Read sango 1 Samuel 11 Bible Online

1 Samuel 11 - sango bible

1 Samuel 11

¹Nahash, gbia ti azo ti mara ti Amon aga angoro gbata ti Yabesh, na sese ti Galaad ti tiri bira na azo ni. Azo ti Yabesh kue atene na Nahash: “Sara *mbuki na e si fade e yeke duti na gbe ti mo.”

²Nahash, zo ti mara ti Amon akiri tënë na ala: “Mbi yeke sara mbuki na ala tongana ala yeda titene mbi koro le ti ala oko oko kue ti mbage ti koli si. Tongaso, mbi yeke zia kamene na le ti ala, azo ti Israel kue.”

³*Akangba ti gbata ti Yabesh atene na lo: “Mu na e lango mbarambara si. Fade e yeke tokua yanga na azo ti Israel kue. Tongana mbeni zo ti ga ti soo e ayeke daa pepe, e yeke sigigi ti zia tere ti e na maboko ti mo.”

⁴Awatokua ague, asi na Gibea, gbata ti Saul. Ala tene na azo ni peko ti tënë ti aye so asi. Azo ni kue ati na kota toto.

⁵Na ndembe ni so, Saul alondo na yaka na peko ti abagara ti lo si lo yeke kiri. Lo hunda ndo, lo tene: “Azo ayeke toto ngbanga ti nyen?” Azo atene na lo peko ti tënë ti azo ti Yabesh ni.

⁶So Saul ama tënë so, yingo ti Nzapa aga na ndö ti lo si ngonzo ti lo ti wâ alondo.

⁷Lo mu abagara use, lo doroko ala. Na pekoni, lo tokua azo ti gue na akasa ti nyama ni na sese ti Israel kue. Lo mu yanga na awatokua ni ti tene na azo ti kodro kue, lo tene: “Zo so amu peko ti Saul na Samuel pepe ti gue na bira, baa ye so ayeke si na abagara ti lo laa.” Mbeto ti KOTA GBIA agbu azo kue si ala londo tongana zo oko ti gue.

⁸Saul adiko wungo ti ala na kodro ti Bezek. Wungo ti azo ti Israel ayeke saki ngbangbo ota; wungo ti azo ti Juda ayeke saki baleota.

⁹Ala tene na awatokua so alondo na Yabesh si aga so, atene: “Ala gue, atene na azo ti Yabesh, na sese ti Galaad, atene: Kekereke na kota lâ, fade azo ayeke ga ti mu maboko na ala.” Awatokua ni ague, atene tënë ni na azo ti Yabesh. Na mango tënë ni, be ti azo ni asi singo na ngia.

¹⁰Ala tene na azo ti Amon: “Kekereke e yeke sigigi ti zia tere ti e na maboko ti ala titene ala sara na e ye so be ti ala aye.”

¹¹Lango oko na pekoni, Saul akangbi ya ti aturugu ti Israel ota. So ndo angba kâ, ala gue, ali na ya ti bâbâ ti azo ti Amon. Ala fâ azo ni ngbii asi nduru na bekombite. Atanga ni akpe kirikiri, zo oko angba na tere ti mba ti lo pepe.

¹²Tongaso azo ti Israel atene na Samuel: “Azo wa laa lani ake titene Saul ale-gbia na ndö ti e so? Ala zia azo so na maboko ti e titene e fâ ala!”

¹³Me Saul atene: “Laso, a yeke fâ zo oko pepe, ngbanga ti so KOTA GBIA asoo azo ti Israel na kuâ awe.”

¹⁴Na pekoni, Samuel atene na azo ni: “Ala ga, e gue na Gilgal ti kiri ti zia Saul gbia.”

¹⁵Azo ni kue ague na Gilgal. Kâ, ala zia Saul gbia na dawa ti KOTA GBIA. Na pekoni, ala mu *sandaga ti beoko na KOTA GBIA. Saul na azo ti Israel kue asara ngia mingi.