Read sango Aye so Nzapa afa 8 Bible Online

Aye so Nzapa afa 8 - sango bible

Aye so Nzapa afa 8

¹So Molenge ti Taba azi mbarambara *nzoroko ni, ndo ade ngii na yayu nduru na ndambo ti ngbonga oko.

²Na pekoni, mbi baa *a-ange mbarambara so ayeke luti na le ti Nzapa; a mu tatalita mbarambara na ala.

³Mbeni ange nde aga aluti nduru na tere ti gbalaka ni; lo gbu na maboko ti lo mbeni kete ta ti zongo na dukani so a sara na lôro. A mu na lo gba ti adukani titene lo bongbi ni na asambela ti azo ti Nzapa ti ya na *sandaga na Nzapa, na ndö ti gbalaka so a sara na lôro si ayeke na dawa ti mbata ti gbia so.

⁴Guru ti dukani so abongbi na sambela ti azo ti Nzapa ni kue alondo na maboko ti ange ni ague na nduzu na dawa ti Nzapa.

⁵Na pekoni, ange ni amu kete ta ti zongo na dukani ni, lo tuku wâ ti ndö ti gbalaka ni na ya ni asi, lo bi ni na ndö ti sese. Tongaso, bekpa asungba, a ma go ti azo, wâ ti bekpa aza, sese ayingi.

⁶*A-ange mbarambara so agbu atatalita mbarambara na maboko ti ala aleke tere ti ala ti huru atatalita ni.

⁷Kozo ange ni ahuru tatalita ti lo. *Pembe ti bekpa na wâ so abongbi na mene atuku na ndö ti sese. Na ndö ti sese kue, mbeni mbage oko na popo ti ambage ota ti sese ni agbi. Ti akeke ti dunia kue, mbeni oko na popo ti akeke ota agbi; afini pere kue agbi.

⁸Use ange ni ahuru tatalita ti lo. A mu mbeni ye so akpa kota hoto so ayeke gbi, a bi ni na ya ti kota ngu-ingo. Mbeni mbage oko na popo ti ambage ota ti kota ngu-ingo ni kue aga mene.

⁹Anyama so kue ayeke na ya ti kota ngu-ingo, mbeni oko na popo ti anyama ota akui; amangboko so ayeke na le ti kota ngu-ingo, mbeni oko na popo ti amangboko ota abuba.

¹⁰Ota ange ni ahuru tatalita ti lo. Mbeni kota tongoro alondo na nduzu ati na sese; tongoro ni ayeke gbi tongana kota menga ti wâ. Angu ti *bale na ali ti ngu, tongoro ni ati na ndö ti mbeni oko na popo ti ambeni ota.

¹¹Iri ti tongoro ni ayeke “Sengo ye.” Mbage oko na popo ti ambage ota ti angu so lo ti daa so asee ahon ndoni; azo mingi akui, ngbanga ti so angu ni asee sengo.

¹²Osio ange ni ahuru tatalita ti lo. A pika mbeni mbage oko na popo ti ambage ota ti lâ na ti nze na ti atongoro oko oko kue si avuko; kota lâ agirisa mbage oko ti zango ti lo na popo ti ambage ni ota so ayeke za; vurungo ndo ti bi asara nga gi tongaso.

¹³Mbi kiri mbi baa ndo, mbi ma mbeni *ngoalo so ayeke huru yongoro kâ na le ti nduzu si ayeke dekongo, atene: “Mawa! Mawa! Mawa na azo ti ndö ti sese ndali ti atatalita so a-ange ota ayeke huru ni ande!”