Read sango 1 Samuel 13 Bible Online

1 Samuel 13 - sango bible

1 Samuel 13

¹Saul ayeke na ngu … si lo ga gbia; lo le-gbia ngu use na ndö ti azo ti Israel.

²Na popo ti azo ti Israel, Saul asoro aturugu saki ota. Aturugu saki use angba na tere ti lo na kodro ti Mikmas nga na sese ti ahoto ti Betel. Ambeni saki oko ayeke na tere ti molenge ti lo Jonatan na gbata ti Gibea, na sese ti Benjamin. Saul atene na tanga ti azo ti Israel titene zo oko oko akiri na ndo ti lo.

³Mbeni lâ, Jonatan afâ govoronere ti azo ti Filistii so ayeke na kodro ti Geba si azo ti Filistii ama tënë ni. Saul amu yanga titene a huru didi na ya ti kodro kue, atene: “Alingbi ahebro ama tënë so!”

⁴Azo ti Israel kue ama a tene, Saul afâ mbeni govoronere ti azo ti Filistii si azo ti Filistii ni asara ngonzo na tere ti azo ti Israel. Tongaso aturugu kue abongbi ti mu peko ti Saul na kodro ti Gilgal.

⁵Azo ti Filistii abongbi nga ti tiri bira na azo ti Israel. Ala yeke na apusu ti mbarata saki baleota, azo ti kpengo na ambarata saki omene nga na gba ti aturugu so wungo ti ala ayeke tongana wungo ti mbutu ti yanga ti ngu. Azo ni ague, asara bâbâ ti ala na Mikmas na tere ti Bet-Aven na mbage ti To.

⁶So azo ti Israel abaa so ala yeke na ya ti ye ti ngangu, ngbanga ti so azo ti Filistii aga nduru nduru na ala, ala kpe ahonde tere ti ala na ya ti adu ti têne, na ya ti adu, na gbe ti akota têne, na gbe ti sese nga na ya ti adu ti ngu.

⁷Ambeni afâ ngu ti Jourdain ague na mbage ti sese ti Gad na ti Galaad. Saul angba na Gilgal; azo so kue amu peko ti lo so, tere ti ala ayeke do na mbeto.

⁸Saul aku na ya ti lango mbarambara alingbi na lango so Samuel afa na lo; me Samuel asi na Gilgal pepe si aturugu ni ado Saul azia, ala kangbi kirikiri.

⁹Saul atene: “Ala ga na mbi *sandaga so a yeke gbi ni kue na wâ nga na sandaga ti beoko.” Na pekoni, lo wani, lo mu na Nzapa sandaga so a yeke gbi ni kue na wâ.

¹⁰Gi so lo mu sandaga ni awe, Samuel asi. Saul amu dawa ti lo ti bara lo.

¹¹Samuel atene: “Nyen laa mo sara so?” Saul akiri tënë: “So aturugu ado mbi azia si ala kangbi kirikiri so, mo nga, mo ga na lango so e fa so pepe; na ndö ni kue, azo ti Filistii abongbi tere ti ala na Mikmas.

¹²Tongaso, mbi tene na be ti mbi, mbi tene: Azo ti Filistii ayeke ga fadeso na Gilgal ti gbu mbi; me ade mbi sara ye ti zia ngia na be ti KOTA GBIA pepe! Ndani laa mbi kanga be ti mbi si mbi wani, mbi mu na Nzapa sandaga so a yeke gbi ni kue na wâ.”

¹³Samuel atene na Saul: “Mo sara ye tongana zo so li ti lo ayeke daa pepe. Tënë so KOTA GBIA, Nzapa ti mo atene na mo so, mo sara ye alingbi na ni pepe. Tongana mo sara fade ye alingbi na ni, ka lo zia mo, na *ahale ti mo ti duti gbia na ndö ti azo ti Israel kpu na kpu.

¹⁴Me fadeso, lengo-gbia ti mo ayeke ninga pepe. KOTA GBIA asoro mbeni zo so be ti lo wani aye; lo zia lo ti duti makonzi na ndö ti azo ti lo, ngbanga ti so yanga so lo mu na mo, mo sara ye alingbi na ni pepe.”

¹⁵Samuel alondo na Gilgal ti gue na Gibea so ayeke na sese ti Benjamin. Saul adiko aturugu so ayeke na tere ti lo. Wungo ti ala aga nduru na ngbangbo omene.

¹⁶Saul, na molenge ti lo Jonatan nga na azo so ayeke na tere ti ala aduti na Geba na sese ti Benjamin. Me azo ti Filistii asara bâbâ ti ala na Mikmas.

¹⁷Aturugu ti bubango ndo asigigi na ya ti bâbâ ti azo ti Filistii. Ala kangbi ya ti ala ota. Kozo kangbi ni amu lege so ague na mbage ti Ofra na sese ti Shual.

¹⁸Use kangbi ni amu lege so ague na Bet-Horon si ota kangbi ni amu lege so ague na katikati ti kodro ni, na popo-hoto so a iri ni agbongo na mbage ti benyama.

¹⁹Na sese ti Israel kue, a wara zo ti pikango ndao pepe, ngbanga ti so azo ti Filistii aye pepe titene ahebro aleke ayongoro zeme wala alikongo.

²⁰Azo ti Israel kue ayeke gue na ndo ti azo ti Filistii titene ala za yanga ti kpoka ti masini ti fango na yaka ti ala, yanga ti kpoka ti ala, yanga ti do ti ala nga na yanga ti kângâ ti ala.

²¹Ti za yanga ti kpoka ti masini ti fango na yaka, wala yanga ti kpoka, yanga ti do, wala ti leke wen so ayeke kpo na abagara ti luti mbirimbiri, ala yeke futa ngere ni ngangu, nduru na le ti nginza oko.

²²Tongaso, na lango ti bira, aturugu ti Saul na ala ti Jonatan ayeke na ayongoro zeme pepe, ala yeke nga na alikongo pepe. Gi Saul na molenge ti lo Jonatan laa ayeke na ni.

²³Mbeni bongbi ti aturugu ti Filistii ague, aduti na lege so ague na Mikmas.