo li ti ala na sese si ala voro Nzapa.

¹²Ala tene: “Amen! Sepelango, gonda, ndara, singila, nengo, komandema na ngangu ayeke ti Nzapa ti e, kpu na kpu! Amen.”

¹³Mbeni kangba ni oko ahunda mbi, atene: “Azo so ayu ayongoro vuru bongo so, azo wa laa? Ala londo na ndo wa?”

¹⁴Mbi kiri tënë na lo, mbi tene: “Kota zo, mo laa mo hinga.” Lo kiri tënë na mbi: “Ala yeke azo so a sara ngangu mingi na ala na ngoi ti aye ti ngangu. Ala sukula bongo ti ala na ya ti mene ti Molenge ti Taba, ala sara si bongo ni avuru.”

¹⁵Ndani laa ala yeke luti na dawa ti mbata ti Gbia Nzapa si ala yeke voro lo bi na lâ na ya ti kota da ti lo. Lo so lo yeke duti na ndö ti mbata ti gbia so ayeke ngba na tere ti ala ti bata ala.

¹⁶Fade nzara ti kobe wala nzara ti ngu ayeke kiri ti sara ala pepe; sungo ti lâ na ndo-wâ ayeke kiri ti zö ala pepe,

¹⁷ngbanga ti so Molenge ti Taba so ayeke na ndö ti mbata ti gbia ayeke bata ala tongana ataba ti lo. Lo yeke gue na ala na li ti ngu so ayeke mu fini na zo. Fade Nzapa ayeke mbo ngu ti le ti ala kue.